வெள்ளைப்படுதல் பிரச்சினை குழந்தைகளுக்கும் வருமா.. இத்தனை ஆபத்தானதா.. என்ன சொல்றீங்க டாக்டர்!

பல பெண்கள் வெள்ளைப்படுதல் (Leucorrhoea) பிரச்சினையை வெளியில் சொல்ல தயங்குகின்றனர். இதனால் தான் குழந்தை பருவத்தில் இருந்தே பிறப்புறுப்பின் சுகாதாரம் குறித்த விழிப்புணர்வை ஏற்படுத்த வேண்டிய பொறுப்பு ஒவ்வொரு தாய்க்கும் இருக்கிறது. ஏனென்றால் மறைவிடத்தில் உள்ள பிரச்சினைகளை வெளியே சொல்வதில் உள்ள தயக்கமும், சிகிச்சை எடுத்துக் கொள்வதில் உள்ள அலட்சியமும் நோய் முற்றி விட வாய்ப்பாக அமைகிறது.

வெள்ளைப்படுதல் பிரச்சினைக்கான அறிகுறிகள் எப்படி இருக்கும்?

உடல் எடை குறைதல், பிறப்புறுப்பு பகுதியில் அரிப்பு, சிவத்தல், தடித்தல், நிறமாற்றம், அடி முதுகில் வலி,முடி கொட்டுதல், சாப்பாடு, ஒவ்வாமை போன்ற பல்வேறு அம்சங்களையும் தாய்மார்கள் கவனித்து வரும் போது வெள்ளைப்படுதல் பிரச்சினைக்கு ஆரம்பத்திலேயே கண்டறிந்து தீர்வு காண முடியும்.

வெள்ளைப்படுதல் என்றால் என்ன?

பெண்களுக்கு பிறப்புறப்பு பகுதியில் மாதவிடாய் சுழற்சி ஏற்படும் இரண்டு நாட்கள் முன்பாகவும் மாதவிடாய் முடிந்த பிறகு சில தினங்களுக்கு பொதுவாக திரவம் சுரக்கிறது. இது இயல்பான விசயம் தான் . இதற்கு அச்சப்படவும் தேவையில்லை. ஆனால் தொடர்ந்து அந்த திரவம் வெளிப்படும் போதும் பிறப்புறுப்பில் அரிப்பு, சிவந்து போதல், தடிப்பு, துர்நாற்றம் என்று நீளும் போது சுகாதார பிரச்சினையாக மாறுகிறது.

‘யாருக்கெல்லாம் இந்த பாதிப்பு வரும்?

பூப்பெய்திய பெண்களுக்கு மட்டுமே உள்ள பிரச்சினை என்று பொதுவாக நினைக்கிறார்கள். உண்மையில் பூப்படையாத சிறிய குழந்தைகளுக்கு கூட அதிக அளவில் இந்த பிரச்சினை இருக்கிறது. இது குறித்த விழிப்புணர்வு இல்லாத காரணத்தால் வெளியே தெரியவில்லை. குறிப்பாக குழந்தைகளிடம் தினமும் இருமுறை உள்ளாடைகளை மாற்றும் பழக்கத்தை ஏற்படுத்திக் கொடுக்க வேண்டும். சிறுநீர் மற்றும் மலம் கழித்த பின்னர் பிறப்புறுப்பை சுத்தம் செய்யும் வழக்கத்தை பெற்றோர்கள் வலியுறுத்தி சொல்ல வேண்டும். குழந்தைகளிடம் அறிகுறிகள் பற்றி எடுத்துரைப்பது மிக அவசியம். இந்த விழிப்புணர்வை குழந்தை பருவத்திலேயே ஏற்படுத்த வேண்டும்.

வேறு எந்த மாதிரியான பிரச்சினைககள் ஏற்படுகிறது?

வெள்ளைப்படுதல் என்பது மாதவிடாய் நேரத்தில் இயல்பான விசயம் என்றாலும் கூட தொடர்ந்து நீடிக்கும் போது கிருமித்தொற்று ஏற்பட்டு நோயாக மாறுகிறது. பிறப்புறுப்பையும் தாண்டி உட்பகுதியில் உள்ள பெல்விக் பகுதியில் வீக்கம் போன்ற பிரச்சினைகளை உருவாக்குகிறது. இந்த மாதிரி நிலை உருவாகாமல் ஆரம்ப நிலையில் சரி செய்ய வேண்டும்.

இந்த பிரச்சினையை தங்கள் ஹோமியோபதி மருத்துவத்தில் எவ்வாறு சரி செய்கிறீர்கள்?

பொதுவாக ஹோமியோபதி மருத்துவத்தில் ஒவ்வொருவருக்கும் ஒவ்வொரு விதமான மருந்துகள் தேர்வு செய்து வழங்குகிறோம். பிரச்சினைகளின் அடிப்படையில் ஹோமியோபதி மருத்துவத்தில் இந்த பிரச்சினையை முற்றிலும் குணப்படுத்த முடியும். குறிப்பாக பால் மாதிரி துர்நாற்றம் இருக்கக்கூடிய வெள்ளை படுதல் பிரச்சினைக்கு கல்கேரியா கார்ப் பயன்படுத்தி சிகிச்சை தருகிறோம். பச்சை மஞ்சள் நிறத்தில் துர்நாற்றம் வீசும் வெள்ளை படுதல் குணமாக செப்பியா என்று ஒரு மருந்து உதவுகிறது. போராக்ஸ், பல்செட்லா,நேட்ரம் நியூர்,கிரியோசோட் போன்ற பல மருந்துகள் துயரரின் குறிகளுக்கு ஏற்றபடி Repertorization செய்து மருந்துகள் பயன்படுத்தப்படுகிறது. பிரச்சினைகளின் தன்மை பொறுத்து மருந்துகள் பரிந்துரைக்கப்படும். முறையாக மருத்துவரின் ஆலோசனையை பெற்று மருந்து எடுத்துக்கொள்வதால் பிரச்சினையின் பாதிப்பில் இருந்து எளிதாக வெளி வர இயலும் என்றார்.