டிவி சேனல் தொடங்கும் தளபதி விஜய்..நடிகையை ஏமாற்றிய சிறுவன்,வரலட்சுமி தீபாவளி கொண்டாட்டம்! இன்றைய டாப் சினிமா செய்திகள்
டிவி சேனல் தொடங்கும் தளபதி விஜய், நடிகையை ஏமாற்றிய சிறுவன், வரலட்சுமி தீபாவளி கொண்டாட்டம், ப்ளூ சட்டை மாறனுக்கு கண்டனம் உள்பட இன்றைய டாப் சினிமா செய்திகள் எவை என்பதை பார்க்கலாம்.
தீபாவாளி கொண்டாட்டமும், விடுமுறையும் இன்றுடன் முடிவுக்கு வந்திருக்கும் நிலையில், நாளை முதல் அனைவரும் வழக்கமான பணிகளில் ஈடுபடவுள்ளனர். தீபாவளி ரிலீஸ் படங்களின் முதல் வார பாக்ஸ் ஆபிஸ் நிலவரம் தெரிவதற்கு முன் இன்றைய டாப் சினிமா செய்திகளை பார்க்கலாம்
புதிய டிவி சேனல் தொடங்கும் தளபதி விஜய்
கடந்த பிப்ரவரி மாதம் தமிழக வெற்றிக் கழகம் கட்சியை தொடங்கிய தளபதி விஜய் தனது கட்சியின் முதல் மாநாட்டை கடந்த மாதம் 27ஆம் தேதி நடத்தி முடித்தார். இதையடுத்து தனது கட்சி தொடர்பான செய்திகளை உடனுக்குடன் மக்களிடம் கொண்டு போய் சேர்ப்பதற்கு புதிய டிவி சேனலை தொடங்கவுள்ளாராம். தமிழ் ஒளி என்கிற இந்த சேனல் 24 மணி நேரம் செய்தி சேனலாக ஒளிபரப்பாகும் என கூறப்படுகிறது. விரைவில் இதுகுறித்த அதிகாரப்பூர்வ தகவலும் வெளியாகும் என தகவல்கள் தெரிவிக்கின்றன.
கதையின் நாயகனாக நடிக்கும் முத்தையா
குட்டிப்புலி, கொம்பன், மருது, விருமன் போன்ற ஹிட் படங்களை இயக்கியவர் முத்தையா. தற்போது அவரது மகனை வைத்து சுள்ளான் சேது என்ற படத்தை இயக்கி வருகிறார். இந்த படத்தை தொடர்ந்து மற்றொரு படத்தை தயாரிக்கவுள்ளார். அந்த படத்தில் முத்தையா கதையின் நாயகனாக நடிக்கவுள்ளாராம். படத்தை இயக்குவது யார் என்கிற தகவலும் தெரியவில்லை.
சிக்னலில் நிவேதா பெத்துராஜை ஏமாற்றிய சிறுவன்
சென்னை அடையாறு சிக்னலில் நின்றபோது நடிகை நிவேதா பெத்துராஜ் கையில் இருந்த பணத்தை 8 வயது சிறுவன் பறித்து சென்றுள்ளான். இதுதொடர்பாக நடிகை நிவேதா பெத்துராஜ் தனது இன்ஸ்டாகிராமில் பகிர்ந்துள்ள பதிவில், அடையார் சிக்னலில் 8 வயது சிறுவனால் ஏமாற்றப்பட்டேன். முதலில் அந்த சிறுவன் என்னிடம் பணம் கேட்டான். இலவசமாக பணம் கொடுக்க நான் மறுத்தேன். இதையடுத்து அவன் என்னிடம் ரூ.500 கேட்டான். நான் புத்தகத்தை அவனிடம் கொடுத்து ரூ.100யை மீண்டும் வாங்கினேன். இந்த வேளையில் புத்தகத்தை காருக்குள் வீசிய சிறுவன் என் கையில் இருந்த பணத்தை பறித்து கொண்டு ஓடிவிட்டான்" என குறிப்பிட்டுள்ளார். இவரது இந்த பதிவு சமூக வலைத்தளங்களில் வைரலாகியுள்ளது
தலை தீபாவளி விடியோவை பகிர்ந்த வரலட்சுமி
கடந்த சில மாதங்களுக்கு முன் நிக்கோலாய் என்பவரை காதலித்து திருமணம் செய்து கொண்டார் நடிகை வரலட்சுமி சரத்குமார். இதையடுத்து கணவருடன் தலை தீபாவளி கொண்டாடியிருக்கும் நடிகை வரலட்சுமி அந்த விடியோ விடியோவை இன்ஸ்டாவில் பகிர்ந்துள்ளார். வரலட்சுமி - நிக்கோலாய் தம்பதிக்கு வரலட்சுமியின் தந்தை சரத்குமார் - ராதிகா ஆகியோர் தீபாவளி பரிசுகளை வழங்கியுள்ளனர்.
ப்ளூசட்டை மாறனுக்கு நடிகர் கலையரசன் கண்டனம்
சிவகார்த்திகேயன் நடித்திருக்கும் அமரன் படம் பற்றி ப்ளூ சட்டை மாறன் விமர்சனத்துக்கு நடிகர் கலையரசன் கண்டனம் தெரிவித்துள்ளார். இதுதொடர்பாக அவர் தனது எக்ஸ் பக்கத்தில், "ஒரு திரைப்படத்தை விமர்சிப்பதும் அதில் தவறான கருத்து ஏதும் இருந்தால் அதை கண்டிப்பதும் அவரவர் உரிமை!
முழு வெறுப்போடு ஒருவரை விமர்சனம் எனும் பெயரில் இப்படி அருவுறுப்பாக தனிமனித தாக்குதல் செய்வதென்பது வன்மையாக கண்டிக்கத்தக்கது!" என குறிப்பிட்டுள்ளார்.
கன்னட சினிமா இயக்குநர் தூக்கிட்டு தற்கொலை
கன்னட சினிமாவின் பிரபல இயக்குநரான குருபிரசாத் தூக்கிட்டு தற்கொலை செய்து கொண்டுள்ளார். அவரது உடல் அழுகிய நிலையில் கண்டெடுக்கப்பட்டது. கடன் தொல்லையால் அவர் இறந்திருக்ககூடும் என போலீசார் தரப்பில் தெரிவிக்கப்பட்டுள்ளது. 52 வயதாகும் இவர் பெங்களுரு அருகே இருக்கும் மதநாயக் என்ற கிராமத்தில் அப்பார்மெண்டில் வசித்து வந்துள்ளார். இதையடுத்து இவர் தனது வீட்டில் தூக்கிட்டு தற்கொலை செய்துகொண்டுள்ளார். அழுகிய நிலையில் அவர் உடல் கண்டெடுக்கப்பட்டது.
கங்குவா படத்துக்கு அதிகாலை காட்சிக்கு அனுமதி
கங்குவா படத்துக்கு அதிகாலை 4 மணி ஷோவுக்கு அனுமதி அளிக்கப்பட்டுள்ளது. அண்டை மாநிலங்களான ஆந்திரா, தெலங்கானா, கேரளா, கர்நாயகாவில் அதிகாலை காட்சிக்கு அனுமதி அளிக்கப்பட்டிருக்கும் நிலையில், சூர்யா ரசிகர்கள் ஹாப்பி தகவலாக மாறியுள்ளது. தமிழ்நாட்டிலும் அதிகாலை கட்சிக்கு படத் தயாரிப்பு நிறுவனம் சார்பில் அனுமதி கோரப்பட்டுள்ளது. விரைவில் படத்தின் புதிய ட்ரெய்லர் வெளியிடப்பட இருக்கிறது.
தவெக கட்சி ஆலோசனை கூட்டத்தில் 26 தீர்மானங்கள் நிறைவேற்றம்
தவெக கட்சியின் ஆலோசனை கூட்டம் சென்னை பனையூரில் உள்ள கட்சி அலுவலகத்தில் நடைபெற்றது. இதில் கட்சியின் தலைவர் விஜய் பங்கேற்றார். இந்த ஆலோசனை கூட்டத்தில் 26 தீர்மானங்கள் நிறைவேற்றப்பட்டுள்ளன. கல்வியை மாநில பட்டியலுக்கு மாற்றுவது, ஆளுநர் பதவியை அகற்றுவது, நீட் தேர்வை ரத்து செய்வது, பரந்தூர் விமான நிலையம் அமைக்க எதிர்ப்பு ஆகியவை முக்கிய தீர்மானங்களான உள்ளன. முன்னதாக, நிர்வாகிகளுடன் தனித் தனியாக 5 நிமிடம் பேச்சு நடத்திய விஜய்யிடம் பலரும் 2026இல் தனித்து போட்டியிடுவது பற்றி தங்களது விருப்பத்தை தெரிவித்துள்ளனர். விஜய்யும் பொறுமையாக இதை கேட்டு புன்னகைத்தபடியே இருந்துள்ளார்.
ஃபேண்டஸி கதையில் மாதவன்
‘திருச்சிற்றம்பலம்’ திரைப்படத்தை இயக்கி கவனம் ஈர்த்த இயக்குநர் மித்ரன் இயக்கும் புதிய படத்தில் நடிகர் மாதவன் நடிக்கிறார். அதிர்ஷ்டசாலி' என பெயர் வைக்கப்பட்டிருக்கும் இந்த படத்தின் படப்பிடிப்பு முடிவுற்ற நிலையில், இறுதிகட்ட வேலைகள் மும்முரமாக நடைபெற்று வருகிறது. படத்தின் ஃபர்ஸ்ட் லுக் போஸ்டரை படக் குழுவினர் வெளியிட்டுள்ளனர். ஃபேண்டஸி டிராமா கதையம்சம் கொண்டு படம் உருவாகிறது.
நாளுக்கு நாள் அதிகரிக்கும் வசூல் - தெலுங்கில் லக்கி ஹீரோவான துல்கர் சல்மான்
பொருளாதார குற்றப் பின்னணி கதையைக் கொண்ட துல்கர் சல்மானின் லக்கி பாஸ்கர் திரைப்படம் மக்கள் மத்தியில் தொடர்ந்து நல்ல இமேஜைப் பெற்று வருவதால் படத்தின் வசூல் நாளுக்கு நாள் அதிகரித்துள்ளது. படம் வெளியாகி 3 நாட்கள் நிறைவடைந்த நிலையில், தெலுங்கில் 14.2 கோடி ரூபாயும், தமிழில் 1.82 கோடி ரூபாயும், இந்திய அளவில் 21.59 கோடி ரூபாயும், உலகளவில் 22.25 கோடி ரூபாய் வசூலும் பெற்றுள்ளதாக கூறப்படுகிறது. துல்கரின் நான்காவது வெற்றிப் படமாக லக்கி பாஸ்கர் அமைந்துள்ளது. இதன் மூலம் தெலுங்கில் லக்கி ஹீரோவாக மாறியுள்ளார்.
