Mayank Yadav: தனது முந்தைய சாதனையை தானே முறியடித்த லக்னோ சூப்பர் ஜென்ட்ஸ் பந்துவீச்சாளர் மயங்க் யாதவ்!
Mayank Yadav: பெங்களூரு சின்னசாமி ஸ்டேடியத்தில் நடந்த மேட்ச்சில் ஆர்சிபி அணியை 28 ரன்கள் வித்தியாசத்தில் வீழ்த்த மயங்க் யாதவ் 4 ஓவர்களில் 14 ரன்கள் கொடுத்து 3 விக்கெட்டுகளை வீழ்த்தியது முக்கியமானதாகக் கருதப்படுகிறது.
ராயல் சேலஞ்சர்ஸ் பெங்களூரு அணிக்கு எதிரான போட்டியில் லக்னோ சூப்பர் ஜெயண்ட்ஸ் அணி தொடர்ச்சியாக இரண்டாவது போட்டியில் வெற்றி பெற உதவினார் மயங்க் யாதவ். எல்.எஸ்.ஜியின் போட்டியில் பஞ்சாப் கிங்ஸுக்கு எதிராக அறிமுகமான 21 வயதான அவர், தான் ஒரே ஒரு போட்டியில் மட்டும் அசத்துபவர் அல்ல; மாறாக அனைத்து போட்டிகளிலும் கலக்குவேன் என்பதை நிரூபித்து தொடர்ச்சியாக ஆட்டநாயகன் விருதை வென்றார்.
பெங்களூரு சின்னசாமி ஸ்டேடியத்தில் எல்.எஸ்.ஜி அணி 28 ரன்கள் வித்தியாசத்தில் ஆர்சிபியை வீழ்த்தியது. செவ்வாய்க்கிழமை மணிக்கு 156.7 கிமீ வேகத்தில் பந்து வீசி தனது முந்தைய சாதனையை முறியடித்தார். முந்தைய போட்டியில் மணிக்கு 155.8 கிலோ மீட்டர் வேகத்தில் பந்துவீசி அசத்தினார்.
182 ரன்கள் எடுத்தால் வெற்றி என்ற இலக்குடன் களமிறங்கிய ஆர்சிபியின், கிளென் மேக்ஸ்வெல் (0), கேமரூன் கிரீன் (9), ரஜத் படிதார் (29) ஆகியோரின் முக்கிய விக்கெட்டுகளை வீழ்த்தினார். ஆஸ்திரேலிய ஜோடியை தனது வேகமான பந்துவீச்சு தாக்குதலால் வீழ்த்தினார், அவரது வேகத்தை அவர்கள் கையாளத் தவறிவிட்டனர்.