’கருணாநிதி குடும்பம் மன்னர் குடும்பமா?’ வரேன் 234 தொகுதிக்கும்! ஆட்டத்தை தொடங்கிய ஈபிஎஸ்!
தேர்தல் நேரத்தில் அனைவரும் எதிர்பார்க்கும் கூட்டணி நிச்சயம் அமையும். கடந்த நாடாளுமன்றத் தேர்தலிலும் இதையே சொன்னேன் என்று உங்களில் பலர் நினைக்க கூடும். ஆனால் நாடாளுமன்றத் தேர்தல் வேறு, சட்டமன்றத் தேர்தல் வேறு.
சென்னை வானகரத்தில் உள்ள தனியார் திருமண மண்டபத்தில் நடைபெற்ற அதிமுக பொதுக்குழு கூட்டத்தில் அக்கட்சியின் பொதுச்செயலாளரும், முன்னாள் முதலமைச்சருமான எடப்பாடி பழனிசாமி பேசினார்.
அப்போது பேசிய அவர், 2021 சட்டமன்றத் தேர்தலில் ஒரு லட்சத்து 98 ஆயிரத்து 359 வாக்குகள் குறைவாக பெற்றதால் நாம் வெற்றி வாய்ப்பை இழந்தோம். 2026 சட்டமன்றத் தேர்தலுக்கு இன்னும் 14 மாதமே உள்ளது. அடுத்த ஆண்டு மார்ச் மாதத்தில் தேர்தல் அறிவித்துவிடுவார்கள். இந்த 14 மாதகால உழைப்புதான் தேர்தலில் வெற்றியை கொடுக்கும். கட்சி வளர்ச்சி பணிகளில் ஈடுபவதை பொறுத்தே நமக்கு வெற்றி வாய்ப்பு அமையும்.
திமுகவை மக்கள் வெறுக்கத் தொடங்கிவிட்டார்கள். மக்கள் விரோத ஆட்சி என்று முடிவு செய்துவிட்டார்கள். இந்த சந்தர்ப்பத்தை பயன்படுத்திக் கொள்ள வேண்டும். மக்களை சந்திக்கவே அமைச்சர்கள் பயப்படுகிறார்கள்.
‘ஸ்டாலின்தான் வராரு, நீச்சல் அடிக்க விட்டுட்டாரு’
43 மாத திமுக ஆட்சியை மக்கள் வெறுக்கின்றனர். வெள்ள பாதிப்பின்போது மக்கள் அமைச்சர்களை கேள்வி எழுப்பும் நிலைக்கு வந்து உள்ளனர். எப்போது இந்த ஆட்சி முடிவுக்கு வரும் என மக்கள் எதிர்பார்கின்றனர். ‘ஸ்டாலின்தான் வராரு, நீச்சல் அடிக்க விட்டுட்டாரு’ என மக்கள் விமர்சிக்கின்றனர். முன்னெச்சரிக்கை நடவடிக்கைகளை அரசு எடுக்காததால் தென்பெண்ணை ஆற்றில் உள்ள சாத்தனூர் அணையை அறிவிப்பு தந்த உடனேயே திறந்துவிட்டுவிட்டனர்.
வரும் ஜனவரி மாதம் முதல் தமிழ்நாட்டில் உள்ள 234 தொகுதிகளிலும் நான் சுற்றுப்பயணம் மேற்கொள்ள உள்ளேன். இந்த பயணத்தில் மக்களை சந்தித்து ஆட்சியின் அவலங்களை எடுத்து சொல்லுவோம். உங்களுக்காக இரவு பகல் பாராமல் பணியாற்றிக் கொண்டு வருகிறேன்.
2026ஆம் ஆண்டில் திமுக ஆட்சியை அகற்ற சூளுரை ஏற்க வேண்டும். திமுக ஆட்சியின் அவலங்களையும், அதிமுக ஆட்சியில் போடப்பட்ட திட்டங்களையும் மக்களிடம் எடுத்து சொல்ல வேண்டும்.
கருணாநிதி குடும்பம் மன்னர் குடும்பமா?
தேர்தல் நேரத்தில் அனைவரும் எதிர்பார்க்கும் கூட்டணி நிச்சயம் அமையும். கடந்த நாடாளுமன்றத் தேர்தலிலும் இதையே சொன்னேன் என்று உங்களில் பலர் நினைக்க கூடும். ஆனால் நாடாளுமன்றத் தேர்தல் வேறு, சட்டமன்றத் தேர்தல் வேறு. அதிமுக தலைமையில் தொண்டர்கள், மக்கள் எதிர்பார்க்கும் கூட்டணி அமையும். கடந்த கால ஆட்சி வேறு, 2026 ஆம் ஆண்டு அமையும் ஆட்சி வேறுவிதமாக இருக்கும். ஆட்சி அதிகாரத்தில் உள்ளவர்கள் அதிகார போதையில் பேசுபவர்களுக்கு தகுந்த பதிலடியை தருவோம். குடும்ப ஆட்சிக்கு முற்றுப்புள்ளி வைப்போம். கருணாநிதி குடும்பம் என்ன மன்னர் குடும்பமா? என கேள்வி எழுப்பினார்.
