“Life Begins In 40”!பிறந்தநாளில் தனது வாழ்க்கை பயணத்தை அர்பணித்த நயன்தாரா! கோடிகளில் சம்பளம் வாங்கிய லேடி சூப்பர் ஸ்டார்

கதாநாயகர்களை கொண்டாடி ரசிகர்களை கதாநாயகிகளையும் கொண்டாட வைத்ததோடு, சினிமா தயாரிப்பாளர்களையும் ஹீரோயினை வைத்து படம் எடுத்து வெற்றி பெறலாம் என தன்னம்பிக்கையை அளித்தார்.

சினிமா பயணம்

டிவி தொகுப்பாளராக தொடங்கிய நயன்தாராவின் பயணம் இப்போது கோலிவுட்டில் லேடி சூப்பர் ஸ்டார் என்ற உயரத்தை அடைய செய்திருக்கிறது. கடவுளின் தேசம் என கூறப்படும் கேரள மண்ணில் இருந்து தமிழ் ரசிகர்களின் நெஞ்சில் குடியிருக்கும் நடிகையாக சுமார் இரண்டு தசாப்தங்களை கடந்திருக்கும் நடிகையாக நயன்தாரா உள்ளார்.

டயானா மரியம் குரியன், சினிமாவுக்காக நயன்தாராவாக மாறி தாய் மொழியான மலையாளத்தில் தான் தனது திரைபயணத்தை தொடங்கினார். தமிழில் சரத்குமார் ஜோடியாக ஐயா படத்தில் அறிமுகமான நயன், இரண்டாவது படத்திலேயே ரஜினிகாந்தின் ஜோடியாகி சந்திரமுகி படத்தில் அற்புதமான நடிப்பை வெளிப்படுத்தி பலரது புருவத்தை உயர வைத்தார்.

தமிழுக்கு பின் தெலுங்கு என தென் இந்திய பட சினிமாக்களில் நடிக்கும் ஹீரோயின்கள் சம்பிரதாயமாக செய்யும் விஷயங்களை அனைத்தையும் செய்தாலும், கவர்ச்சி, டாப் ஹீரோக்களின் மனம் கவர்ந்த நாயகி ஆகியவற்றை கடந்த இவரது கதாபாத்திர தேர்வும், நடிப்பு திறமையும் தனித்துவமாக காட்டியது.

கதாநாயகிகளை மையப்படுத்திய கதையான அறம் என்ற படத்தில் தொடங்கிய இவரது பயணம் அடுத்து மாயா, அனாமிகா, கோலமாவு கோகிலா, நெற்றிக்கண் என தொடர்ந்தது. இன்னும் தொடர்ந்து கொண்டுதான் இருக்கிறது.

தமிழ், தெலுங்கு, மலையாளம், சமீபத்தில் இந்தி ஆகிய மொழிகளில் டாப் ஹீரோக்களுடன் ஜோடி சேர்ந்து விட்ட நயன், எந்த சூழ்நிலையிலும் மார்க்கெட்டை இழக்காத நடிகையாகவே திரையுலகில் முத்திரை பதித்து வந்துள்ளார்.

கோடிகளில் சம்பளம் வாங்கும் ஹீரோயின்

சொந்த வாழ்க்கையில் இரண்டு முறை காதல் தோல்வி, அதுவும் பிரபலமான நடிகர்களிடம் என புரட்டி போடுவிதமாக அமைந்தாலும், அதிலிருந்து மீண்டு தனது சினிமா வாழ்க்கையில் வெளிக்காட்டிய அர்பணிப்பால் மேல உயர உயர பறந்தார்.

தென் இந்திய சினிமாக்களில் கோடிகளில் சம்பளம் வாங்கிய ஹீரோயினாக உருவெடுத்த நயன்தாரா, நடிப்பு தவிர திரைப்பட தயாரிப்பிலும் ஈடுபட்டு வருகிறார். அத்துடன் சமூக நோக்கத்துடன் பல்வேறு தொண்டு நடவடிக்கைகளில் ஈடுபட்டு வரும் நடிகையாக இருக்கும் சினிமா கலைஞர்களில் தேவைப்படுவோருக்கு உதவி செய்யும் முதல் ஆளாகவே இருந்து வருகிறார்.

முதல் லேடி சூப்பர்

பொதுவாக லேடி சூப்பர் ஸ்டார் என தெலுங்கு சினிமாவை சேர்ந்த விஜயசாந்தியை கூறுவார்கள். ஹீரோவுக்கு இணையாக ஆக்‌ஷன் அதிரடி படங்களில் மிரட்டலான நடிப்பை வெளிப்படுத்தி வந்த அவருக்கு இந்த பெயர் வைக்கப்பட்டது. ஆனால் தனது அற்புத ஆக்டிங் மூலம் ரசிகர்களின் மனதை கவர்ந்தவராக திகழ்ந்த நயன்தாரா, தமிழ் சினிமாவின் முதல் லேடி சூப்பர் ஸ்டாராக உருவெடுத்தார்.

கலைமாமணி விருது, சிறந்த நடிகைக்கான தமிழ்நாடு அரசின் விருது, நந்தி விருது, சைமா மற்றும் பிலிம் பேர் விருது உள்பட ஏராளமான விருதுகளை வென்ற நடிகையாக இருக்கும் நயன்தாரா, 2018ஆம் ஆண்டில் போர்ஸ் இதழில் இடம்பிடித்த டாப் 100 லிஸ்டில் இடம்பிடித்த ஒரே தென்னிந்திய நடிகை என்ற பெருமையும் பெற்றார்.

மங்காத்தா படத்தில், "Life Begins In 40" என்று அஜித் பேசும் வசனம் மிகவும் பிரபலம். அந்த வகையில் கோலிவுட் சினிமாவின் பெருமையாக இருந்து வரும் நயன்தாரா இன்று தனது 40வது பிறந்தநாளை கொண்டாடுகிறார். அதன்படி 40 வயதுக்கு முன்னரே உலகம் கொண்டாடும் தமிழ் நடிகைகளுள் ஒருவராக தன்னை நிலை நிறுத்தி கொண்டிருக்கும் நயன்தாராவின் வாழ்க்கை சினிமாவில் சாதிக்க நினைக்கும் இளம் பெண்களுக்கு சிறப்பான வாழ்க்கை பாடமாக உள்ளது.

இந்த பிறந்தநாளில் ரசிகர்களுக்கு ட்ரீட்டாக, நடிகை முதல் தாயாக ஆகி இருப்பது வரையிலான தனது வாழ்க்கை பயணத்தை கூறும் நயன்தாரா பியாண்ட் தி ஃபேரிடேல் டாக்குமென்டரியை அர்பணித்துள்ளார்.