ஒப்பந்தத்தில் மீறல்..ரூ. 2 கோடி பாக்கி தொகை நிலுவை..பிசாசு 2 வெளியிட இடைக்கால தடை

பிசாசு 2 பட ரிலீசுக்கு எதிராக மனு

பிளையிங் ஹார்ஸ் பிக்சர்ஸ் நிறுவனம் தயாரித்த இரண்டாம் குத்து திரைப்பட விநியோக உரிமையை பெற்ற ராக்ஃபோர்ட் என்டர்டைன்மென்ட், ஒப்பந்தப்படி செலுத்த வேண்டிய பணத்தில், ரூ. 2 கோடியை நிலுவையில் வைத்துள்ளதாக கூறப்படுகிறது.

இந்த தொகையை திருப்பி கொடுக்காமல் குருதி ஆட்டம், மன்மத லீலை ஆகிய படங்களை ராக்போர்ட் என்டர்டைன்மென்ட் நிறுவனம் தயாரித்தது வெளியிட்டதாக குற்றம்சாட்டப்பட்டுள்ளது. இந்த படங்களுக்கு தடை விதிக்க கோரிய வழக்கை விசாரித்த சென்னை உயர்நீதிமன்றம், மத்தியஸ்தரை நியமித்தது. அதன் அடிப்படையில், மத்தியஸ்தர் விசாரணையின் பேரில், ரூ. 1 கோடியே 17 லட்சத்து 15 ஆயிரத்து 552 மற்றும் ஜிஎஸ்டி முறையில் ரூ. 31 லட்சத்து 20 ஆயிரம் வழங்க ராக்போர்ட் என்டர்டைன்மெண்ட் நிறுவனத்துக்கு உத்தரவிடப்பட்டது.

இந்த உத்தரவை கடைபிடிக்காமல் ராக்போர்ட் என்டர்டைன்மென்ட் நிறுவனம் சார்பாக பிசாசு 2 திரைப்படம் தயாரிக்கப்பட்டது. இதனால், பிசாசு 2 படத்தை வெளியிட தடை விதிக்க வேண்டுமென சென்னை உயர்நீதிமன்றத்தில் மனு தாக்கல் செய்யப்பட்டது.

இடைக்கால தடை

இந்த வழக்கை விசாரித்த சென்னை உயர் நீதிமன்றம், பிசாசு 2 திரைப்படத்தை வெளியிட இடைக்கால தடை விதித்து உத்தரவிட்டது. அத்துடன் நவம்பர் 18ஆம் தேதிக்குள் இந்த மனுவுக்கு ராக்போர்ட் என்டர்டைன்மென்ட் பதிலளிக்க வேண்டுமென உத்தரவிட்டது.

பிசாசு 2 திரைப்படம்

பிசாசு திரைப்படத்தின் வெற்றியைத் தொடர்ந்து தற்போது மிஷ்கின் இயக்கத்தில் உருவாக்கி இருக்கும் திரைப்படம் , ’ பிசாசு 2. ஆண்ட்ரியா முன்னணி கதாபாத்திரத்தில் நடித்துள்ள இந்த படத்தில் சந்தோஷ் பிரதாப், பூர்ணா, நமீதா கிருஷ்ணமூர்த்தி ஆகியோர் படத்தில் முக்கிய வேடங்களில் நடித்துள்ளனர். அதேபோல் விஜய் சேதுபதி சிறப்பு வேடத்தில் நடித்துள்ளார்.

ரசிகர்கள் மத்தியில் எதிர்பார்ப்பை ஏற்படுத்தியிருந்த இந்த படத்தின் டீஸர் கடந்த இரு ஆண்டுகளுக்கு முன்னரே வெளியாகி வரவேற்பை பெற்றது. படத்துக்கு கார்த்திக் ராஜா இசையமைத்துள்ளார். படத்தின் பணிகள் அனைத்தும் முடிந்தபோதிலும் ரிலீஸுக்கு தாமதமாகி வருகிறது.

நிர்வாணமாக நடித்த ஆண்ட்ரியா

பிசாசு 2 படத்தில் 15 நிமிட காட்சியில் நடிகை ஆண்ட்ரியா நிர்வணமாக நடித்துள்ளாராம். இதற்காக இயக்குநர் தன்னை கட்டாயப்படுத்தியதாக ஆண்ட்ரியா தெரிவித்து இருந்தார். இதுபற்றி ஆண்ட்ரியா பேட்டி ஒன்றில், "ஆரம்பத்தில் படத்தின் கதையை கேட்ட போது , ஆடையின்றி 15 நிமிடம் நடிக்க வேண்டும் என இயக்குநர் மிஷ்கின் கூறியதால் , நான் நடிக்க முடியாது என கூறிவிட்டேன். இருப்பினும் என்னை அதில் நடிக்குமாறு வற்புறுத்தினார்கள் . நானும் யோசித்துப் பார்த்தேன் , கதை தரமாக இருந்த காரணத்தினால், நடிக்க ஒப்புக் கொண்டேன்" என்றார்.

ஆண்ட்ரியா நிர்வான காட்சி தொடர்பாக போஸ்டர் ஒன்றும் வெளியிடப்பட்ட நிலையில் சமூக வலைத்தளங்களில் அது வைரலானது. ரசிகர்கள் மத்தியில் எதிர்பார்ப்பை ஏற்படுத்தியிருக்கும் படங்களில் ஒன்றாக பிசாசு 2 இருந்து வருகிறது.