Dr. Krishnasamy: ஊடகவியலாளர் மீது பாயந்து பிராண்டிய கிருஷ்ணசாமி..கோவை பத்திரிகையாளர் மன்றம் கண்டனம்

புதிய தமிழகம் கட்சி தலைவர் மருத்துவர் கிருஷ்ணசாமி செய்தியாளர் சந்திப்பு கோவையில் சனிக்கிழமை (ஆகஸ்ட் 17) நடைபெற்றது. அப்போது அவரிடம் இட ஒதுக்கீடு தொடர்பான கேள்விகளை செய்தியாளர்கள் எழுப்பினர். அப்போது அவர் பேசிய பேச்சு ஆபாசமாக இருந்த நிலையில் அங்கிருந்த சக செய்தியாளர்கள் கிருஷ்ணசாமியுடன் வாக்குவாதத்தில் ஈடுபட்டனர். இதனால் செய்தியாளர்கள் சந்திப்பின்போது பரபரப்பு ஏற்பட்டது.

திணறிய கிருஷ்ணசாமி

செய்தியாளர்களின் கேள்விகளுக்கு பதில் அளிக்க முடியாமல் திணறிய கிருஷ்ணசாமி, ஒரு கட்டத்தில் நிதானம் இழந்து அச்சில் ஏற்ற முடியாத வார்த்தையை நேரலையில் பேசி இருக்கிறார். அவர் இதுபோன்று நடந்து கொண்டிருப்பது முதல் முறையல்ல என்பதால் செய்தியாளர்களுக்கு வியப்பு ஏற்படவில்லை.

முதிர்ச்சியற்ற தன்மை

அரசியல் அரங்கில் தன்னை முக்கிய தலைவராக கருதி கொள்ளும் மருத்துவர் கிருஷ்ணசாமி, அச்சில் ஏற்ற முடியாத வார்த்தையை பேசி இருப்பது அவரது முதிர்ச்சியற்ற தன்மையை காட்டுகிறது. அவரது இந்த பேச்சு பத்திரகையாளர்கள் இடையே கொந்தளிப்பை ஏற்படுத்தியுள்ளது.

தனது அரசியல் சுயலாபங்களுக்காக சக அரசியல் தலைவர்களிடம் தனது கொள்கைகளையும், சுயமரியாதையையும் அடகு வைப்பதை அவர் பெருமிதமாக நினைக்கலாம். ஆனால் பத்திரிகையாளர்கள் பொதுவெளியில் தங்களின் கண்ணியம், சுயமரியாதையை விட்டுக்கொடுக்க ஒரு போதும் தயாராக இல்லை என்பதை இந்த நேரத்தில் சுட்டிக்காட்ட விரும்புகிறோம்.

இதற்கு முன்பும் மருத்துவர் கிருஷ்ணசாமி இதேபோல் செய்தியாளர் ஒருவரின் சாதிய பின்புலத்தை ஆராய்ந்து அதற்காக கடும் கண்டனத்தை சந்தித்திருக்கிறார். யாகாவாராயினும் நாகாக்க என்ற வள்ளுவரின் சொல்லை அவர் அறிந்திருக்க வாய்ப்பு இல்லை என்று இந்த சம்பவம் மீண்டும் நினைவூட்டுகிறது.

பகிரங்க மன்னிப்பு கேட்க வேண்டும்

ஒருவர் கற்ற கல்வியும் சமூகத்தில் அவருக்கான மரியாதையும் அவரது சொல்லும் செயலுமே உறுதிப்படுத்தும் என்பதை மீண்டும் ஒருமுறை அவருக்கு சுட்டிக்காட்ட வேண்டியுள்ளது.

கோவை மாவட்டத்தின் மூத்த பத்திரிகையாளராகவும், சமூக அக்கறை கொண்டவராகவும் இருந்து வரும் குருசாமியிடம், அச்சில் ஏற்ற முடியாத வார்த்தையை பேசிய மருத்துவர் கிருஷ்ணசாமி பகிரங்கமாக மன்னிப்பு கேட்க வேண்டும். இதை கோவை பத்திரிகையாளர் மன்றம் அழுத்தம் திருத்தமாக வலியுறுத்துகிறது. அதுவே மனித நாகரிகத்தின் மாண்பும் கூட.

ஊடக நெறிமுறையை பின்பற்றுவோம்

கிருஷ்ணசாமி மன்னிப்பு கேட்க தவறும்பட்சத்தில் ச்சி..போ.. என புறந்தள்ளி ஊடகவியலாளர்கள் எப்போதும் போல் எங்கள் கடமையை செய்து கொண்டுதான் இருப்போம். அரசியலில் தனது இருப்பை தக்க வைத்துக்கொள்வதற்காக ஊடக வெளிச்சத்தை எதிர்பார்த்து நீங்கள் அழைக்கும்போது நாங்கள் வருவோம்.

நீங்கள் ஒரு அரசியல்வாதி என்பதற்காக அல்ல..ஒவ்வொரு மனிதனில் குரலையும் இந்த சமூகம் கேட்க வேண்டும் என்கிற ஊடக நெறிமுறைதான்.

இண்ருழ்த்தும் நாறா மலரனையர் கற்றது உணர விரித்துரையா தார் என்ற திருக்குறளை மருத்துவர் கிருஷ்ணசாமி ஒரு முறை பொருள் உணர்ந்து படித்து கொள்வது சால சிறந்ததாக இருக்கும் என கோவை பத்திரிகையாளர்கள் மன்றம் கருதுகிறது.

இவ்வாறு அந்த அறிக்கையில் கூறப்பட்டுள்ளது.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews

Facebook" https://www.facebook.com/HTTamilNews

You Tube: https://www.youtube.com/@httamil

Google News: https://tamil.hindustantimes.com/