Vijay: ஜனநாயகத்தின் தீபம் ஏற்ற புறப்பட்ட விஜய் - வெளியான தளபதி 69 படத்தின் புதிய அப்டேட்!

விறுவிறுப்பாக நடைபெறும் தமிழக வெற்றிக்கழக உறுப்பினர் சேர்க்கை:

அதனைத்தொடர்ந்து தமிழக வெற்றிக் கழகத்தில், உறுப்பினர் சேர்க்கையில் 2 கோடி உறுப்பினர்களை சேர்க்க இலக்கு வைத்து வேலை செய்துவருகின்றனர், அக்கட்சி நிர்வாகிகள். மேலும், உறுப்பினர் சேர்க்கைக்காக , ’’தமிழக வெற்றிக் கழகம்’’ என்னும் செயலி ஒன்றை அறிமுகப்படுத்தியது. அதில் தமிழக வெற்றிக் கழகம், தனக்கான உறுப்பினர் சேர்க்கையை கடந்த மார்ச் 8ஆம் தேதி தொடங்கியது.

தொடங்கிய மூன்றே நாட்களில் 50 லட்சம் பேர் உறுப்பினர்களாக இணைந்துள்ளனர். தவிர, தமிழக வெற்றிக் கழக நிர்வாகிகள் உறுப்பினர்கள் சேர்க்கையில் தீவிரமாக செயல்பட்டு வருகின்றனர்.

இந்நிலையில் நடந்து முடிந்த மக்களவைத் தேர்தலில் விடுதலைச் சிறுத்தைகள் கட்சியும், நாம் தமிழர் கட்சியும் மாநிலக் கட்சிகளாக அங்கீகரிக்கப்பட்ட நிலையில், அதற்கு நடிகரும் தமிழக வெற்றிக் கழத்தின் தலைவருமான விஜய்யும் வாழ்த்துத் தெரிவித்திருந்தார்.

அடுத்து கள்ளக்குறிச்சி விஷ சாராய மரணங்கள் நிகழ்ந்த பகுதிக்கு நேரடியாக சென்று, பாதிக்கப்பட்ட மக்களுக்கு ஆறுதல் தெரிவித்தார். அண்மையில் 10, 12ஆம் வகுப்புகளில் மாவட்ட அளவில், ஊரக அளவில் முதலிடம் பெற்றவர்களை விஜய் விழாவாக ஏற்பாடு செய்து கெளரவித்தார். மேலும் பி.ஆர்.அம்பேத்கர், பெரியார் ஈ.வே.ராமசாமி மற்றும் காமராஜ் போன்ற தலைவர்கள் மற்றும் அவர்களின் லட்சியங்களைப் பற்றி படிக்குமாறு மாணவர்களை வலியுறுத்தினார். கன மழையால் கடுமையாகப் பாதிக்கப்பட்டுள்ள தென் மாவட்டங்களுக்கு அவர் சமீபத்தில் சென்று, பாதிக்கப்பட்ட மக்களுக்கு உதவி செய்தார்.

அதன் அடுத்தகட்டமாக, சமீபத்தில் தமிழக வெற்றிக் கழகத்தின் கொடியை, அக்கட்சியின் தலைவரும் நடிகருமான விஜய் அறிமுகம் செய்துவைத்தார். மேலும் தமிழக வெற்றிக் கழகம் தொடர்பான பாடலையும் வெளியிட்டார். அப்போது, தமிழக வெற்றிக் கழகத்திற்கு அங்கீகாரம் கிடைத்ததை அக்கட்சியின் தலைவரும் நடிகருமான விஜய் உறுதி செய்தார். மேலும், அக்கட்சியின் முதல் மாநாட்டுக்கு காவல்துறை அனுமதி வழங்கியுள்ளது.

விரைவில் விஜய்யின் புதிய படம்:

இந்நிலையில் விழுப்புரம் மாவட்டம், விக்கிரவாண்டியில் தமிழக வெற்றிக்கழகத்தின் முதல் மாநாட்டிற்கு காவல்துறை அனுமதி வழங்கியிருக்கிறது. முன்பாக, 21 நிபந்தனைகளை வழங்கியிருந்தது. நிபந்தனைகளோடு காவல்துறை தமிழக வெற்றிக்கழகத்தின் முதல் மாநாட்டிற்கு அனுமதி வழங்கியுள்ளது. அனுமதி கடிதத்தை தமிழக வெற்றிக் கழகத்தின் வழக்கறிஞரிடம் விழுப்புரம் மாவட்ட காவல் துறை வழங்கியுள்ளது.

இந்நிலையில் நடிகர் விஜய்யின் 69ஆவது மற்றும் இறுதிப்படத்தை ஹெச். வினோத் இயக்கவுள்ளார் என அறிவிப்பு வெளியாகியுள்ளது. அனிருத் இப்படத்துக்கு இசையமைக்கவுள்ளார். படத்தை பெங்களூருவை அடிப்படையாகக்கொண்ட கே.வி.என் என்னும் தயாரிப்பு நிறுவனம், தயாரிக்கவுள்ளது. தற்காலிகமாக தளபதி 69 எனப் பெயர்சூட்டப்பட்ட இப்படத்தினை ஜகதீஷ் பழனிசாமியும், லோகித் என்.கே.வும் இணைந்து இணைத்தயாரிப்பு செய்கின்றனர். இப்படம் அடுத்த ஆண்டு, அக்டோபர் 2025ல் வெளியாகும் எனப் படக்குழு அறிவித்துள்ளது. இதுதொடர்பாக வெளியாகியுள்ள போஸ்டரில், The torch bearer of democracy என்னும் வார்த்தையை, அதாவது, ஜனநாயகத்தின் தீபம் ஏற்றுபவர் என்னும் பொருள்படும் வார்த்தையினைப் படக்குழு வெளியிட்டுள்ளது.