வெளியான குபேரா கிளிம்ப்ஸ்.. யாசகர் டூ மாப்பிள்ளை லுக்கில் தனுஷ்.. மிடில் கிளாஸ்பெண்ணாக ராஷ்மிகா.. நாகார்ஜூனா மாஸ் லுக்

நடிகர் தனுஷ் தமிழ் மொழியில் நடிக்கத் தொடங்கி, தெலுங்கு, இந்தி, ஆங்கிலம் ஆகிய மொழிகள் வரை சென்றுவிட்டார். இவர் நடித்த 3(மூன்று) திரைப்படத்தில் இடம்பெற்ற ’’ஒய் திஸ் கொலைவெறிடி’’ எனும் பாடல், தனுஷின் புகழை முதலில் உலகளவில் வெளிச்சமிட்டுக் காட்டியது. இளம் வயதில் இதுவரை 2 தேசிய விருதுகளை வென்ற நடிகர் என்னும் பெயரையும் தனுஷ் பெற்றிருக்கிறார்.

நடிகர், தயாரிப்பாளர், பாடலாசிரியர், பாடகர் எனப் பல துறைகளிலும் தன் திறமைகளை வளர்த்துக் கொண்டதோடு மட்டுமல்லாமல், தனது திறமையையும் நிரூபித்து வருகிறார், தனுஷ். அந்த வகையில் நடிகர் தனுஷ் இயக்குநர் அவதாரம் எடுத்தபோது, நடிகர் ராஜ்கிரண் மற்றும் ரேவதியை, கதையின் மாந்தர்களாக வைத்து இயக்கி நடித்த படம்தான், பவர் பாண்டி.

நடிகர் தனுஷ் தனது கேரியரில் மதிப்புமிக்க, தனது 50ஆவது படமான ‘ராயன்’ திரைப்படத்தைத் தானே இயக்கிவந்தார். இந்தப் படத்தை சன் பிக்சர்ஸ் நிறுவனம் தயாரித்தது. இப்படத்தில் தனுஷ் மொட்டையடித்த நிலையில் மூத்த அண்ணனாக நடித்திருந்தார். அறிவிப்பு போஸ்டரில், தனுஷ் பின்னால் இருந்து, சட்டையின்றி கையில் கத்தியுடன் காட்சியளித்தார். இப்படம் 100 கோடி ரூபாய்க்கும் வசூலித்து சாதனைப்படைத்தது.

குபேரா படக்குழு பற்றிய விவரம்:

இது ஒரு புறம் போய்க்கொண்டிருக்க, தனுஷ் தனது 51ஆவது படத்திலும் தொடர்ந்து நடித்துக்கொண்டிருந்தார். அதன்பெயர் ‘’குபேரா'' என அறிவிக்கப்பட்டது. இப்படமும் தமிழ் மற்றும் தெலுங்கு என பைலிங்குவலில் உருவாகி வருகிறது. இப்படத்தை தெலுங்கு படத்தின் முக்கிய இயக்குநர் சேகர் கம்முலா இயக்குகிறார். இவர் 2007ஆம் ஆண்டு இன்ஜினியரிங் படிக்கும் கல்லூரி மாணவர்களின் வாழ்வியலை வைத்து இயக்கிய ’ஹேப்பி டேஸ்’என்னும் திரைப்படம் அப்போதே, மொழிகள் தாண்டி, தமிழ்நாட்டிலும் பல கல்லூரி மாணவர்களால் பார்க்கப்பட்டு, பாராட்டப்பட்டது.

தவிர, ’’குபேரா’’ படத்திற்கு தேவிஸ்ரீ பிரசாத் இசையமைக்கிறார். இப்படத்தில் தனுஷூடன் தெலுங்கின் முன்னணி நடிகரான நாகார்ஜூனா அக்கினேனி, ராஷ்மிகா மந்தனா, ஜிம் சர்ப் ஆகியோர் நடித்து வருகின்றனர். இப்படத்தினை ஸ்ரீ வெங்கடேஸ்வரா சினிமாஸ் எல்.எல்.பி அமிகோஸ் கிரியேஷன்ஸ் சார்பில், சுனில் நரங் மற்றும் புஷ்கர் ராம் மோகன் ராவ் ஆகியோர் தயாரிக்கின்றனர்.

குபேரா ஃபர்ஸ்ட் லுக் டீஸர்:

இந்நிலையில் '’குபேரா’’ படத்தில் நடிக்கும் நாகார்ஜூனாவின் ஃபர்ஸ்ட் லுக் டீஸர் சில மாதங்களுக்கு முன் வெளியானது. அதில் கன்டெய்னர் லாரி நிறைய பணக்கட்டுகள் இருக்கின்றன.

அங்கு இருந்து கீழே இறங்கும் கேமரா, பெருமழையில் நின்று குடைபிடித்துக்கொண்டிருக்கும் நாகார்ஜூனாவைக் காட்டுகிறது. அப்போது கீழே இருந்த ரூ.500 நோட்டினை எடுக்கும், நாகார்ஜூனா, தன் பர்ஸில் இருந்து எடுத்த மேலும் ரூ.500-ஐ சேர்த்து, நடைமேடை அருகே வைக்கிறார். இதன்மூலம் ‘குபேரா’ என்னும் கதைமாந்தராக, நாகார்ஜூனா தான் இருக்கிறார் என்பது தெள்ளத்தெளிவாகத் தெரிகிறது. பின்னணி இசையினை மிரட்டலாக வெளியிட்டிருந்தார், தேவிஸ்ரீ பிரசாத்.

வெளியான குபேரா கிளிம்ப்ஸ்:

இந்நிலையில் வெளியான குபேரா கிளிம்ப்ஸ் வீடியோவில் நாகார்ஜூனா தனது குடும்பத்துடன் இருப்பதுபோன்றும், நடிகர் தனுஷ் யாசகர் போலவும் காட்சியளிக்கிறார். பின் ஒரு திடீரென ஒரு மாற்றம் அடைந்து தோற்றத்தில் புதுமாப்பிள்ளை போல் மாறுகிறார். ராஷ்மிகா ஒரு மிடில் கிளாஸ் குடும்பப் பெண்ணைப்போல் இருக்கிறார். இப்படத்தின் கிளிம்ப்ஸ் தமிழ், தெலுங்கு, கன்னடம், இந்தி, மலையாளம் ஆகிய மொழிகளில் வெளியாகி ரசிகர்கள் இடையே ஒரு ஆர்வத்தைத் தூண்டியுள்ளது.