Game Changer: பிரமாண்ட இயக்குநர் ஷங்கர் இயக்கும் ‘கேம் சேஞ்சர்’ ரிலீஸ் தேதி ஒத்திவைப்பு; அமீர்கானின் படத்துடன் மோதலா?

கார்த்திக் சுப்புராஜ் கதையை இயக்கிய பிரமாண்ட இயக்குநர் ஷங்கர்:

கார்த்திக் சுப்புராஜ் கதையை இயக்குநர் ஷங்கர் இயக்கி சிரஞ்சீவியின் மகன் ராம்சரண் மற்றும் கியாரா அத்வானி ஆகியோர் முன்னணியில் நடிக்கும் கேம் சேஞ்சர் திரைப்படம் விறுவிறுப்பாக நடைபெற்று வருகிறது. இதில் எஸ்.ஜே.சூர்யா, அஞ்சலி, ஜெயராம், நவீன் சந்திரா, சுனில், ஸ்ரீகாந்த், சமுத்திரக்கனி மற்றும் நாசர் ஆகியோரும் நடித்துள்ளனர். 

இப்படம் மூலம் இயக்குநர் ஷங்கர் நேரடியாக முதல் தெலுங்கு படத்தை இயக்குகிறார். இப்படத்தை தெலுங்கின் முன்னணி தயாரிப்பாளரான தில் ராஜு மற்றும் சிரிஷ் ஆகியோர் தயாரிக்கின்றனர். தமன் இசையமைக்கிறார். ‘கேம் சேஞ்சர் படத்திலிருந்து சமீபத்தில் ஜருகண்டி என்ற முதல் தனிப்பாடல் வெளியிடப்பட்டது. இது கலவையான விமர்சனத்தைத் தந்தது. 

கசிந்த படப்பிடிப்பு வீடியோக்கள்:

இப்படத்தின் படப்பிடிப்பு ஹைதராபாத், சென்னை மற்றும் விசாகப்பட்டினம் ஆகிய இடங்களில் படமாக்கப்பட்டது. ராம் சரணும் கியாரா அத்வானியும் விசாகப்பட்டினத்தில் படப்பிடிப்பு நடத்தியபோது, அவர்களின் தோற்றப் படங்கள் மற்றும் வீடியோக்கள் ஆன்லைனில் கசிந்தன. ராம்சரணும், கியாரா அத்வானியையும் வைத்து பொதுவெளியில் படப்பிடிப்பு நடத்தும்போது அவர்களைச் சூழ்ந்த பெரும் மக்கள் கூட்டத்தைக் கட்டுப்படுத்துவது தயாரிப்பு குழுவுக்கு கடினமாகிவிட்டது. 

அதுமட்டுமின்றி, படத்தை வெளியில் படமாக்கும்போதெல்லாம் அப்படத்தின் காட்சிகளில் சில லீக் ஆகின. அதில் ஒரு லீக் ஆன வீடியோவில் ராம்சரண் ஒரு போக்குவரத்து போலீஸ்காரருடன் பேசுவதைப்போன்ற காட்சி படமாக்கப்பட்டுக் கொண்டிருந்ததுபோல் தெரிகிறது. 

ஆர்.ஆர்.ஆர்-க்குப் பின் ராம்சரண் நடிக்கும் படம்:

சமீபத்தில் கமல்ஹாசன், சித்தார்த், ரகுல் ப்ரீத் சிங் நடிப்பில் வெளியான இந்தியன் 2 படம் கலவையான விமர்சனங்களைப் பெற்றது. எஸ்.எஸ்.ராஜமௌலியின் ஆர்.ஆர்.ஆர் படத்திற்குப் பின், ராம் சரணின் அடுத்த படமாக கேம் சேஞ்சர் இருப்பதால், இதன் மீது அதிக எதிர்பார்ப்பு எகிறியுள்ளது. இதனைத் தொடர்ந்து ராம்சரண் இயக்குநர் புச்சி பாபு மற்றும் சுகுமார் ஆகியோருடன் அடுத்தடுத்த படங்களில் நடிக்கவுள்ளார். 

தாமதமான கேம் சேஞ்சர்:

’கேம் சேஞ்சர்’ படம் முதலில் தசரா விழாவின்போது வெளியிடப்படலாம் எனத் திட்டமிடப்பட்டது. ஆனால், படத்தின் ஒத்திவைக்கப்பட்ட செய்தியை ஸ்ரீ வெங்கடேஸ்வரா கிரியேஷன்ஸின் தயாரிப்பாளர் தில் ராஜு சமீபத்தில் ஹைதராபாத்தில் நடந்த நிகழ்ச்சியின் போது உறுதிப்படுத்தியுள்ளார். கேம் சேஞ்சர் படத்தின் அப்டேட்களை எதிர்பார்த்து காத்திருந்த ரசிகர்களின் கரவொலிக்கு மத்தியில், தில் ராஜு, “கேம் சேஞ்சர்? கிறிஸ்துமஸ் சமயத்தில் சந்திப்போம்”என்று கூறினார். 

தனுஷின் ’ராயன்’ படத்தின் தெலுங்கு வெளியீட்டுக்கு முந்தைய நிகழ்வின்போது தில் ராஜூ, இந்த தகவலைப் பகிர்ந்துகொண்டார். 

பெரிய படத்துடன் மோதும் கேம் சேஞ்சர்:

’’கேம் சேஞ்சர்’’ திரைப்படம் கிறிஸ்துமஸ்ஸில் ரிலீஸாகவுள்ள நிலையில்,கேம் சேஞ்சருடன், அமீர் கானின் சிதாரே ஜமீன் பர் மற்றும் ஹாலிவுட்டின் முஃபாசா: தி லயன் கிங் உள்ளிட்ட பல படங்கள் ரிலீஸாக திட்டமிடப்பட்டுள்ளன. வருண் தவானின் பேபி ஜானும் அந்த வரிசையில் உள்ளது.