‘மனநிறைவாக பணியாற்றினேன்.. அரசியலை எதிர்ப்பேன்..’ அமைச்சர் பதவி பறிக்கப்பட்ட மனோ தங்கராஜ் பரபரப்பு பதிவு!
Mano Thangaraj: ‘கன்னியாகுமரி மாவட்டத்தில் மதவாத சக்திகளின் பிரிவினை அரசியலை முறியடித்து மக்களை ஒன்றுபடுத்தி மாவட்டத்தை வளர்ச்சிப்பாதையில் எடுத்துச் சென்றுள்ளேன். இப்பணிக்கு ஒத்துழைப்பு அளித்த அனைவருக்கும் நன்றி’
Mano Thangaraj: தகவல் தொழில்நுட்பத்துறை அமைச்சராக இருந்து, அதன் பின் பால்வளத்துறை அமைச்சராக நியமிக்கப்பட்ட அமைச்சர் மனோ தங்கராஜ், இன்று நடைபெறவிருக்கும் அமைச்சரவை மாற்றத்தில், பதவி பறிக்கப்பட்டுள்ளார். துறை ரீதியான செயல்பாடுகளால் அவர் பதவி பறிக்கப்பட்டுள்ளதாக ஒரு தரப்பினரும், பாஜக எதிர்ப்பு நிலைப்பாடு காரணமாக அவர் பதவி பறிக்கப்பட்டுள்ளதாக மாற்றொரு தரப்பினரும் பரஸ்பரம் குற்றம்சாட்டி வரும் நிலையில், துறை ரீதயிான தன்னுடைய செயல்பாடு குறித்து, அமைச்சர் மனோ தங்கராஜ் தன்னுடைய எக்ஸ் தளத்தில் சற்று முன் பதிவு செய்துள்ளார். அதில், தன்னுடைய தற்போதைய நிலைப்பாடு குறித்தும் விளக்கியுள்ளார். இதோ மனோ தங்கராஜ் பதிவு செய்துள்ள வார்த்தைகள்:
‘அமைச்சராக சிறப்பாக செயல்பட்டேன்’
‘‘2021 - தகவல் தொழில்நுட்பவியல் துறை அமைச்சராக பொறுப்பேற்ற போது தமிழ்நாட்டின் மென்பொருள் ஏற்றுமதி 9.5% என்றிருந்தது ஒரே ஆண்டில் 2022-ல் 16.4% மாகவும், 2023-ல் 25% மாகவும் உயர்ந்தது.
2023-ல் பால்வளத்துறை அமைச்சராக பொறுப்பேற்றபோது ஆவின் பால் கொள்முதல் நாளொன்றிற்கு 26 லட்சம் லிட்டராக இருந்தது. 2024-ல் ஆவின் வரலாற்றில் முதன் முறையாக 38 லட்சம் லிட்டராக உயர்ந்தது. விவசாய பெருங்குடி மக்கள் உற்பத்தி செய்யும் பாலுக்கு உரிய விலை கிடைப்பதையும், 10 நாட்களுக்கு ஒரு முறை பால் பணம் பட்டுவாடா செய்வதையும், பொதுமக்களுக்கு எந்தவித தட்டுப்பாடுமின்றி பால் விநியோகம் செய்யும் நிலையை உருவாக்கியதும் மன நிறைவு தருகிறது.