இந்தியாவின் முதல் சூப்பர் ஹீரோ மீண்டும் வருகிறார்..90ஸ் கிட்ஸ்களின் பேவரிட் சக்திமான் கம்பேக் - வைரலாகும் புதிய டீஸர்
இந்தியாவின் முதல் சூப்பர் ஹீரோ மீண்டும் வருகிறார் என குறிப்பிட்டு, 90ஸ் கிட்ஸ்களின் பேவரிட் டிவி சிரீயலான சக்திமான் கம்பேக் குறித்து தனது இன்ஸ்டாவில் அறிவித்துள்ளார் சக்திமான் கதாபாத்திரத்தில் நடித்த நடிகர் முகேஷ் கன்னா.
ஸ்பைடர் மேன், அயர்ன் மேன், பேட் மேன் போன்ற சூப்பர் ஹீரோக்களுக்கு முன்னோடியாக இந்திய ரசிகர்களின் மனதில் நின்றவர் சக்திமான். 90ஸ் கிட்ஸ்களால் பெரிதும் கொண்டாடப்பட்ட சக்திமான், சிறியவர்கள், பெரியவர்கள் என அனைவரையும் வெகுவாக கவர்ந்த சூப்பர் ஹீரோ சீரியலாக அமைந்திருந்தது. ஞாயிற்றுகிழமை என்றாலே, அந்த நாள் சக்திமான் சீரியலை பார்க்காமல் நிறைவு பெறாது. அந்த அளவில் கொண்டாடப்பட்ட இந்த சீரியல் தற்போது மீண்டும் புத்தம் புது வடிவத்தில் வர இருக்கிறது.
இந்தியாவின் முதல் சூப்பர் ஹீரோ மீண்டும் வருகிறார்
சக்திமான் கேரக்டரில் நடித்த பாலிவுட் நடிகரான முகேஷ் கன்னா தனது இன்ஸ்டாவில் பகிர்ந்த பதிவில், "சக்திமான் திரும்ப வரும் நேரம் இது.
நமது முதல் இந்திய சூப்பர் டீச்சர்- சூப்பர் ஹீரோ. ஆம் ! இன்றைய குழந்தைகள் மீது இருளும் தீமையும் மேலோங்கி வருவதால், அவர் திரும்பும் நேரம் இது அமைகிறது.
அவர் ஒரு செய்தியுடன், போதனையுடன் திரும்புகிறார். இன்றைய தலைமுறையினருக்காக இரு கைகளால் அவரை வரவேற்கிறோம். டீசரை இப்போது பாருங்கள்" என்று குறிப்பிட்டு டீஸர் விடியோவையும் பகிர்ந்துள்ளார்.
விடியோவில் ஒரு பள்ளிக்குள் தனது ஸ்டைலில் சுழன்றவாறே வரும் சக்திமான், சுதந்திர போராட்ட தியாகிகளான சந்திரசேகர் அசாத், பகத் சிங், சுபாஷ் சந்திரபோஸ் ஆகியோரை பார்த்து பாடல் பாடுகிறார்.
ரசிகர்கள் கொண்டாட்டம்
சக்திமான் கம்பேக் குறித்து இந்த அறிவிப்பு வெளியான சில மணி நேரத்தில் இது ட்ரெண்டானது. "எனது குழந்தை பருவ ஹீரோ", "சக்திமானை மீண்டும் பார்க்க ஆர்வமாக இருக்கிறோம்", "இந்த தொடர் எனது எனது சிறுவயது இனிமையான நினைவலைகளை கொண்டிருக்கிறது", "மிகவும் பவர்ஃபுல்லான சூப்பர் ஹீரோ" என பலரும் தங்களது கருத்துகளை பகிர்ந்து வருகிறார்கள்.
தற்போது சக்திமான் கம்பேக் குறித்த அறிவிப்பு மட்டும் வெளியிடப்பட்டிருக்கும் நிலையில், எப்போது, எந்த டிவியில் அல்லது ஓடிடியில் வெளியாகிறது. வெப்சீரிஸ் ஆக வருகிறதா அல்லது நெடுந்தொடராக வருகிறதா, யாரெல்லாம் நடிகர், நடிகைகள் என்பன குறித்த தகவல் எதுவும் தெரிவிக்கவில்லை.
சக்திமான் சூப்பர் ஹீரோ சீரியல்
இந்தியா முழுவதும் அனைத்து வயதினரையும் விரும்பி பார்க்க வைத்த சீரியலான சக்திமான், தூர்தர்ஷன் டிவியில் 1997 முதல் ஒளிபரப்பானது. வாரந்தோறும் ஞாயிற்றுக்கிழமை மட்டும், சுமார் 450 எபிசோடுகளுக்கு மேல் 8 ஆண்டு காலம் வரை தொடரானது ஒளிபரப்பானது.
சக்திமான் கதாபாத்திரம் சூப்பர் ஹீரோவாக, மாய மற்றும் இயற்கைக்கு அப்பாற்பட்ட சக்திகளை கொண்டிருப்பதாகவும், துறவிகள் உருவாக்கப்பட்டும் பூமியில் நிலவும் தீமைக்கு எதிராக போராடும் விதமாக அமைந்திருக்கும்.
சக்திமான் சீரியலை தொடர்ந்து, அதேபோல் ஏராளமான சூப்பர் ஹீரோ சீரியல்கள் பல்வேறு மொழிகளில் வெளியானபோதிலும், அவை சக்திமான அளவில் கொண்டாடப்படவில்லை.
சக்திமான் சீரியல் வந்த புதிதில், அந்த கேரக்டர் அணியும் மெரூன் நிறத்திலான வெல்வட் துணியுடன் கூடிய டிர்ஸ் மிகவும் பிரபலமாக இருந்தது. பெற்றார்கள் இந்த ஆடையை தங்கள் வீட்டு பிள்ளைகளுக்கு வாங்கி அணிவித்து மகிழ்வித்தார்கள். இதையடுத்து தற்போது அந்த விண்டேஜ் உடையுடன் சக்திமானின் புதிய டீஸர் ஆர்வத்தையும், குறிப்பாக 90ஸ் கிட்ஸ்களுக்கு மத்தியில் மிகப் பெரிய எதிர்பார்ப்பை ஏற்படுத்தியுள்ளது.
