Ravichandran Ashwin: 100வது டெஸ்டில் களமிறங்கிய அஸ்வினுக்கு பாராட்டு! சிறப்பு மரியாதை - குடும்பத்தினர் நெகிழ்ச்சி
இன்று 100வது டெஸ்ட் போட்டியில் களமிறங்கியிருக்கும் இந்திய ஸ்பின்னரான ரவிச்சந்திரன் அஸ்வின், இதுவரை விளையாடியிருக்கும் 99 டெஸ்ட் போட்டிகளில் 507 விக்கெட்டுகளை கைப்பற்றியுள்ளார். 35 முறை 5 விக்கெட்டுகளை எடுத்திருக்கும் அவர் பேட்டிங்கிலும் 5 சதம், 14 அரைசதங்கள் விளாசியுள்ளார்.
இந்தியா - இங்கிலாந்து இடையே ஐந்தாவது டெஸ்ட் போட்டி தரம்சாலாவில் நடைபெற்று வருகிறது. இது இந்திய ஸ்பின் ஆல்ரவுண்டர் ரவிச்சந்திரன் அஸ்வின் களமிறங்கும் 100வது டெஸ்ட் போட்டியாக அமைந்துள்ளது.
ட்ரெண்டிங் செய்திகள்
அதன்படி, 100வது டெஸ்ட் போட்டியில் விளையாடும் 14வது இந்திய வீரர் என்ற பெருமையை அஸ்வின் பெற்றுள்ளார். இதையடுத்து போட்டி தொடங்குவதற்கு முன்னர் இமாச்சல பிரதேசம் கிரிக்கெட் அசோசியேஷன் மைதானத்தில் பனி படர்ந்த அழகான மலைத்தொடர் பின்னணியில் 100வது டெஸ்ட் போட்டி விளையாட இருக்கும் அஸ்வினுக்கு பாராட்டுகள் தெரிவிக்கப்பட்டது. இந்திய அணியின் தலைமை பயிற்சியாளர் ராகுல் டிராவிட் 100 என குறிப்பிடப்பட்டிருக்கும் சிறப்பு தொப்பியை அஸ்வினுக்கு பரிசளித்தார்.
இந்த நிகழ்வின்போது அஸ்வினின் மனைவி ப்ரீத்தி, மற்றும் குழந்தை உடன் இருந்தார்கள். அதேபோல் போட்டியில் களமிறங்குவதற்கு முன்னர் சக வீரர்கள் சிறப்பு மரியாதையும் செலுத்தினர். இந்த தருணம் அஸ்வின் மற்றும் குடும்பத்தாருக்கு நெகிழ்ச்சியை வரவழைக்கும் விதமாக அமைந்திருந்தது.
இந்திய கிரிக்கெட் அணியின் ஸ்பின் ஆல்ரவுண்டராக இருந்து வரும் அஸ்வின் இதுவரை விளையாடியிருக்கும் 99 போட்டிகளில், 507 வக்கெட்டுகளை வீழ்த்தியுள்ளார். இதில் 8 முறை 10 விக்கெட்டுகள், 35 முறை 5 விக்கெட்டுகளையும் எடுத்திருக்கும் அவரது பவுலிங் சராசரி 23.91 ஆக உள்ளது. சிறந்த பவுலிங் 7/59 ஆகும்.
பவுலிங்கை போல் பேட்டிங்கிலும் சிறப்பான பங்களிப்பை அளித்திருக்கும் அஸ்வின், 3309 டெஸ்ட் ரன்கள் அடித்துள்ளார். இதில் 5 சதங்களும், 14 அரைசதங்களும் அடங்கும். சமகால ஆல்ரவுண்சர்களில் இதுவொரு சிறந்த பங்களிப்பாக பார்க்கப்படுகிறது.
இந்தியாவுக்காக 100 டெஸ்ட் போட்டிகள் களமிறங்கிய வீரர்கள்
இந்திய அணிக்காக இதுவரை 13 பேர் 100 டெஸ்ட் போட்டிகளில் விளையாடியுள்ளார்கள். தற்போது 14வது வீரராக அஸ்வின் விளையாடி வருகிறார். இந்த எலைட் லிஸ்டில் இருக்கும் வீரர்கள் பின்வருமாறு
- சச்சின் டென்டுல்கர் - 200 டெஸ்ட்
- ராகுல் டிராவிட் - 164 டெஸ்ட்
- விவிஎஸ் லக்ஷ்மன் - 134 டெஸ்ட்
- அனில் கும்ப்ளே - 132 டெஸ்ட்
- கபில் தேவ் - 131 டெஸ்ட்
- சுனில் கவாஸ்கர் - 125 டெஸ்ட்
- திலீப் வெங்சர்க்கார் - 116 டெஸ்ட்
- செளரவ் கங்குலி - 113 டெஸ்ட்
- விராட் கோலி - 113 டெஸ்ட்
- இஷாந்த் ஷர்மா - 105 டெஸ்ட்
- சத்தேஷ்வர் புஜாரா - 103 டெஸ்ட்
- ஹர்பஜன் சிங் - 103 டெஸ்ட்
- வீரேந்தர் சேவாக் - 103 டெஸ்ட்
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
டாபிக்ஸ்