80 கிலோ வரை உடல் எடையைக் கூட்டி படிப்படியாக குறைத்தேன்.. ஒரு வாரம் ஆர்மி வீரர்களோட ட்ரெய்னிங்.. அமரன் கதை சொன்ன எஸ்.கே

இதுவரை காமெடிக்கு முக்கியத்துவம் அளிக்கும் கேரக்டர்களிலும், குடும்ப உறுப்பினர்களைக் கவரும் விதமாகவும் நடித்து வந்த சிவகார்த்திகேயன், இந்த ’அமரன்’ படத்தில் முழுக்க அதிரடி ஹீரோவாகத் தோன்றியுள்ளார்.

அமரன் கேரக்டரில் ராணுவ வீரனாக சிவகார்த்திகேயன்:

ராணுவ வீரர் போல் உடல் கட்டமைப்பைப் பெறுவதற்காக, படப்பிடிப்பு தொடங்குவதற்கு முன்பு, கடும்பயிற்சியை சிவகார்த்திகேயன் மேற்கொண்டார். படம் தொடங்கப்படும்போது, சிவகார்த்திகேயனின் ஒர்க் அவுட் வீடியோவை படக்குழுவினர் பகிர்ந்து, அவரை உற்சாகப்படுத்தினர்.

இந்தப் படத்துக்கு ஜி.வி. பிரகாஷ் குமார் இசையமைத்துள்ளார். படத்தின் ஒளிப்பதிவினை சாய் என்பவர் செய்துள்ளார். எடிட்டிங்கினை கலை கலைவாணன் புரிந்துள்ளார். ஆக்‌ஷன் திரைப்படத்தை ஸ்டீஃபன் ரிச்டர் செய்துள்ளார். கலைப்பணியை பி.சேகரும், நடன அமைப்பினை ஷெரிஃப்பும் செய்துள்ளனர்.

சிவகார்த்திகேயனின் படத்தை தயாரித்த கமல்ஹாசன்:

இப்படத்தை கமல்ஹாசனின் ராஜ்கமல் ஃபிலிம்ஸ் இன்டர்நேஷனல் தயாரிப்பு நிறுவனத்தோடு சேர்த்து, சோனி பிக்சர்ஸ் இன்டர்நேஷனல் நிறுவனம் தயாரித்துள்ளது. சோனி பிக்சர்ஸ் இன்டர்நேஷனல் புரொடக்ஷன்ஸ், நிறுவனம் தமிழ் சினிமாவில் அறிமுகமாகும் படம் இது என்பது குறிப்பிடத்தக்கது.

படத்தின் பெரும்பாலான காட்சிகள் காஷ்மீரிலும், சில காட்சிகள் சென்னை, புதுச்சேரி மற்றும் கேரளாவிலும் எடுக்கப்பட்டதாகத் தெரிகிறது.

கடந்த ஆகஸ்ட் 29ஆம் தேதி முடிந்த ’அமரன்’ படத்தின் படப்பிடிப்பு முழுமையாக முடிந்தது. அதன் பின்னர், போஸ்ட் புரொடக்சன் பணிகள் நடைபெற்றுவந்தன. இந்நிலையில் அமரன் திரைப்படம் வரும் அக்டோபர் 31ஆம் தேதி தீபாவளிக்கு திரைக்கு வர இருக்கிறது. இந்நிலையில் அமரன் திரைப்படத்தின் ரிலீஸ் ட்ரெய்லர் தமிழ், தெலுங்கு, மலையாளம், கன்னடம், இந்தி என ஐந்து மொழிகளில் வெளியாகி பரவலான வரவேற்பினைப் பெற்று வருகிறது.

80 கிலோ எடையைக் கூட்டி படிப்படியாக எடையைக் குறைத்த சிவகார்த்திகேயன்:

இந்நிலையில், இதுதொடர்பாக எவல்வேஷன் ஆஃப் அமரன் பாகம் 2 என்னும் காணொலியை ராஜ்கமல் ஃபிலிம்ஸ் இன்டர்நேஷனல் நிறுவனம் வெளியிட்டுள்ளது.

அந்த காணொலியில் சிவகார்த்திகேயன், அமரன் படத்திற்கு எவ்வாறு உடல் அளவிலும் மனது அளவிலும் தயார் ஆனேன் எனப் பேசியிருக்கிறார். 

அதில் முதலில்  பேசிய சிவகார்த்திகேயன், ‘’ ‘பிசிக்கலாக வந்து ஒரு டிமாண்டிங் ஆன படம் இது. 10 வருட ராணுவ பயணத்தை வெவ்வேறு தோற்றத்தில் காட்டுனோம். இந்தப் படம் ரிவர்ஸாக சூட் செய்தோம். மேஜர் முகுந்த் அவர்களின் தோற்றத்திற்காக 73 கிலோவில் இருந்து 80 கிலோ கிராம் எடைக்குப் போனேன் நானு. அதுதான் நான் முதலில் செய்ய வேண்டிய பிராசஸ் ஆக இருந்தது. அதை முதலில் எடுத்திடலாம்ன்னு. 

அது எடுத்து முடிச்சதுக்கப்புறம் கேப்டன் ரோல் செய்வதற்காக 75 கிலோ கிராம் எடைக்கு வந்தேன். அதற்கப்புறம் ஓ.டி.ஏ அதாவது ட்ரெய்னிங் அகாடமியில் இருந்த பிராசஸ் தான். அடுத்து மீண்டும் 72 கிலோ எடைக்கு வந்தேன். இந்தப் பயணத்துக்கு லைஃப் ஸ்டைலையே சரிசெய்யணும்.

அடுத்து காஷ்மீர் போய் அந்த உண்மையான ராணுவ வீரர் குழுவிடம் ஒரு வாரம் பயிற்சி எடுத்துக்கிட்டேன். அப்படி தான் அமரன் படத்துக்கு ட்ரெயின் ஆனோம். இந்தப் படத்துக்கு மட்டுமில்லாமல், எனக்குமே இந்த ட்ரெய்னிங் ரொம்ப பயனுள்ளதாக இருந்தது’’ என்றார் சிவகார்த்திகேயன்.

கலோனல் சரவண வினோத்தின் பேட்டி:

இந்தப் படத்துக்கு ராணுவ வீரர்கள் பற்றிய பயிற்சியளித்த கலோனல் சரவண வினோத் கூறுகையில், ‘’சிவகார்த்திகேயன் இந்த ரோலுக்கு வந்ததுக்குப் பின், அவர் உடல் அளவிலும் மனதளவிலும் எமோஷனலாகவும் தயார் ஆகணும். தினமும் உடற்பயிற்சி செய்வது, ராணுவ வீரரின் பாடி லாங்குவேஜை கற்றுக்கொள்ளணும். நடக்குற ஸ்டைல், ஆயுதத்தைப் பிடிக்கும் முறை, எப்படி சுடனும் என அனைத்தையும் மாத்துனோம். சிவகார்த்திகேயன் அதற்காக கடினமாக உழைச்சார். ஏ.கே 47-ல் சுடுவதற்கு கத்துக்கிட்டார்’’ என்றார்.

அடுத்து பேசிய அமரன் படத்தின் இயக்குநர் ராஜ்குமார் பெயரியசாமி கூறுகையில், ‘’இந்தப் படம் ராணுவ வீரனின் வாழ்க்கையைப் பற்றியது. அதிலும், அதில் இருக்கும் ஒரு குறிப்பிட்ட யூனிட் பற்றியது. பயங்கரவாதத்தை அழிக்க தினமும் அதற்கான ஆப்ரேஷன்களில் ஈடுபடும் குழுவினர் பற்றிய கதை அமரன். அதற்காக டெக்னிக்கலாக சிவகார்த்திகேயன் பயிற்சி எடுக்கணும். அதற்காக நிறைய வொர்க் ஷாப் இருந்தது. மும்பையில் விக்கி அரோரா அப்படிங்கிற ஒரு பயிற்சியாளர் நிறைய இந்தி நடிகர்களுக்குப் பயிற்சி கொடுத்திருக்கார். அவரிடம் பயிற்சிக்கு அனுப்பினோம். ஹோட்டலில் இருந்தாலுமே அதில் போய் வொர்க் அவுட் பண்ணிட்டு சிவகார்த்திகேயன் வருவார். அதற்காக ஒரு டயட்டில் இருந்தார்.படத்துக்காக அவரும் சரி, அவர்கூட நடிச்சவங்களும் சரி, நிறைய தயார் ஆகி இருக்காங்க’’ என்றார்.