தைய தைய பாடல் கொடுத்த பிரபலம்.. ஓம் சாந்தி ஓம் காதல்.. ரா ஒன்னில் தமிழன்.. அட்லீக்கு தந்த ஊக்கம்.. ஷாருக்கானின் கதை

பாலிவுட் பாட்ஷா எனப் புகழப்படும் ஷாருக்கான் இந்தியாவின் மிக உயரிய விருதான பத்மஸ்ரீ முதல் பிரான்ஸ் அரசால் வழங்கப்படும் லெஜியன் ஆஃப் ஹானர் விருது வரை பல முக்கிய விருதுகளைத் தன் நடிப்புத்திறமையின் மூலம் பெற்றவர்.

தமிழ் சினிமாவில் மட்டுமல்ல தற்போது இந்திய சினிமாவின் கவுரவமாக மாறி உயர்ந்து நிற்கும் ஷாருக்கானின் பிறந்தநாள் இன்று கொண்டாடப்படுகிறது. வாருங்கள் அவரைப் பற்றி அறிந்துகொள்வோம்.

யார் இந்த ஷாருக்கான் - அவரது குடும்பப் பின்னணி?:

ஷாருக்கானின் தந்தை மீர் தாஜ் முகமது கான் ஒரு சுதந்திர போராளி. ஷாருக்கான் டெல்லியில் நவம்பர் 2ஆம் தேதி, 1965ஆம் ஆண்டு பிறந்தவர். இவர் மங்களூருவில் உள்ள அவரது தாய்வழி தாத்தா வீட்டில் சிறிய வயதில் வளர்ந்தார். இவரது தந்தை வியாபாரி, டெல்லியில் ரெஸ்டாரென்ட் வைத்திருந்தார். கான், டெல்லியில் உள்ள புனித கொலம்பா பள்ளியில் படித்தார்.

பள்ளியில் படிப்புடன் விளையாட்டிலும் சிறந்து விளங்கினார். முதலில் விளையாட்டில் ஆர்வம் காட்டிய ஷாருக்கானால் அவருக்கு ஏற்பட்ட தோள்பட்டை காயத்தால் அதை தொடர முடியவில்லை. தொடர்ந்து மேடை நாடகங்களில் நடிக்கத் துவங்கி, இப்போது இந்த நிலையை அடைந்துள்ளார். ஹன்ஸ்ராஜ் கல்லூரியில் சேர்ந்துவிட்டு, டெல்லி தியேட்டர் குழுவில் இணைந்து படிப்பைவிட, நடிப்பில் அதிகம் கவனம் செலுத்தினார்.

தேசிய நாடகப்பள்ளியில் சேரும் வாய்ப்பு கிடைத்தபோது, ஜாமியா மிலியா இஸ்லாமியா பல்கலைக்கழகத்தில் பயின்று வந்த முதுநிலை படிப்பை அவரால் தொடர முடியாமல் போனது. 1981-ல் தந்தையை இழந்த ஷாருக்கான், 1991-ல் தனது அன்னையையும் இழந்து தவித்தார். அதன்பின், தனது சகோதரியுடன் மும்பையில் உள்ள மான்சனில் தங்கினார்.

பின், தனது ஆறு வருடக்காதலுக்குப் பின், சகோதரியின் சம்மதத்துடன் ஷாருக்கான் கவுரி ஷிப்பர் என்னும் பஞ்சாபி இந்து பெண்ணை 1991ஆம் ஆண்டு, அக்டோபர் 25ஆம் தேதி திருமணம் செய்தார். அதன்பின் இந்த தம்பதிகளுக்கு 1997ஆம் ஆண்டு ஆர்யன் என்னும் மகனும், 2000ஆம் ஆண்டு சுஹானாவும் பிறந்தனர். பின், வெகு நாட்கள் கழித்து, இத்தம்பதியினர் மூன்றாவதாக வாடகைத் தாய் மூலம் அப்ராம் என்னும் ஆண் குழந்தையைப் பெற்றெடுத்தனர்.

திரைப் பயணம்:

1980-களின் தொடக்கத்தில் சின்னத்திரை சீரியல்களில் தனது நடிப்புப் பயணத்தைத் தொடங்கிய ஷாருக்கான், 1992ஆம் ஆண்டு ’தீவானா’ படத்தின் மூலம் பாலிவுட்டில் நடிகர் ஆனார்.

பின்னர் ரொமான்டிக்காக இவர் நடித்த ’தில்வாலே துல்ஹனியா லஜாயேங்கே’ என்ற படம் தென்னிந்தியா வரை இவரது புகழை கொண்டு சேர்த்தது. குறிப்பாக, ஆயிரம் வாரங்கள் திரையரங்கில் ஓடி சாதனைப் புரிந்தது. இப்படத்தில் இவருக்கு ஜோடியாக நடித்த கஜோல் மற்றும் ஷாருக்கானின் கெமிஸ்ட்ரி பல காதலர்களுக்கு முன் உதாரணம் ஆனது.

அடுத்து 1998ம் ஆண்டு இவர் நடித்த குச் குச் ஹோட்டா ஹே திரைப்படம் இவருக்கு சூப்பர் டூப்பர் ஹிட்டாக அமைந்து இவருக்கு புகழ் சேர்த்தது. தொடர்ந்து, ஹபி குஷி ஹபி கம், கல்ஹோனா ஹோ, வீர் சாரா, தேவ்தாஸ், ஸ்வதேஷ், சக்தே இந்தியா ஆகிய படங்கள் இவருக்கு இந்தியா மற்றும் உலகளவில் ரசிகர்களை கொண்டு வந்தது.

அதன்பின், ஓம் சாந்தி ஓம், சென்னை எக்ஸ்பிரஸ், ரா ஒன் ஆகியப் படங்களும் ஷாருக்கானின் படங்களில் குறிப்பிடத்தக்கவை. கடந்த ஆண்டு ஷாருக்கான் நடித்த பதான் மற்றும் ஜவான் இரண்டு படங்களும் இவருக்கு நல்ல பெயரைப் பெற்றுக்கொடுத்தன. ஜவான் திரைப்படம் உலகளவில் ரூ.1125 கோடி வசூலித்து சாதனைப் படைத்தது. முன்னதாக, ஜவான் படத்தில் கமிட் ஆன அட்லீயைப் பற்றி பலரும், ஷாருக்கானின் காதுபட விமர்சிக்க, அதையும் புறந்தள்ளிய ஷாருக்கான், அவரை உற்சாகப்படுத்தி, நல்லவிதமாக படத்தை மட்டும் எடுத்துக்கொள்ளுங்கள் என ஊக்கப்படுத்தியிருக்கிறார். இதனால், ஜவானுக்காக கடுமையாக உழைத்து நல்ல அவுட் புட்டைக் கொடுத்தாராம், அட்லீ.

இதைத்தவிர்த்து, ரெட் சில்லீஸ் என்டர்டைன்மென்ட் நிறுவனத்தின் இணை சேர்மனாகவும் இருக்கிறார். ஐபிஎல் கொல்கத்தா அணியின் சொந்தக்காரராகவம் ஷாருக்கான் உள்ளார். தவிர, இவர் தொலைக்காட்சி மற்றும் மேடை நிகழ்ச்சிகளையும் தொகுத்து வழங்கி பலரை ஈர்த்து வருகிறார்.

இப்படி பலரை தன் நடிப்புத் திறமையால் ஈர்த்து, பலரின் மனதைக் கொள்ளைகொண்ட நடிகர் ஷாருக்கானின் பிறந்த நாளான இன்று அவரை வாழ்த்துவதில் பெருமிதம் கொள்கிறது, இந்துஸ்தான் டைம்ஸ் தமிழ்!