உள்ளுக்குள்ளே அடிச்சுக்கும் சன் டிவி.. கொஞ்சம் நிம்மதியான விஜய் டிவி.. டாப் 10 சீரியல் எது தெரியுமா?

மேலும் ஒவ்வொரு சீரியலும் அதன் கதை, கதாபாத்திரங்களின் அமைப்பு, நடிகர்களின் நடிப்புத் திறன் ஆகியவற்றால் மட்டுமே சிறப்பு பெறுகின்றன. இவை அனைத்தும் சரியாக இருந்து ஒரு நேர்த்தியான படைப்பாக இருந்தால் மட்டுமே மக்களால் அதிகம் விரும்பப்படுகிறது.

தமிழ் சீயல்களுக்கான சேனல்களை பொறுத்த வரை, சன் டிவி, ஜீ தமிழ், விஜய் டிவி ஆகிய சேனல்கள் முன்னணி வகிக்கின்றன. இதில் ஓடும் பிரைம் டைம் சீரியல்களே அதிகம் பேரால் பார்க்கப்படுகிறது.

ஒவ்வொரு வாரமும் டிவி சீரியல்கள் எந்த அளவுக்கு ஓடியுள்ளது என டி.ஆர்.பி ரேட்டிங் வெளியாகும். கடந்த வாரம் தமிழ் தொலைக்காட்சிகளில் ஒளிபரப்பப்பட்ட சீரியல் மக்கள் மத்தியில் பெற்ற வரவேற்புகளின் அடிப்படையில் டிஆர்பி புள்ளிப் பட்டியல் வெளியாகியுள்ளது. அதன் அடிப்படையில், முதல் 10 இடங்களைப் பெற்ற சீரியல்களைப் பற்றி இங்கு பார்ப்போம்.

முதல் இடத்தை தொடர்ந்து தக்கவைத்திருக்கும் கயல்

சன் தொலைக்காட்சியில் இரவு 7.30 மணிக்கு ஒளிபரப்பாகிறது. தந்தையை இழந்து குடும்பத்தின் மொத்த பொறுப்புகளையும் தூக்கி சுமக்கும் மகளாக கயல் என்னும் இளம் பெண் இருக்கிறார்.

அவர் செய்யும் செயல்களுக்குப் பல்வேறு தடைகள் எழுகின்றன. அதை எல்லாம் சமாளித்து பிரச்னைகளை முறியடிக்கிறார், கயல் என்பதே கதை. நீண்ட நாட்களாக எதிர்பார்த்து காத்திருந்த, கயல், எழில் திருமணம் தற்போது நடந்துவிட்டது. கடந்த வாரம் போலவே, கயல் சீரியல் தான் டிஆர்பி ரேட்டிங்கில் 10.33 புள்ளிகள் பெற்று முதலிடம் பெற்றுள்ளது.

மூன்று முடிச்சு

சன் தொலைக்காட்சியில் இரவு 8.30 மணிக்கு நந்தன் சி.முத்தையா இயக்கத்திலும், அ.அன்பு ராஜா , அ.சுரேஷ் பாபு தயாரிப்பில் ஒளிபரப்பாகி வரும் புதிய சீரியல் ’மூன்று முடிச்சு. இந்த வாரம், 9.74 புள்ளிகளைப் பெற்று இரண்டாம் இடம் பிடித்துள்ளது.

இந்த சீரியலில் கதையின் நாயகன், தன் திருமண நாளில் சடாரென கல்யாணத்தை நிறுத்திவிட்டு தான் நேசித்த கிராமத்துப் பெண்ணின் கழுத்தில் தாலியைக் கட்டிவிட்டார். அடுத்தடுத்து டிவிஸ்ட் தரும் மூன்று முடிச்சு சீரியலின் கதை, பல ரசிகர்களைக் கடந்த வாரம் ஈர்த்திருக்கிறது.

மருமகள்

'மருமகள்' என்ற சீரியல் சன் தொலைக்காட்சியில் இரவு 8 மணிக்கு ஒளிபரப்பாகி வருகிறது. கேப்ரியல்லா ஆதிரை என்னும் கதையின் நாயகியாக நடிக்கிறார். இவர் கஞ்சமாக இருக்கும் நாயகனை பல சிக்கல்களுக்கு மத்தியில் எவ்வாறு கைப்பிடிக்கிறார் என்பதே கதை. இந்த மருமகள் சீரியல் இந்த வாரம் 5ம் இடத்திலிருந்து 3ம் இடத்திற்கு 9.17 என்ற புள்ளிகளுடன் மளமளவென முன்னேறி உள்ளது.

சிங்கப்பெண்ணே

கிராமத்தில் மகிழ்ச்சியாக இருந்த இளம்பெண் ஆனந்தி, குடும்ப கஷ்டத்தைப் போக்க சென்னை வருகிறாள். வேலைக்கு வந்த ஒரு பெண்ணின் கதை என்னவாகிறது என்பதே சிங்கப்பெண்ணே கதை. சமீபத்தில் தொடங்கிய இந்த தொடர் சன் தொலைக்காட்சியில் இரவு 9 மணிக்கு வெற்றிகரமாக ஒளிபரப்பாகி வருகிறது. இந்த வாரம் டி.ஆர்.பி. ரேட்டிங்கில் 9.05 புள்ளிகளைப் பெற்று 3ம் இடத்திலிருந்து 4ம் இடத்திற்கு தள்ளப்பட்டுள்ளது.

சுந்தரி

சன் தொலைக்காட்சியில் திங்கள் முதல் சனிக்கிழமை வரை இரவு 7 மணிக்கு ஒளிபரப்பாகும் சீரியல், சுந்தரி. டிஆர்பி ரேட்டிங்கில் 8.63 புள்ளிகளைப் பெற்று கடந்த வாரம் போலவே இந்த வாரமும் 5ம் இடத்தை தக்க வைத்துள்ளது.

மாவட்ட ஆட்சியராக இருக்கும் சுந்தரி, ஆதரவற்ற சிறுமியின் மாற்றந்தாயாக இருந்து பல்வேறு பிரச்னைகளை எதிர்கொள்வது ரசிகர்களைக் கவர்ந்து உள்ளது.

ராமாயணம்

புராணக் கதையான ராமயணத்தை நெடுஞ்தொடராக மாலை 6.30 மணிக்கு வெளியிட்டு வருகிறது சன் டிவி. இந்தி சீரியலின் டப்பிங்காக இருந்தாலும் இது 7.94 புள்ளிகள் பெற்று தொடர்ந்து 6ம் இடத்தில் உள்ளது.

சிறகடிக்க ஆசை

விஜய் டிவியில் இரவு 9 மணிக்கு ஒளிபரப்பாகும் சிறகடிக்க ஆசை சீரியல், டிஆர்பியில் 6.37 புள்ளிகள் பெற்று இந்த வாரம் 8ம் இடத்திலிருந்து ஒருபடி முன்னேறி 7ம் இடத்தைப் பெற்றுள்ளது.

ஏழைக் குடும்பத்தில் இருந்து வந்ததால், தன் மருமகளை மோசமாக நடத்தி வரும் மாமியாரை சமாளித்து எப்படி கணவனும் மனைவியும் முன்னேறுகின்றனர் என்பதே கதையாக உள்ளது.

ரஞ்சனி

சன் டிவியில் சில நாட்களுக்கு முன் தொடங்கப்பட்ட ரஞ்சனி சீரியல் பரபரப்பான கதைக் களத்துடன் செல்வதால் மக்களுக்கு விருப்பமான சீரியலாக மாறியுள்ளது. இந்த சீரியல் வெளியான புதிதிலே டிஆர்பி பட்டியலில் 7 இடத்தை பெற்ற நிலையில், தற்போது 6.33 புள்ளிகள் பெற்று பட்டியலில் இருந்து ஒரு இடம் பின்னுக்கு சென்றுள்ளது.

கார்த்திகை தீபம்

ஜீ தமிழில் வெற்றிகரமாக முடிந்த கார்த்திகை தீபம் சீரியல், தற்போது புதுக் கதைக்களத்துடன் ஒளிபரப்பாகி வருகிறது. இந்த சீரியலும் மக்களுக்கு பிடித்த வகையில் சென்று கொண்டிருப்பதால் 6.21 புள்ளிகள் பெற்று கடந்த வாரம் போலவே 9ம் இடத்தில் உள்ளது.

பாண்டியன் ஸ்டோர்ஸ் 2

கடந்த வாரம் 10 இடத்தைப் பிடித்த ஜீ தமிழின் சந்தியா ராகம் தொடரைப் பின்னுக்குத் தள்ளி டிஆர்பி புள்ளி பட்டியலில் 10ம் இடத்தை பிடித்துள்ளது விஜய் டிவியின் பாண்டியன் ஸ்டோர்ஸ் சீரியல். இது 5.84 புள்ளிகளை பெற்று 10ம் இடத்திற்கு முன்னேறியுள்ளது.