Top 10 News : மருத்துவர் பாலாஜி கத்திக்குத்து விவகாரம்.. மதுரை சப்பரத் திருவிழா.. டிஜிட்டல் முறையில் மது விற்பனை!

மருத்துவர் பாலாஜியின் உடல் நலம் குறித்து தொலைபேசியில் விசாரித்தார் முதலமைச்சர் மு.க.ஸ்டாலின்

சென்னை கிண்டி கலைஞர் நூற்றாண்டு உயர் சிறப்பு மருத்துவமனையில் பணியில் இருந்த மருத்துவர் பாலாஜி என்பவரை விக்னேஷ் கத்தியால் தாக்கியதில், மருத்துவர் படுகாயம் அடைந்ததை அடுத்து, அவருக்கு அங்கேயே சிகிச்சை அளிக்கப்பட்டு வருகிறது. மருத்துவரை துணை முதலமைச்சர் உதயநிதி ஸ்டாலின், மக்கள் நல்வாழ்வுத்துறை அமைச்சர் மா.சுப்பிரமணியன், அதிமுக முன்னாள் அமைச்சர்கள் உள்ளிட்டோர் நேரில் சந்தித்து ஆறுதல் தெரிவித்தனர். இந்த நிலையில் சென்னை கிண்டி அரசு மருத்துவமனையில் சிகிச்சை பெற்று வரும் மருத்துவர் பாலாஜியிடம் முதலமைச்சர் மு.க.ஸ்டாலின் தொலைபேசி வாயிலாக நலம் விசாரித்துள்ளார்.

மருத்துவர்கள் ஒரு நாள் வேலை நிறுத்தப் போராட்டம்

சென்னை கிண்டி அரசு மருத்துவமனையில் மருத்துவர் பாலாஜி தாக்கப்பட்ட சம்பவத்தை கண்டித்து, தமிழ்நாடு முழுவதும் இந்திய மருத்துவர் சங்கத்தினர் இன்று ஒரு நாள் வேலை நிறுத்தப் போராட்டத்தில் ஈடுபட்டுள்ளனர். மாநிலம் முழுவதும் 7900 மருத்துவமனைகள், 45,000 மருத்துவர்கள் இந்த போராட்டத்தில் பங்கேற்று உள்ளதாக இந்திய மருத்துவர்கள் சங்கத்தினர் தெரிவித்துள்ளனர். இதனால் புற நோயாளிகள் சிகிச்சை பிரிவு இன்று நிறுத்தப்பட்டுள்ளது. அவசர சிகிச்சை பிரிவு மட்டும் வழக்கம் போல் செயல்படுகிறது.

புரிந்து கொள்ளும் பக்குவம் தமிழிசைக்கு இல்லை

"உலகநாயகன் பட்டத்தை துறந்தது, தன்னை ஈடுபடுத்திக்கொண்ட கலைத்துறையில் முழுமை பெற்ற ஞானத்தின் வெளிப்பாடு. அது சாதித்த மனிதனின் பக்குவத்தின் வெளிப்பாடு. இதை புரிந்து கொள்ளும் பக்குவம் தமிழிசைக்கு இல்லை என்பது வருத்தத்திற்குரியது." என மநீம மாநிலச் செயலாளர் முரளி அப்பாஸ் தெரிவித்துளார்.

டிஜிட்டல் முறையில் மது விற்பனை!

இன்று முதல் காஞ்சிபுரம், செங்கல்பட்டு ஆகிய இரண்டு மாவட்டங்களில் உள்ள 220 டாஸ்மாக் கடைகளில் டிஜிட்டல் முறையில் மதுபானங்கள் விற்பனை செய்யப்படும் என்று அறிவிக்கப்பட்டுள்ளது.

சப்பரத் திருவிழா

மதுரை மாவட்டம் திருமங்கலம் அருகே டி.கல்லுப்பட்டியில் பழைய வரலாற்றை நினைவுகூரும் வகையில் 7 ஊர் சப்பரத் திருவிழா பல்லாயிரக்கணக்கான பக்தர்கள் முன்னிலையில் நடைபெற்றது.

5 ஏரிகளில் 43.58% நீரிருப்பு உள்ளது

சென்னைக்கு குடிநீர் வழங்கும் செம்பரம்பாக்கம், புழல், பூண்டி, சோழவரம், கண்ணன்கோட்டை ஆகிய 5 ஏரிகளில் 43.58% நீரிருப்பு உள்ளது. மொத்த கொள்ளளவான 11.757 டிஎம்சியில் தற்போது 5.124 டிஎம்சி மட்டுமே உள்ளது.

செம்பரம்பாக்கம் - 50.73%

புழல் - 72.76%

பூண்டி - 14.17%

சோழவரம் - 10.45%

கண்ணன்கோட்டை - 60.6%

பெண் காவலரையும் தாக்கிய நபர் கைது

சென்னை கோடம்பாக்கம் லிபர்டி பேருந்து நிறுத்தம் அருகே பெண்களிடம் தகராறு செய்ததுடன், அதை தட்டிக்கேட்ட பெண் காவலரையும் தாக்கிய மோகன்ராஜ் என்பவரை போலீசார் கைது செய்தனர்.

புதிதாக 29 திட்டப்பணிகள் தொடக்கம்: முதல்வர் மு.க.ஸ்டாலின் அடிக்கல் நாட்டினார்

சென்னை தலைமைச் செயலகத்தில், நேற்று நடைபெற்ற நிகழ்ச்சியில் தமிழக முதல்வர் மு.க.ஸ்டாலின், இந்து சமய அறநிலையத்துறை சார்பில் ரூ.190 கோடியே 40 லட்சம் மதிப்பீட்டில் 18 கோயில்களில் 25 புதிய திட்டப் பணிகள் மற்றும் 4 அலுவலகக் கட்டிடங்களுக்கு அடிக்கல் நாட்டி, ரூ.42 கோடியே 75 லட்சம் செலவில் 15 கோயில்களில் 25 முடிவுற்ற திட்டப் பணிகள் மற்றும் 2 அலுவலகக் கட்டடங்களை காணொலிக் காட்சி வாயிலாக திறந்து வைத்தார்.

சாலை விபத்தில் 2 சிறுமிகள் உயிரிழப்பு!

திருச்சி - நாமக்கல் சாலையில் தொட்டியம் அருகே உள்ள ஏழூப்பட்டி பாரதிபுரம் அருகே நடந்த இந்த விபத்து குறித்து போலீஸ் விசாரணை. திருச்சி - நாமக்கல் சாலையில் இருசக்கர வாகனத்தில் சென்ற மூன்று சிறுமிகள் பாலத்தின் மீது மோதி தூக்கி வீசப்பட்டதில் 2 சிறுமிகள் சம்பவயிடத்திலேயே உயிரிழந்தனர். மற்றொரு சிறுமி படுங்காயங்களுடன் மருத்துவமனையில் அனுமதிக்கப்பட்டுள்ளார்.

ஆசிரியர்கள் குற்றப்பின்னணி குறித்து போலீஸ் விசாரணை உரிய உத்தரவு விரைவில் பிறப்பிக்கப்படும்

கிருஷ்ணகிரியில் போலி என்சிசி முகாம் நடத்தி மாணவிகளுக்கு பாலியல் வன்கொடுமை இழைத்ததாக பதிவு செய்யப்பட்ட வழக்கின் விசாரணையை சிபிஐக்கு மாற்றக் கோரி வழக்கறிஞர் ஏ.பி.சூரிய பிரகாசம் சென்னை உயர்நீதிமன்றத்தில் மனு தாக்கல் செய்திருந்தார். இந்த வழக்கு, நீதிபதிகள் டி.கிருஷ்ணகுமார் மற்றும் பி.பி.பாலாஜி அமர்வில் மீண்டும் விசாரணைக்கு வந்தது. இதையடுத்து, அதுசம்பந்தமான உத்தரவுகளை அடுத்த விசாரணையின் போது தாக்கல் செய்யக் கூறிய நீதிபதிகள், கிருஷ்ணகிரி போலி என்சிசி முகாம் குறித்த விவகாரம் தொடர்பாக மாவட்ட சட்டப் பணிகள் ஆணைக்குழு புதிய தலைவர் அறிக்கை அளிக்க உத்தரவிட்டு விசாரணையை நவம்பர் 20ம் தேதிக்கு தள்ளிவைத்தனர்.