HBD Manorama : மறக்க முடியுமா இவரை? ஜில்ஜில் ரமாமணி.. கண்ணம்மா.. கின்னஸ் நாயகி ஆச்சி மனோரமா பிறந்தநாள் இன்று!

மேடைகளில் தனது திறமையை வெளிப்படுத்திய மனோரமா 1958 ஆம் ஆண்டு கவிஞர் கண்ணதாசனின் மாலையிட்ட மங்கை' திரைப்படத்தின் மூலம் நகைச்சுவை நடிகையாக சினிமா உலகத்துக்குள் அடியெடுத்து வைத்தார். இதையடுத்து

இவர், களத்தூர் கண்ணம்மா

கொஞ்சும் குமரி

தில்லானா மோகனாம்பாள்

எதிர் நீச்சல்

பட்டிக்காடா பட்டணமா

காசேதான் கடவுளடா எனத் தொடர்ந்து பல வெற்றிப் படங்களில் நடித்துத் தமிழ் சினிமாவில் தனக்கென்று ஒரு தனி இடத்தைப் பிடித்தார்.

5 முதலமைச்சர்களுடன் நடித்த பெருமை கொண்டவர்

நகைச்சுவை, குணச்சித்திர வேடங்கள் என 1500க்கும் மேற்பட்ட திரைப்படங்களில் நடித்திருக்கிறார் மனோரமா. தமிழ்திரையுல ரசிகர்கள் இவரை ஆச்சி என்றே அன்போடு அழைக்கிறார்கள். தென்னிந்தியாவின் 5 முதலமைச்சர்களுடன் நடித்த பெருமை கொண்டவர்.

நடிகர் நாகேஷ் - மனோரமா இருவரும் ரசிகர்களை கவர்ந்து இழுக்கும் காமெடி ஜோடியாக வலம் வந்தனர். இந்த ஜோடி திரையில் தோன்றினாலே ரசிகர்களுக்கு கொண்டாட்டம் தான்.

தில்லானா மோகனாம்பாள் படத்தின் ஜில்ஜில் ரமாமணி கதாபாத்திரம், 'சம்சாரம் அது மின்சாரம்' திரைப்படத்தில் கண்ணம்மா பாத்திரம். "நடிகன்' திரைப்படத்தில் சத்யராஜை விரும்பும் பாத்திரம், 'சின்ன கவுண்டர்' திரைப்படத்தில் சுகன்யாவை வம்பிழுக்கும் பாத்திரம் என தான் நடித்த படங்களில் எல்லாம் ஆளுமையை செலுத்தியவர் மனோரமா.

கைக்குழந்தை உடன் விட்டு சென்ற கணவர்

நாடகங்களில் நடித்துக் கொண்டிருக்கும் பொழுதே, ராமநாதன் என்பவர் உடன் அவருக்கு காதல் ஏற்பட, அவரையே கல்யாணம் செய்து கொண்டார். அவருக்கு ஒரு குழந்தையும் பிறந்தது. எப்படி மனோரமாவின் அம்மா, கை குழந்தையை வைத்து இருக்கும் பொழுது, அவரது அப்பா விட்டு சென்றாரோ, அதேபோல மனோரமா கை குழந்தையை வைத்திருக்கும் பொழுது, ராமநாதன் விட்டுச் சென்று விட்டார். அவர் அப்படி விட்டுச் சென்றதற்கான காரணம் மிக மிக அபத்தமானது. அது என்னவென்றால், அந்த குழந்தை பிறந்த நேரம் அவருடைய உயிருக்கு ஆபத்து என்று ஜோதிடர் ஒருவர் சொன்னார் என்றும் அதற்காகத்தான் அவர் விட்டுச் சென்றார் என்று சொல்லப்படுகிறது.

சின்னத்தம்பி படத்தில் அவர் ஒரு விதவை கதாபாத்திரத்தில் நடித்திருப்பார். அந்த படத்தில் நடித்துக் கொண்டிருக்கும் பொழுதே, ராமநாதன் இறந்துவிட்டார். ஆனால் அவர் தனக்கும், தன்னுடைய குழந்தைக்கும் எந்தவிதத்திலும் உறுதுணையாக இருந்ததில்லை என்று சொல்லி, அவர் எந்தவித சடங்குகளையும் செய்ய மாட்டேன்; அவருக்காக நான் என்னை, எந்த விதத்திலும் மாற்றிக் கொள்ள மாட்டேன் என்று முற்போக்காக பேசினார். ஆனால், தன்னுடைய குழந்தைக்கு அப்பா என்ற காரணத்திற்காக, மட்டும் தன்னுடைய மகனை ராமநாதனுக்கு செய்ய வேண்டிய சடங்குகளை செய்ய அனுமதித்து இருக்கிறார்.

மனோரமா பிறந்தநாள் இன்று

1000க்கும் மேற்பட்ட திரைப்படங்களில் நடித்த மனோரமா உலக கின்னஸ் சாதனை புத்தகத்தில் இடம் பிடித்தார். இந்நிலையில் 2015ம் ஆண்டு அக்டோபர் 10ம் தேதி உடல் நலக்குறைவால் மறைந்தார். மனோரமாவின் பிறந்த நாளான இன்று அவர் குறித்த தகவல்களை பகிர்ந்து கொள்வதில் இந்துஸ்தான் டைம்ஸ் பெருமிதம் கொள்கிறது.