தளபதியைத் தொடர்ந்து சூப்பர் ஸ்டார் இடத்திற்கு அடி போடுகிறாரா சிவகார்த்திகேயன்? தீயாய் பரவும் தகவல்!

வரவேற்பை பெற்ற அமரன்

இந்தப் படம் வெளியான நாள் முதல் இன்று வரை வசூலிலும் விமர்சன ரீதியாகவும் பரவலான வரவேற்பை பெற்றுள்ளது. சாதிப் பெயர் குறிப்பிடவில்லை, மதங்களை தவறாக சித்தரித்தல் போன்ற சில எதிர்ப்புகள் சமீபத்தில் எழுந்தாலும் அப்படத்தின் வசூல் குறையவில்லை. இந்நிலையில், மக்கள் மத்தியில் சிவகார்த்திகேயனின் மவுசு அதிகரித்துள்ளது. இவர் நடிப்பில் வெளியாகும் அடுத்த படம் குறித்த எதிர்பார்ப்பு அதிகரித்துள்ள சமயத்தில், அவர் கூலி படக்குழுவினருடன் எடுத்த போட்டோ வைரலாகி வருகிறது.

விறுவிறுப்பாக தயாராகும் கூலி

வேட்டையன் படத்தைத் தொடர்ந்து நடிகர் ரஜினிகாந்த் நடித்துவரும் படம் கூலி. இந்தப் படத்தை இயக்குநர் லோகேஷ் கனகராஜ் இயக்கி வருகிறார். இந்தப் படத்தில் நடிகை ஸ்ருதி ஹாசன், நடிகர்கள் சத்யராஜ், நாகார்ஜூனா, உபேந்திரா, சவுபின் சாஹிர் உள்ளிட்ட பல நடிகர்கள் நடித்து வருகின்றனர்.

கூலி படத்தில் சிவகார்த்திகேயன்?

இந்த சமயத்தில் தான் பல முக்கிய நடிகர்களுடன் இணைந்து சிவகார்த்திகேயனும் கூலி படத்தில் நடிக்க உள்ளதாக தகவல் வெளியாகி உள்ளது. ஏனென்றால், லோகேஷ் கனகராஜ் படத்தில் யார் நடிப்பார்கள் என எதிர்பார்க்கவே முடியாத அளவிற்கு சஸ்பென்ஸ் நிறைந்திருக்கும்.

இந்த பேச்சு சில நாட்களாக அடிபட்டுக் கொண்டிருக்கும் சமயத்தில் தான், சிவகார்த்திகேயன் இந்தப் படத்தில் தான் நடிக்கவில்லை என விளக்கம் அளித்துள்ளார்.

எனக்கும் கூலிக்கும் இந்தத் தொடர்பு தான்!

என் வீட்டிற்கு நேர் எதிரில் உள்ள இடத்தில் தான் கூலி படப்பிடிப்பு நடந்தது. இதனால் தான் நான் அங்கு சென்றேன். நான் வீட்டிற்கு போகும் முன் கூலி ஷூட்டிங் ஸ்பாட்டிற்கு செல்வதை வழக்கமாக வைத்துள்ளேன். அதுமட்டுமின்றி, கூலி என் தலைவன் படம். அந்தப் படத்தோடு எனக்கு இருக்கும் ஒரே கனெக்ஷன் அது மட்டும் தான். மற்றபடி, அந்தப் படத்திற்கும் எனக்கும் எந்த தொடர்பும் இல்லை. இப்படி, உண்மை இல்லாத தகவல்களை பரப்ப வேண்டாம் எனக் கூறினார்.

சிறப்புக் காட்சியில் முன்னணி நடிகர்கள்

நடிகர் சிவகார்த்திகேயன் தமிழ் சினிமாவின் முன்னணி நடிகராக இருந்தாலும், அவர், நடிகர் விஜய், ரஜினிகாந்த் ஆகியோரின் தீவிர ரசிகன். இதனால், நடிகர் விஜய்யின் கோட் படத்தில் சிவகார்த்திகேயன் சிறப்பு தோற்றத்தில் நடித்துக் கொடுத்திருப்பார். அதேபோல, இவர் லோகேஷ் கனகராஜின் கூலி படத்திலும் நடித்திருப்பாரோ என பலருக்கும் சந்தேகம் எழுந்துள்ளது. அப்படி சந்தேகம் எழுவதற்கும் லோகேஷ் கனகராஜ் தான் முக்கிய காரணம். ஏனென்றால், விக்ரம் படத்தில் யாரும் எதிர்பார்க்காத வகையில், ரோலக்ஸ் கதாப்பாத்திரத்தில் நடிகர் சூர்யாவை நடிக்க வைத்திருப்பார். மேலும், லோகேஷ் யூடியூப் மூலமாகவும், சினிமாவில் தொடக்கத்தில் இருந்து முன்னேறி வந்த பலரையும் தன் படங்களில் நடிக்க வைத்துள்ளார். இதனால் சிவகார்த்திகேயன் கூலி படத்தில் நடிக்கிறார் என பலரும் கூறி வருகின்றனர்.

கூலி காட்சிகள் லீக்

ஒருவேளை அவர் கூலி படத்தில் நடித்திருந்தால், இந்தப் படத்திலிருந்து லீக் ஆன இரண்டாவது விஷயம் இது. ஏற்கனவே, படத்தில் தெலுங்கு சினிமாவின் முன்னணி ஹீரோ நாகார்ஜுனா சைமன் என்ற முக்கியத்துவமான கதாபாத்திரத்தில் நடிக்கிறார். இவரின் காட்சிகள் படமாக்கப்பட்டு வந்த சமயத்தில், நாகார்ஜூனாவின் சண்டைக் காட்சியை காட்சியை ரசிகர் ஒருவர் தனது செல்போனில் படம் பிடித்து ஆன்லைனில் லீக் செய்து படக்குழுவை அதிர்ச்சிக்குள்ளாக்கியது குறிப்பிடத்தக்கது.