தமிழ் செய்திகள்  /  பொழுதுபோக்கு  /  Ilaiyaraaja: ‘ஒரே ஒரு ராஜா சாருக்கு பிறந்த நாள் வாழ்த்துகள்’: இளையராஜா பயோபிக் போஸ்டரை வெளியிட்டு வாழ்த்து சொன்ன தனுஷ்

Ilaiyaraaja: ‘ஒரே ஒரு ராஜா சாருக்கு பிறந்த நாள் வாழ்த்துகள்’: இளையராஜா பயோபிக் போஸ்டரை வெளியிட்டு வாழ்த்து சொன்ன தனுஷ்

Marimuthu M HT Tamil
Jun 02, 2024 10:54 AM IST

Ilaiyaraaja: இசைஞானி இளையராஜாவின் பிறந்த நாளை ஒட்டி, இளையராஜா பயோபிக் போஸ்டரை தனுஷ் வெளியிட்டுள்ளார்.

Ilaiyaraaja: ‘ஒரே ஒரு ராஜா சாருக்கு பிறந்த நாள் வாழ்த்துகள்..’: இளையராஜா பயோபிக் போஸ்டரை வெளியிட்ட தனுஷ்
Ilaiyaraaja: ‘ஒரே ஒரு ராஜா சாருக்கு பிறந்த நாள் வாழ்த்துகள்..’: இளையராஜா பயோபிக் போஸ்டரை வெளியிட்ட தனுஷ்

ட்ரெண்டிங் செய்திகள்

இந்தியா சினிமா இசையின் அடையாளமாக பார்க்கப்படும் இளையராஜாவின் வாழ்க்கை படம் சமீபத்தில் உருவாவதாக அறிவிக்கப்பட்டது. இப்படத்தில் நடிகர் தனுஷ், இளையராஜாவின் கதாபாத்திரத்தில் நடிக்கிறார். 

இந்தப்படத்தை ‘சாணிக்காயிதம்’, ‘ராக்கி’, ‘கேப்டன் மில்லர்’ உள்ளிட்ட திரைப்படங்களை இயக்கி கவனம் ஈர்த்த இயக்குநர் அருண் மாதேஸ்வரன் இயக்க இருக்கிறார். இந்தப்படம் தொடர்பான துவக்க விழா சென்னையில் சமீபத்தில் நடைபெற்றது. இதில் கமல்ஹாசன், வெற்றிமாறன், இளையராஜா, தனுஷ் உள்ளிட்ட பல முக்கியப் பிரபலங்கள் கலந்து கொண்டு வாழ்த்தினர்.

இளையராஜா ஃபர்ஸ்ட் லுக் போஸ்டரில் எழுந்த சர்ச்சை:

இந்த நிலையில் படத்தின் ஃபர்ஸ்ட் லுக் போஸ்டரை நடிகர் தனுஷ் வெளியிட்டார். இந்தப் போஸ்டரில் நடிகர் தனுஷ், இளையராஜா தோற்றத்தில் சென்னை சென்ட்ரலில் இறங்கி ஆர்மோனியப்பெட்டியுடன் இருப்பது போன்ற படம் காட்டப்படுகிறது. அதற்குப் பலரும் தனுஷ், மதுரையில் இருந்து கேரளா போய்விட்டு, சென்னை சென்ட்ரல் நிலையம் வந்திருப்பார் போல என விமர்சித்தனர்.

மேலும், இயக்குநர் அருண் மாதேஸ்வரன் போன்ற வன்முறைக் காட்சிகள் நிறைந்த படத்தை எடுத்த இயக்குநர் எப்படி, ஒரு மெல்லிய இசையமைப்பாளரின் வாழ்க்கை வரலாற்றுப் படத்தை எடுக்கமுடியும் என விமர்சித்தனர்.

பெரும்பான்மையாக சினிமா நிகழ்ச்சிகள் எதிலும் தலைகாட்டாத இளையராஜா, தன் கதையை வைத்து எடுக்கும் பயோபிக்குக்கான முன் புரோமோசன் நிகழ்ச்சியில் மட்டும் மரியாதை நிமித்தமாக கலந்துகொண்டார்.

இந்த நிலையில் இந்தப்படம் குறித்து தன்னுடைய ட்விட்டர் பக்கத்தில் பதிவிட்டு இருக்கும் இளையராஜா, “ஆரம்பத்தில், இது என்னுடைய தனிப்பட்ட பயணமாக இருந்தது. ஆனால் இப்போது அது கதையாக மாறி, உலகம் முழுவதும் இருக்கும் லட்சக்கணக்கான இசை ஆர்வலர்களின் இதயத்தை தொடப்போகிறது. முழு அணியும் வெற்றிபெற வாழ்த்துகள்!” என்று பதிவிட்டு இருக்கிறார். 

தனுஷின் ஆசைகள்:

முன்னதாக நிகழ்வில் பேசிய தனுஷ், “எண்ணம் போல் வாழ்க்கை என்பதை நான் அடிக்கடி சொல்வது உண்டு. நம்மில் பல பேர் இரவில் தூக்கம் இல்லை என்றால் இளையராஜாவின் பாடல்களை கேட்டு இதமாக, மெய் மறந்து தூங்குவோம்.

ஆனால், நான் பல இரவுகள் இளையராஜா சாரை போல நாம் நடித்தால் எப்படி இருக்கும் என்று நினைத்து நினைத்து தூங்காமல் படுத்துக்கொண்டு இருந்து இருக்கிறேன்.

இரண்டு பேருடைய வாழ்க்கை வரலாறில் நடிக்க வேண்டும் என்று மிகவும் ஆசைப்பட்டேன். ஒன்று இசைஞானி இளையராஜா இன்னொன்று சூப்பர் ஸ்டார் ரஜினிகாந்த். அதில் ஒன்று தற்போது நிறைவேறுகிறது. இது எனக்கு ஒரு விதமான கர்வத்தை கொடுக்கிறது. நான் இளையராஜா சாருடைய ரசிகன் மட்டும் அல்ல பக்தன்.

அவரது இசைதான் எனக்குத் துணை. இது எல்லோருக்குமே பொருந்தும். அதைத் தாண்டி அவரது இசை எனக்கு ஒரு நடிப்பு ஆசானும் கூட.

எனக்கு நடிப்பு என்றால் என்னவென்றே தெரியாத காலத்தில் இருந்து, இப்போது வரைக்கும், ஒரு காட்சியை படமாக்குவதற்கு முன்னால், அந்த காட்சிக்கு ஏற்றார் போல இருக்கக்கூடிய இளையராஜாவின் பாடலையோ அல்லது பின்னணி இசையையோ கேட்டுக் கொண்டு இருப்பேன்.

அந்த இசை அந்தக் காட்சியை எப்படி நடிக்க வேண்டும் என்று எனக்கு சொல்லிக் கொடுக்கும். அதை அப்படியே நான் உள்வாங்கி அந்த காட்சியில் நடிப்பேன். ஒரு சில முறை வெற்றிமாறன் நான் அப்படி செய்வதை பார்த்திருக்கிறார்.

இளையராஜா கதாபாத்திரத்தில் நடிப்பது மிகப்பெரிய சவால் என்றும்; இது மிகப்பெரிய பொறுப்பு என்றும் சொல்கிறார்கள். எனக்கு அப்படி தெரியவில்லை. இப்போதும் எனக்கு அதே இசை, எப்படி நடிக்க வேண்டும் என்பதை எனக்கு சொல்லிக் கொடுக்கும்.

நான் உங்களை தொடர்ந்து வந்து கொண்டே இருக்கிறேன். விடுதலை திரைப்படத்தில் ஒரு பாடலை நான் பாடும் பொழுது இளையராஜா அங்கே இருந்தார்.

உடனே நான் அவரிடம், ’சார் நீங்கள் இங்கே தான் இருப்பீர்களா’ என்று கேட்டேன். அதற்கு அவர், ’எப்போது நான் உன்னுடன் இல்லை’ என்றுகேட்டார். என்னுடைய அம்மாவின் வயிற்றில் நான் இருக்கும் போதிலிருந்து நீங்கள் என்னுடன் இருக்கிறீர்கள் என்று நான் சொன்னேன்’’ என முடித்தார். 

இளையராஜா படக்குழுவினர் வெளியிட்ட போஸ்டர்:

இந்நிலையில் இசையமைப்பாளர் இளையராஜாவின் பிறந்தநாள் இன்று(ஜூன் 2) கொண்டாடப்படுகிறது. அவர் தனது 81ஆவது பிறந்தநாளை கொண்டாடுவதை ஒட்டி, இளையராஜா பயோபிக் படத்தைத் தயாரிக்கும் படக்குழு, அப்படத்தின் புதிய போஸ்டரை வெளியிட்டுள்ளது. 

இதுதொடர்பாக தனுஷ் எக்ஸ் தளத்தில் போட்ட பதிவில், ‘ஒரே ஒரு இளையராஜா சாருக்கு, இனிய பிறந்தநாள் வாழ்த்துகள்’ எனப் பதிவிட்டுள்ளார்.

 

டி20 உலகக் கோப்பை 2024

டாபிக்ஸ்