அமரன் படம் எப்படி இருக்கு? திரைக்கதை, இயக்கம், நடிப்பு எல்லாமே அருமை.. முதல் ரிவ்யூ சொன்ன ராணுவ வீரர்!

படக்குழு சமீபத்தில் இந்திய ராணுவ ஊழியர்களுக்காக அமரன் படத்தின் பிரீமியர் காட்சியை தொகுத்து வழங்கியது. இதில் ராணுவ வீரர்கள் கலந்து கொண்டனர். இந்நிலையில் இப்படத்தை பார்த்த ஒருவர் சமூக வலைதளத்தில் இப்படத்திற்கு விமர்சனத்தை எழுதினார். படம் எப்படி இருக்கிறது என்பது குறித்து அவர் தனது கருத்தை இன்ஸ்டாகிராமில் பதிவிட்டுள்ளார்.  

அமரன் முதல் விமர்சனம்

அதில், “அமரன் படம்  கதை , இயக்கம் மற்றும் நடிப்பு அற்புதமாக உள்ளது. அமரன் படத்தின் சிறப்புக் காட்சியைப் பார்ப்பது பெருமையாக இருக்கிறது. அசோக சக்ரா விருது பெற்ற மேஜர் முகுந்தின் வாழ்க்கை மற்றும் தியாகத்தை அடிப்படையாகக் கொண்ட இந்த படம் அக்டோபர் 31 ஆம் தேதி வெளியாக உள்ளது. திரைக்கதை, இயக்கம், நடிப்பு எல்லாமே அருமை. அசாதாரண திறமை கொண்ட முன்னணி நடிகர்கள் மற்றும் இயக்குனரை நான் சந்தித்தேன். இந்திய ராணுவத்திற்கு சல்யூட்" என்று அமரன் படம் குறித்து பதிவிட்டுள்ளார்.

அமரன் படத்தின் இந்த ஃபர்ஸ்ட் விமர்சனம் சமூக வலைதளங்களில் வைரலாகி வருகிறது. இதனை பலரும் ஷேர் செய்து வருகின்றனர். படத்தின் மீது நல்ல எதிர்பார்ப்பு உள்ளது. ட்ரெய்லரும் கவர்ந்துள்ளது. இப்படத்திற்கான முன்பதிவு ஏற்கனவே தொடங்கிவிட்டது. இதற்கான முன்பதிவு விறுவிறுப்பாக நடந்து வருகிறது.

மேஜர் முகுந்த் வரதராஜன் 2014 ஏப்ரலில் காஷ்மீரில் ஒரு கிராமத்தில் பயங்கரவாதிகளைத் தேடும் நடவடிக்கையின் போது நடந்த என்கவுண்டரில் வீரமரணம் அடைந்தார். அசோக சக்ரா விருது நாட்டிற்கு அவர் செய்த சேவைகளை அங்கீகரிக்கும் வகையில் இந்திய அரசால் அறிவிக்கப்பட்டது. அமரன் அவரது வாழ்க்கையை அடிப்படையாகக் கொண்டது. எழுத்தாளர்கள் ஷிவ் ஆரூர் மற்றும் ராகுல் சிங் எழுதிய இந்தியன் மோஸ்ட் ஃபியர்லெஸ்: ட்ரூ ஸ்டோரீஸ் ஆஃப் மிலிட்டரி ஹீரோஸ் என்ற புத்தகத்தை அடிப்படையாகக் கொண்டு இப்படம் எடுக்கப்பட்டுள்ளது. இப்படத்தை ராஜ்குமார் பெரியசாமி இயக்கியுள்ளார்.

ராணுவ வீரர் போல் உடல் கட்டமைப்பைப் பெறுவதற்காக, படப்பிடிப்பு தொடங்குவதற்கு முன்பு, கடும்பயிற்சியை சிவகார்த்திகேயன் மேற்கொண்டார். படம் தொடங்கப்படும்போது, சிவகார்த்திகேயனின் ஒர்க் அவுட் வீடியோவை படக்குழுவினர் பகிர்ந்து, அவரை உற்சாகப்படுத்தினர். இந்தப் படத்துக்கு ஜி.வி. பிரகாஷ் குமார் இசையமைத்துள்ளார். படத்தின் ஒளிப்பதிவினை சாய் என்பவர் செய்துள்ளார். எடிட்டிங்கினை கலை கலைவாணன் புரிந்துள்ளார். ஆக்‌ஷன் திரைப்படத்தை ஸ்டீஃபன் ரிச்டர் செய்துள்ளார். கலைப்பணியை பி.சேகரும், நடன அமைப்பினை ஷெரிஃப்பும் செய்துள்ளனர்.

இப்படத்தை கமல்ஹாசனின் ராஜ்கமல் ஃபிலிம்ஸ் இண்டர்நேஷனல் தயாரிப்பு நிறுவனத்தோடு சேர்த்து, சோனி பிக்சர்ஸ் இன்டர்நேஷனல் நிறுவனம் தயாரித்துள்ளது. சோனி பிக்சர்ஸ் இன்டர்நேஷனல் புரொடக்ஷன்ஸ், நிறுவனம் தமிழ் சினிமாவில் அறிமுகமாகும் படம் இது என்பது குறிப்பிடத்தக்கது. படத்தின் பெரும்பாலான காட்சிகள் காஷ்மீரிலும், சில காட்சிகள் சென்னை, புதுச்சேரி மற்றும் கேரளாவிலும் எடுக்கப்பட்டதாகத் தெரிகிறது.

பொறுப்புத் துறப்பு:

இந்தக் கட்டுரையில் உள்ள எந்தவொரு தகவல்/பொருள்/அல்லது நம்பகத்தன்மைக்கு எந்த விதமான உத்தரவாதமும் இல்லை. இதில் குறிப்பிடப்பட்டுள்ள தகவல்கள் அனைத்தும் பல்வேறு ஊடகங்களில் இருந்து சேகரித்து, உங்களுக்குத் தரப்பட்டுள்ளது. எங்கள் நோக்கம் தகவல்களை வழங்குவது மட்டுமே. இதிலிருந்து வெறும் தகவல்களை மட்டுமே பயனாளர்கள் எடுத்துக்கொள்ள வேண்டும். மற்றபடி இதிலிருந்து பயன்படுத்திக்கொள்வது பயனாளரின் பொறுப்பாகும்.