ஏஆர் ரகுமானிற்கு கிடைத்த மற்றொரு மகுடம்! ஆடு ஜீவிதம் படத்திற்கான சர்வதேச விருது!

ஹாலிவுட் மியூசிக் இன் மீடியா விருது

ஹாலிவுட் மியூசிக் இன் மீடியா விருதுகள் (HMMA) நவம்பர் 21, வியாழன் அன்று திரைப்படம் மற்றும் அனைத்து இசை மீடியா வகைகளுக்கான வெற்றியாளர்களை அறிவித்தது. ஹான்ஸ் ஜிம்மர் மற்றும் எமிலியா பெரெஸ் ஆகியோர் தலா மூன்று விருதுகளை வென்றனர். வைல்ட் ரோபோவும் இரண்டு விருதுகளைப் பெற்றுள்ளது.

ஆடு ஜீவிதம் 

ஆடுஜீவிதம், தி கோட் லைஃப் என்பது 2024 ஆம் ஆண்டு வெளியான மலையாளத் திரைப்படம் ஆகும். மலையாளத் திரைப்பட இயக்குநர் பிளெஸ்ஸி திரைக்கதை எழுதியதுடன், இணைந்து தயாரித்துள்ளார். இப்படத்தில் அரபு மற்றும் மலையாளம் ஆகிய இரு மொழிகளிலும் படத்தின் கதாபாத்திரங்கள் பேசியிருப்பார்கள். இப்படம் கடந்த 2008 ஆம் ஆண்டு ஆடு ஜீவிதம் என்ற பெயரில் எழுத்தாளார் பென்யாமின் எழுதிய மலையாள நாவலின் கதையை தழுவி எடுக்கப்பட்ட படமாகும். மேலும் இது உண்மைக் கதையை அடிப்படையாகக் கொண்டது.

 இப்படத்தில் பிரித்விராஜ் சுகுமாரன் கதாநாயகனாகவும், அமலா பால் காதநாயாகியாகவும் நடித்து இருந்தனர். இதன் கதை சவூதி அரேபியாவில் தனது விருப்பத்திற்கு மாறாக ஆடு மேய்க்கும் வேலையில் அமர்த்தப்பட்ட ஒரு புலம்பெயர்ந்த மலையாளத் தொழிலாளியைப் பற்றிய கதையாகும். இப்படத்தினை இயக்கிய பிளெஸ்சி இந்த ஆடு ஜீவிதம் புத்தகத்தை படித்த உடனே படமாக எடுக்க நினைத்து இருந்தார். அதே ஆண்டில் நடிகர் பிருத்திவிராஜ் இப்படத்தில் நடிக்கவும் சம்மதம் தெரிவித்து இருந்தார். இருப்பினும் இப்படத்தின் அதிகமான செலவுகள் படம் எடுப்பது தள்ளிப்போனது.   இறுதியாக கடந்த 2015  ஆம் ஆண்டு முதல் இப்படம் இயக்கப்பட்டு வந்தது.  ஜிம்மி ஜீன்-லூயிஸ் மற்றும் ஸ்டீவன் ஆடம்ஸ் ஆகியோரும் பிளெஸ்ஸியுடன் தயாரிப்பாளராக இணைந்தனர். படத்தின் அசல் இசை மற்றும் பாடல்களை ஏ. ஆர். ரகுமான் இசையமைத்துள்ளார்.

ஏ. ஆர். ரகுமான் மகிழ்ச்சி 

இந்த விருதிற்கு நன்றி தெரிவித்து ஏ. ஆர். ரகுமான் வீடியோ ஒன்றை வெளியீட்டுள்ளார். அந்த வீடியோவில் "இந்த விருதைப் பெறுவது நம்பமுடியாத மரியாதை. மீடியா விருதுகளில் ஹாலிவுட் இசைக்கு நான் மிகவும் நன்றியுள்ளவனாக இருக்கிறேன். இந்த சமயத்தில் இந்த படத்தில் என்னுடன் பணியாற்றிய இசை கலைஞர்களுக்கும், படக்குழுவினருக்கும் நன்றியை தெரிவித்து கொள்கிறேன். இயக்குனர் பிளெஸ்ஸிக்கும் நன்றி. எனது ரசிகர்களுக்கும் மனமார்ந்த நன்றி. எல்லாப் புகழும் இறைவனுக்கே" என்று தெரிவித்தார். 

இந்தியா மட்டும் அல்லாது உலகம் முழுவதும் உள்ள ஏ. ஆர். ரகுமானின் ரசிகர்கள் அவருக்கு வாழ்த்து தெரிவித்து வருகின்றனர். மேலும் பல திரையுலக பிரபலங்களும் ராகுமானை வாழ்த்தி சமூக வலைத்தளங்களில் பதிவுகளை போட்டு வருகின்றனர். மனைவியை விட்டு பிரிவதாக சோகத்தில் இருந்த ராகுமானிற்கு இந்த விருது சற்று ஆறுதல் அளிக்கும் என நெட்டிசன்கள் தெரிவித்து வருகின்றனர்.