தமிழ் செய்திகள்  /  தமிழ்நாடு  /  Vikravandi By Election : விக்கிரவாண்டி சட்டமன்ற தொகுதி இடைத்தேர்தல்.. திமுக வேட்பாளராக அன்னியூர் சிவா அறிவிப்பு!

Vikravandi By Election : விக்கிரவாண்டி சட்டமன்ற தொகுதி இடைத்தேர்தல்.. திமுக வேட்பாளராக அன்னியூர் சிவா அறிவிப்பு!

Divya Sekar HT Tamil
Jun 11, 2024 02:34 PM IST

Vikravandi By Election: விக்கிரவாண்டி சட்டமன்ற தொகுதி இடைத்தேர்தல் வருகின்ற 10ஆம் தேதி நடைபெற உள்ள நிலையில் திமுக வேட்பாளராக அன்னியூர் சிவா அறிவிக்கப்பட்டுள்ளார்.

விக்கிரவாண்டி சட்டமன்ற தொகுதி இடைத்தேர்தல்.. திமுக வேட்பாளராக அன்னியூர் சிவா அறிவிப்பு!
விக்கிரவாண்டி சட்டமன்ற தொகுதி இடைத்தேர்தல்.. திமுக வேட்பாளராக அன்னியூர் சிவா அறிவிப்பு!

ட்ரெண்டிங் செய்திகள்

முன்னதாக விழுப்புரம் மாவட்டம் விக்கிரவாண்டி சட்டமன்றத் தொகுதி உறுப்பினராக இருந்த புகழேந்தி, உடல்நலக்குறைவால் கடந்த ஏப்ரல் 6 ஆம் தேதி காலமானார். எம்எல்ஏ புகழேந்தி மரணம் குறித்து சட்டசபை செயலகம் தேர்தல் ஆணையத்திற்கு தகவல் தெரிவித்தது. இதையடுத்து விக்கிரவாண்டி தொகுதி காலியானதாக ஏப்ரல் 8 ஆம் தேதி தேர்தல் ஆணையம் அறிவித்தது.

புகழேந்தி மறைவு

விக்கிரவாண்டி தொகுதி சட்டமன்ற உறுப்பினரும், விழுப்புரம் மத்திய மாவட்ட திமுக செயலாளருமான புகழேந்தி கடந்த ஏப்ரல் 5ஆம் தேதி தமிழக முதல்வர் மு.க.ஸ்டாலின் தலைமையில் விக்கிரவாண்டி அருகே நடைபெற்ற தேர்தல் பிரச்சாரக் கூட்டத்தில் கலந்துகொண்டபோது திடீரென மயங்கி விழுந்தார். உடனடியாக மருத்துவமனையில் அனுமதிக்கப்பட்டார். எனினும், சிகிச்சை பலனின்றி புகழேந்தி ஏப்ரல் 6ஆம் தேதி காலமானார்.

விழுப்புரம் அடுத்த அத்தியூர் திருவாதி கிராமத்தை சேர்ந்தவர் புகழேந்தி. அங்கிருந்து கிளை கழக செயலாளராக தனது அரசியல் பயணத்தை தொடங்கினார். பின்னர் மாவட்ட பொருளாளர், மாவட்ட செயலாளராக இருந்து வந்தார். கடந்த 2019 விக்ரவாண்டி இடைத்தேர்தலின் போது விக்கிரவாண்டி தொகுதியில் போட்டியிட்டு தோல்வியை தழுவினார். தொடர்ந்து 2021 சட்டமன்றத் தேர்தலில் மீண்டும் அவருக்கு திமுக தலைமை வாய்ப்பு வழங்கியது. அந்த தேர்தலில் வெற்றி பெற்று சட்டமன்ற உறுப்பினர் ஆனார்.

ஜூலை 10ல் இடைத்தேர்தல்

விழுப்புரம் மாவட்டம், விக்கிரவாண்டி சட்டமன்றத் தொகுதி இடைத்தேர்தல் தேதியை அறிவித்துள்ளது இந்திய தேர்தல் ஆணையம். அதன்படி, ஜூலை 10 ஆம் தேதி இடைத்தேர்தல் நடைபெறுகிறது. ஜூலை 14ஆம் தேதி வேட்புமனு தாக்கல் ஆரம்பிக்கிறது. வேட்புமனுவைத் தாக்கல் செய்வதற்கு ஜூன் 21 ஆம் தேதி கடைசி நாளாகும்.

செஞ்சி மஸ்தான் மாவட்ட செயலாளர் பொறுப்பில் இருந்து விடுவிப்பு

அமைச்சர் செஞ்சி மஸ்தான் மாவட்ட செயலாளர் பொறுப்பில் இருந்து விடுவிக்கப்பட்டுள்ளார். விழுப்புரம் தெற்கு மாவட்ட கழக பொறுப்பாளராக, அமைச்சர் பொன்முடியின் மகனும், கள்ளக்குறிச்சி முன்னாள் எம்.பி யுமான கௌதமசிகாமணி நியமனம் செய்யப்பட்டுள்ளார்.

மேலும், வேட்புமனுக்கள் மீது 24 ஆம் தேதி பரிசீலனை நடைபெறும் என்றும் வேட்புமனுக்களை திரும்ப பெற 26 ஆம் தேதி கடைசி நாளாகும் என்றும் தேர்தல் ஆணையம் அறிவித்துள்ளது. இடைத்தேர்தலில் பதிவாகும் வாக்குகள் ஜூலை 13 ஆம் தேதி எண்ணப்பட்டு முடிவுகள் அறிவிக்கப்பட உள்ளன.

திமுக பொதுச்செயலாளர் துரைமுருகன் அறிவிப்பு

இதுதொடர்பாக திமுக பொதுச்செயலாளர் துரைமுருகன் வெளியிட்ட அறிவிப்பில்,” விழுப்புரம் தெற்கு மாவட்டக் கழகச் செயலாளராகப் பணியாற்றி வந்த நா.புகழேந்தி அவர்கள் மறைவெய்திய காரணத்தால் கழகப் பணிகள் செவ்வனே நடைபெற டாக்டர் தெ.கௌதம்சிகாமணி, எம்.எஸ். (ஆர்த்தோ) அவர்கள் விழுப்புரம் தெற்கு மாவட்டக் கழகப் பொறுப்பாளராக நியமிக்கப்படுகிறார். ஏற்கனவே தேர்ந்தெடுக்கப்பட்ட மாவட்ட நிர்வாகிகள் இவருடன் இணைந்து பணியாற்றிட வேண்டுமென கேட்டுக் கொள்ளப்படுகிறார்கள்.

விழுப்புரம் வடக்கு மாவட்டக் கழகச் செயலாளராகப் பணியாற்றி வரும் செஞ்சி கே.எஸ்.மஸ்தான் அப்பொறுப்பிலிருந்து அவர்களை விடுவித்து, அவருக்குப் பதிலாக டாக்டர் ப.சேகர், (28, ஜெயபுரம் 2வது தெரு, திண்டிவனம், விழுப்புரம் மாவட்டம் - 604 001) அவர்கள் விழுப்புரம் வடக்கு மாவட்டக் கழகப் பொறுப்பாளராக நியமிக்கப்படுகிறார். ஏற்கனவே தேர்ந்தெடுக்கப்பட்ட மாவட்ட நிர்வாகிகள் இவருடன் இணைந்து பணியாற்றிட வேண்டுமென கேட்டுக் கொள்ளப்படுகிறார்கள்.” என தெரிவிக்கப்பட்டுள்ளது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

Google News: https://bit.ly/3onGqm9 

ஹிந்துஸ்தான் தமிழ் வாட்ஸ் அப் குடும்பத்தில் இணைய கீழே உள்ள லிங்கை கிளிக் செய்யுங்கள்.

https://www.whatsapp.com/channel/0029Va9NEUA7IUYU4eBTc81v

டி20 உலகக் கோப்பை 2024

டாபிக்ஸ்