Kilambakkam Bus Stand: ’நீங்களே ஒத்துக்கிட்டீங்க!’ கிளாம்பாக்கம் தொடர்பாக ஸ்டாலின் - ஈபிஎஸ் இடையே வாதம்

கிளாம்பாக்கம் பேருந்து நிலையத்தால் மக்கள் சந்திக்கும் சிரமங்கள் குறித்து அதிமுக எம்.எல்.ஏ செல்லூர் ராஜூ கேள்வி எழுப்பினார். அதற்கு பதில் அளித்து பேசிய சிஎம்டிஏ துறை அமைச்சர் சேகர்பாபு, கிளாம்பாக்கம் பேருந்து நிலையத்தில் கழிப்பறை இல்லை, குடிநீர் வசதி இல்லை, உணவு இல்லை என்று சொல்லி பயணிகள் யாரும் புகார் சொல்லவில்லை. கிளாம்பாக்கம் பேருந்து நிலையம் 100 சதவீத பயன்பாட்டுக்கு வந்துள்ளது.  வயது முதிந்தவர்கள் பஸ்களில் ஏற பேட்டரி கார்கள் உள்ளது.  தூங்குபவர்களை எழுப்பலாம், தூங்குபவர்களை போல நடிப்பவர்களை எழுப்ப முடியாது. இந்த கிளாம்பாக்கம் பேருந்து நிலையத்திற்கு எதிர்க்கட்சிகள் சாடலுக்கு என்ன காரணம் என யோசித்தேன். சிறப்பு வாய்ந்த பேருந்து நிலையம் முதற்கட்டமாக தொடங்கப்படும் போது சிறுசிறு பிரச்னைகள் இருப்பது இயல்பு, காலப்போக்கில் சரி செய்து விடலாம். ஆனால் கலைஞர் நூற்றாண்டு பேருந்து நிலையம் என பெயர் வைத்ததால்தான் இந்த அவதூறுகளை இவர்கள் பரப்பி வருகிறார்கள். 

சட்டமன்றத்தில் உள்ள எதிர்க்கட்சித் தலைவர் அனைத்துக் கட்சி உறுப்பினர்களும் வாருங்கள், என்ன வசதிகள் என்பதை காண்பிக்கிறோம். குறைகளை சொல்லுங்கள் அதை நிறைவேற்றித்தர தயாராக உள்ளோம் என கூறினார். 

இதற்கு பதில் அளித்து பேசிய எதிர்க்கட்சித் தலைவர் எடப்பாடி பழனிசாமி, நாங்கள் விட்ட அறிக்கையில் அங்குள்ள சிறுசிறு பிரச்னைகளை தீர்க்க வேண்டும் என்று சொல்லி உள்ளோம். அவரே சிறுசிறு பிரச்னைகள் உள்ளதை ஒப்புக்கொண்டுவிட்டார். மக்கள் ஆர்ப்பாட்டம் செய்துள்ளனர். மக்கள் பேட்டி கொடுத்து உள்ளனர். மக்கள் சாலையில் வந்து படுத்து போராட்டம் செய்த காட்சிகள் ஊடகங்களில் வந்துள்ளது. சிறு பிரச்னைகளை சரி செய்து பயணிகளுக்கு வசதி செய்து தர வேண்டும் என்பதுதான் எங்கள் கருத்து என்றார். 

இதற்கு அமைச்சர் சேகர்பாபு பதில் அளிக்கையில், அவசரப்பட்டு பேருந்து நிலையத்தை திறந்துவிட்டதாக கூறுகிறார்கள், அவர்கள் செய்யத் தவறியதை இந்த ஆட்சி செய்துள்ளனர். 2021 மார்ச் 13ஆம் தேதி உடன் பணி ஒப்பந்தம் கோரப்பட்டு வெறும் 30% பணிகளை மட்டும்தான் முடித்து இருந்தார்கள், ஆனால் 100% பணிகளை இந்த அரசுதான் முடித்தது என்றார்.  

பின்னர் பேசிய எதிர்க்கட்சித் தலைவர் எடப்பாடி பழனிசாமி, நாங்கள் விட்ட அறிக்கை எங்குள்ள பயணிகள் கருத்தில் அடிப்படையில்தான் வெளியிட்டோம். அது கொரோனா காலம் என்பதால் ஓராண்டு காலம் எந்த பணியும் மேற்கொள்ள முடியவில்லை. அதனால் எந்த கட்டுமான பணியும் செய்ய முடியவில்லை. முழுமையான பணிகள் முடிக்கப்பட பிறகு இந்த பேருந்து நிலையத்தை திறந்து இருந்தால் இந்த பிரச்னையே இருந்து இருக்காது என்றார். 

எதிர்க்கட்சித்தலைவருக்கு பதில் அளித்த முதலமைச்சர் மு.க.ஸ்டாலின்,  எதிர்க்கட்சித் தலைவர் சொன்னதுபோல் சிறு பிரச்னை மட்டுமல்ல, பெரும், பெரும் பிரச்னைகள் எல்லாம் இருந்தது. அமைச்சரே இன்னும் ஏதேனும் பிரச்னை இருந்தால் சொல்லுங்கள், வாருங்கள் அழைத்து செல்கிறோம் என்று கூறி உள்ளார். எனவே இத்தோடு இந்த பிரச்னையை முடித்துக் கொள்ளுங்கள் என கூறினார்.