மீண்டும் அந்தர் பல்டி.. மஞ்சள் வீரன் ஹீரோ கூல் சுரேஷ் இல்லை? டிமிக்கி கொடுத்த டைரக்டர்!

இதுதொடர்பாக அவர் வெளியிட்டுள்ள வீடியோவில், கூல் சுரேஷ் சார் ஒரு படத்தில் ஹீரோவாக நடித்து வருகிறார். அந்தப் படத்திற்கும் மஞ்சள் வீரனுக்கும் எந்தச் சம்பந்தமும் இல்லை. இதற்கு மத்தியில் பலரும் மஞ்சள் வீரன் படத்திற்கு அவர் தான் கதாநாயகன் எனக் கூறி வருகின்றனர். இதுகுறித்து பலரும் என்னிடமே வந்து விசாரிக்கின்றனர்.

கூல் சுரேஷ் சார் தற்போது ஒரு படத்தில் கதாநாயகனாக நடித்து வருகிறார். அந்தப் படத்தின் பூஜையின் போது சிறப்பு விருந்தினராக என்னை அழைத்தனர். அதன் அடிப்படையில் அந்தப் படத்தினை வாழ்த்தவே அங்கு சென்றேன். அந்த செய்திகள் தான் அப்போது செய்திகளாக வந்தன.

மழை, வெள்ளத்தால் ஹீரோவை அறிமுகப்படுத்தவில்லை

அக்டோபர் 15ம் தேதி மஞ்சள் வீரன் படத்தின் அடுத்த ஹீரோவாக யார் நடிக்கிறார் என அறிவிப்பதாக தெரிவித்திருந்தேன். அன்றைய தினம் மழை, வெள்ளம் என பல பிரச்சனைகள் இருந்ததால் என்னால் அன்றைய தினம் ஹீரோவை அறிமுகப்படுத்த முடியவில்லை. மஞ்சள் வீரன் படத்தின் கதாநாயகனை நவம்பர் இறுதி அல்லது டிசம்பர் முதல் வாரத்தில் கதாநாயகனையும் கதாநாயகியையும் அறிமுகப்படுத்துவேன். மஞ்சள் வீரன் படத்தின் கதாநாயகன் எதையும் தாங்கும் ஒரு மாவீரனாகத்தான் இருப்பார் எனக் கூறி இருந்தார்.

கூல் சுரேஷிற்கு டிமிக்கி

இந்த வீடியோவைக் கண்ட பலரும், மஞ்சள் வீரன் படத்திலிருந்து கூல் சுரேஷும் நீக்கப்பட்டு விட்டாரா எனக் கேள்வி எழுப்பி வருகின்றனர். ஏற்கனவே, மஞ்சள் வீரன் படத்திலிருந்து பிரபல யூடியூபர் டிடிஎஃப் வாசன் நீக்கப்பட்டதே பெரும் சர்ச்சையானது. இந்த அறிவிப்பை படத்தின் இயக்குநர் செல்அம் டிடிஎஃப் வாசனிடம் முதலில் கூறாமல் பத்திரிகையாளர்களிடம் கூறியதால் இரு தரப்பிற்கும் பெரும் போரே நடந்தது.

நான் ஹீரோவாக ரெடி

இந்நிலையில், கோலிவுட்டில் பேசு பொருளாக இருந்த மஞ்சள் வீரன் படத்திற்கு, கதாநாயகனாக நடிக்க விருப்பம் உள்ளதா என என்னிடம் பேசி வருகின்றனர். நான் கதாநாயகனாக நடிக்க தயாராகி விட்டேன். ஆனால், படத்தின் அறிவிப்பை இயக்குநர் செல்அம் தான் வெளியிட வேண்டும் என கூல் சுரேஷ் தெரிவித்திருந்த நிலையில், அவரை வைத்து படத்தின் பூஜைகளும் நடைபெற்றது.

குறிப்பாக படத்தின் பூஜை 15ம் தேதிக்கு முன்னதாகவே போடப்பட்டதால், பலரும் கூல் சுரேஷை மஞ்சள் வீரன் படத்தின் கதாநாயகன் என முடிவு செய்தனர்.

யாரு தான் ஹீரோ?

நிலைமை இப்படி இருக்கையில், கூல் சுரேஷ் மஞ்சள் வீரன் படத்தின் ஹீரோ இல்லை என இயக்குநர் செல்ஆம் அறிவித்துள்ளார். இதனால், டிடிஎஃப் வாசன் போல, கூல் சுரேஷிடமும் இயக்குநருக்கு கருத்து வேறுபாடு ஏற்பட்டுள்ளதா என்ற சந்தேகம் எழுந்துள்ளது.

மேலும், கோலிவுட்டை எப்போதும் பரபரப்பாக வைத்திருக்கும் மஞ்சள் வீரன் படத்தின் அடுத்த ஹீரோ யார் என்பதை அறிய இம்மாத இறுதி வரை காத்திருக்க வேண்டும் என பலரும் கூறி வருகின்றனர்.

நீக்கப்பட்ட மஞ்சள் வீரன்

முன்னதாக, டிடிஎஃப் வாசன் மஞ்சள் வீரன் திரைப்படத்தில் இருந்து நீக்கப்பட்டுள்ளார் என மஞ்சள் வீரன் படத்தின் இயக்குநர் செல் அம் அறிவித்துள்ளார். இந்த அறிவிப்பில், டிடிஎஃப் வாசனுடன் இணைந்து பணியாற்ற எண்ணினேன். ஆனால், சூழ்நிலை ஒத்துழைக்கவில்லை எனக் கூறினார். மேலும், டிடிஎஃப் வாசன் தான் சூப்பர் ஸ்டார். அவர் படத்திலிருந்து நீக்கப்பட்டாலும் அவருடனான உறவு தொடரும் எனக் கூறினார். அதுமட்டுமின்றி, வரும் அக்டோபர் 15ம் தேதி மஞ்சள் வீரன் படத்திற்கான புதிய கதாநாயகன் அறிவிக்கப்படுவார் எனவும் கூறியுள்ளார்.

தற்போது, கூல் சுரேஷ் தன் படத்தின் கதாநாயகனே இல்லை என அறிவித்துள்ளார். இதனால், இதுக்கு இல்லையா ஒரு எண்டு என மக்கள் அயர்ச்சி அடைந்துள்ளனர்.