Dindigul Dragons Champion: ‘சொன்னதை செய்து காட்டியதில் மகிழ்ச்சி’-முதல்முறையாக DD சாம்பியனான பிறகு அஸ்வின் பேட்டி
TNPL 2024 Final: 2024 தமிழ்நாடு பிரீமியர் லீக் பட்டத்தை முதன்முறையாக திண்டுக்கல் டிராகன்ஸ் வென்றது. அஷ்வினின் சிறப்பான ஆட்டத்தால் 2 முறை சாம்பியனான கோவை அணியை திண்டுக்கல் வீழ்த்தியது.
ஸ்ரீராம் கேபிட்டல் தமிழ்நாடு பிரீமியர் லீக் 2024 சீஸனில் சென்னை எம்.ஏ சிதம்பரம் ஸ்டேடியத்தில் நேற்று நடைபெற்ற மாபெரும் இறுதிப்போட்டியில் 2 முறை சாம்பியனான லைகா கோவை கிங்ஸை 6 விக்கெட்கள் வித்தியாசத்தில் வீழ்த்தி முதன்முறையாக டி.என்.பி.எல் பட்டத்தை திண்டுக்கல் டிராகன்ஸ் கைப்பற்றியது.
முன்னதாக, 2024 டி.என்.பி.எல் இறுதிப்போட்டியில் ஹாட்ரிக் பட்டத்தை எதிர்நோக்கி லைகா கோவை கிங்ஸ் அணியும், முதல் பட்டத்தை குறிவைத்து திண்டுக்கல் டிராகன்ஸ் அணியும் நேற்று மோதியது. இதில் டாஸ் வென்ற திண்டுக்கல் ஃபீல்டிங்கைத் தேர்வு செய்ய, முதலில் களமிறங்கிய கோவை அணி 20 ஓவர்களில் 7 விக்கெட்கள் இழப்பிற்கு 129 ரன்கள் எடுத்தது. அந்த அணிக்கு அதிகபட்சமாக மிடில் ஆர்டரில் ராம் அர்விந்த் 27 ரன்களும் அத்திக் உர் ரஹ்மான் 25 ரன்களும் எடுத்தனர். இவ்விரு பேட்டர்களைத் தவிர மற்ற எந்த பேட்டர்களும் பெரிதாக சோபிக்கவில்லை.
சிறப்பான ஃபீல்டிங்
சிறப்பான ஃபீல்டிங்கை வெளிப்படுத்திய திண்டுக்கல் அணியில் சரத் குமார் மட்டும் 4 கேட்ச்சுகளை எடுத்து டி.என்.பி.எல் வரலாற்றில் ஒரு போட்டியில் ஃபீல்டராக அதிக கேட்ச்சுகளை எடுத்த 3வது வீரர் என்ற சாதனையைப் படைத்தார். பெளலிங்கைப் பொறுத்தவரை விக்னேஷ், வருண் சக்கரவர்த்தி மற்றும் சந்தீப் வாரியர் ஆகிய மூவரும் தலா 2 விக்கெட்களைக் கைப்பற்றினர்.
திண்டுக்கல் டிராகன்ஸ் தங்களின் முதல் டி.என்.பி.எல் பட்டத்தைக் கைப்பற்ற 130 என்ற இலக்கை நோக்கி களமிறங்கியது. அவர்களின் ஓப்பனர்களான விமல் குமார் (9) மற்றும் இம்பாக்ட் வீரராக களமிறங்கிய ஷிவம் சிங் (4) விரைவாக ஆட்டமிழந்தாலும் அணித் தலைவர் அஷ்வின் (52) மற்றும் பாபா இந்திரஜித் (32) ஆகிய இருவரும் 3வது விக்கெட்டிற்கு பொறுப்பான ஆட்டத்தை வெளிப்படுத்தி 65 ரன்கள் சேர்த்தனர். அஷ்வின் இந்த சீஸனில் தொடர்ச்சியாக தனது 3வது அரைசதத்தைப் பதிவு செய்ததோடு இந்த மூன்று அரைசதத்தையும் ப்ளேஆஃப்ஸ் மற்றும் இறுதிப்போட்டியில் அடித்தது குறிப்பிடத்தக்கது. இறுதியில் திண்டுக்கல் டிராகன்ஸ் 6 விக்கெட்கள் வித்தியாசத்தில் லைகா கோவை கிங்ஸை வீழ்த்தி தமிழ்நாடு பிரீமியர் லீக்கில் தங்களின் முதல் பட்டத்தைக் கையில் ஏந்தியது.
3வது பட்டத்தை தவறவிட்ட கோவை
மறுபுறம் தொடர்ச்சியாக 3வது பட்டத்தைக் கைப்பற்றத் துடித்த லைகா கோவை கிங்ஸ் இந்த தொடர் முழுவதும் அபாரமான ஆட்டத்தை வெளிப்படுத்தினாலும் இறுதிப்போட்டியில் அதை செய்யத் தவறியதால் ஹாட்ரிக் பட்டத்தைப் பெறும் வாய்ப்பை இழந்தனர்.
இறுதிப்போட்டியில் திண்டுக்கல் டிராகன்ஸ் 6 விக்கெட்கள் வித்தியாசத்தில் வெற்றி
வெற்றிக்குப்பின் திண்டுக்கல் டிராகன்ஸின் பாபா இந்திரஜித் பேசுகையில், “கண்டிப்பாக நாங்கள் மிகவும் மகிழ்ச்சியாக உள்ளோம். சேப்பாக் உடனான தோல்விக்குப்பின் எப்படி மீண்டு வருவது என்பது குறித்து அஷ்வின் அண்ணாவுடன் அனைவரும் பேசினோம். அதன் பின் நாங்கள் செயல்பட்ட விதமும் எங்களுக்குப் பிடித்த மைதானத்தில் இறுதிப்போட்டியில் விளையாடியதும் மறக்க முடியாத உணர்வைத் தருகிறது. நிச்சயம் திண்டுக்கல் டிராகன்ஸ் நிர்வாகத்திற்கும் இந்த அணியை இத்தனை ஆண்டுகள் நம்பிக்கையுடன் கொண்டு வந்த அஷ்வின் அண்ணாவிற்கும் தான் இதன் முழுப் பாராட்டுகளும் போய்ச் சேர வேண்டும்”, என்று தெரிவித்தார்.
இந்த சீஸனின் ஆரஞ்சு கேப்பை வென்ற திண்டுக்கல் டிராகன்ஸின் ஷிவம் சிங் பேசுகையில், “முதன்முறையாக பட்டம் வென்றது அற்புதமான உணர்வைத் தருகிறது. சில முறை இறுதிப்போட்டியை எங்கள் அணி தவறவிட்டாலும் இம்முறை வெற்றி பெற வேண்டுமென்ற வெறியுடன் ஒவ்வொரு வீரரும் விளையாடினோம்”, என்று கூறினார்.
இறுதிப்போட்டியில் 4 கேட்ச்சுகளை எடுத்த திண்டுக்கல் அணியின் சரத் குமார் பேசுகையில், “ திண்டுக்கல்லில் நடந்தப் போட்டியில் என்னால் சரியாக பெர்ஃபார்ம் செய்ய முடியவில்லை என்ற ஆதங்கமிருந்தது. ஆனால் இறுதிப்போட்டியில் ஃபீல்டிங் மற்றும் பேட்டிங் என
இரண்டிலும் எனது அணிக்கு என்னால் முடிந்த பங்களிப்பை தந்ததை நினைக்கையில் மகிழ்ச்சியாகவுள்ளது”, என்று சரத் குமார் கூறினார்.
2024 டி.என்.பி.எல் தொடரின் ரன்னர் அப் அணியான லைகா கோவை கிங்ஸின் கேப்டன் ஷாருக் கான் பேசுகையில், “கடந்த 2 சீஸன்களில் கடுமையாக போராடினோம். அதே போல இம்முறையும் செயல்பட்டோம். ஆனாலும் இறுதிப்போட்டியில் வெற்றி கிடைக்கவில்லை. மிடில் ஓவர்களில் முக்கியமான விக்கெட்களை இழந்தது எங்களின் தோல்விக்கு முக்கிய காரணமாக அமைந்தது. இந்த தொடரின் மூலம் தமிழ்நாட்டிலுள்ள பல பகுதிகளில் விளையாடும் வாய்ப்பு கிடைத்தது. கண்டிப்பாக அடுத்த முறையும் சிறப்பான ஆட்டத்தை நாங்கள் வெளிக் கொண்டுவருவோம்”, என்று தெரிவித்தார்.
2024 டி.என்.பி.எல் தொடரை வென்ற திண்டுக்கல் டிராகன்ஸின் கேப்டன் ரவிச்சந்திரன் அஷ்வின் பேசுகையில், “இந்த வெற்றி கண்டிப்பாக பெரும் அர்த்தத்தை எங்களுக்கு தந்துள்ளது. நாங்கள் இதுவரை ப்ளேஆஃப்ஸிற்குள் வந்துள்ளோம், சில முறை இறுதிப்போட்டியில் விளையாடியுள்ளோம். ஆனால் ஒரு முறை கூட பட்டம் வெல்ல முடியவில்லையே என்ற ஏக்கம் நிச்சயம் அனைவருக்கும் நிலவியிருக்கும். நானும் எங்கள் அணியின் உரிமையாளர்களிடம் இந்த தொடர் முழுவதும் நான் கண்டிப்பாக விளையாடி வெற்றிப்பெற்று தருவேன் என்று வாக்குறுதி அளித்திருந்தேன், அதை நிறைவேற்றியதில் மகிழ்ச்சி. டி.என்.பி.எல் மூலம் பல இளைஞர்கள் தமிழ்நாடு மற்றும் இந்திய அணிக்காக விளையாடுவார்கள் என்று நான் எதிர்பார்க்கிறேன்”, என்று அஷ்வின் தெரிவித்தார்.
போட்டிக்கான விருதுகள்:
1."இந்தப் போட்டியின் கேம்பா கிரேட் இந்தியன் ஸ்ட்ரைக்கர் விருதை” திரு. ரவிச்சந்திரன் அஷ்வின் வென்றார்.
2.”பூம் பூம் பூமர் கோல்டன் விக்கெட் விருதை” திரு. பி. விக்னேஷ் வென்றார்.
3.”இந்தப் போட்டியின் பூமர் வுமன் அதிக டாட் பந்துகளுக்கான விருதை” திரு. சித்தார்த் மணிமாறன் வென்றார்.
4.”இந்தப் போட்டியின் இன்சூரன்ஸ் தேகோ சேஃப் ஹேண்ட்ஸ் விருதை” திரு. சரத் குமார் வென்றார்.
5.”இந்தப் போட்டியின் பிரிட்டிஷ் எம்பயர் பேக்கேஜ்டு டிரிங்கிங் வாட்டர் ஹை வோல்டேஜ் வீரருக்கான விருதை” திரு. எஸ். சுஜய் வென்றார்.
6.”இந்தப் போட்டியின் ஐஓபி மோஸ்ட் டிபென்டபிள் வீரருக்கான விருதை” திரு. பி.விக்னேஷ் வென்றார்.
7.”இந்தப் போட்டியின் ஷேரான் பிளை சூப்பர் 6இல் அதிக சிக்ஸர் அடித்த வீரருக்கான விருதை” திரு. ரவிச்சந்திரன் அஷ்வின் வென்றார்.
8. “ஸ்ரீராம் அதிக ஃபோர்கள் அடித்த வீரருக்கான விருதை” திரு. பாபா இந்திரஜித் வென்றார்.
9.”ஸ்ரீராம் கேபிட்டல் ஆட்டநாயகன் விருதை” திரு. ரவிச்சந்திரன் அஷ்வின் வென்றார்.
2024 தமிழ்நாடு பிரீமியர் லீக் தொடரின் விருதுகள்:
1."இந்த தொடரின் கேம்பா கிரேட் இந்தியன் ஸ்ட்ரைக்கர் விருதை” திரு. சாய் சுதர்சன் வென்றார்.
2.”இந்த தொடரின் பூமர் வுமன் அதிக டாட் பந்துகளுக்கான விருதை” திரு. சந்தீப் வாரியர் வென்றார்.
3.”இந்த தொடரின் இன்சூரன்ஸ் தேகோ சேஃப் ஹேண்ட்ஸ் விருதை” திரு. அமித் சாத்விக் வென்றார்.
4.”இந்த தொடரின் பிரிட்டிஷ் எம்பயர் பேக்கேஜ்டு டிரிங்கிங் வாட்டர் ஹை வோல்டேஜ் வீரருக்கான விருதை” திரு. ஷாருக் கான் வென்றார்.
5. இந்த தொடரில் அதிக ரன்கள் எடுத்து டி.வி.எஸ் ஸ்டார் சிட்டி ஆரஞ்சு கேப் விருதை வெல்பவர் திரு. ஷிவம் சிங் (364 ரன்கள்)
6. இந்த தொடரில் அதிக விக்கெட்கள் எடுத்து டி.வி.எஸ் ஸ்டார் சிட்டி பர்ப்பிள் கேப் விருதை வெல்பவர் திரு. பொய்யாமொழி (16 விக்கெட்கள்)
7.“இந்த தொடரின் ஸ்ரீராம் அதிக ஃபோர்கள் அடித்த வீரருக்கான விருதை” திரு. துஷார் ரஹேஜா வென்றார்.
8.”இந்த தொடரின் ஷேரான் பிளை சூப்பர் 6-இல் அதிக சிக்ஸர் அடித்த வீரருக்கான விருதை” திரு. ஷிவம் சிங் (23 சிக்ஸர்கள்) வென்றார்.
9.”இந்த தொடரின் ஐஓபி மோஸ்ட் டிபென்டபிள் வீரருக்கான விருதை” திரு. ரவிச்சந்திரன் அஷ்வின் வென்றார்.
10.”ஸ்ரீராம் கேபிட்டல் தொடர்நாயகன் விருதை” திரு. ஷாருக் கான் வென்றார்.
ராகுல் டிராவிட் வருகை:
இறுதிப்போட்டிக்கு முன்னதாக, ரஞ்சிக் கோப்பையை வென்ற முன்னாள் தமிழக கிரிக்கெட் வீரர்களுக்கான பாராட்டு விழா எம்.ஏ சிதம்பரம் ஸ்டேடியத்தில் நடைபெற்றது. இதற்கு சிறப்பு விருந்தினராக முன்னாள் இந்திய கிரிக்கெட் கேப்டனும் டி20 உலகக் கோப்பையை வென்று தந்த பயிற்சியாளரான திரு. ராகுல் டிராவிட் கலந்து கொண்டார்.
டாபிக்ஸ்