Manu Bhaker: இரண்டு பதக்கங்களை வெல்ல காரணமாக இருந்த துப்பாக்கி..! மோடியிடம் காண்பித்த மனு பாக்கர்

பெண்களுக்கான 10 மீட்டர் ஏர் பிஸ்டல் போட்டியில் வெண்கலம் வென்று, ஒலிம்பிக்கில் பதக்கம் வென்ற இந்தியாவின் முதல் பெண் துப்பாக்கி சுடும் வீராங்கனை என்ற சாதனை புரிந்தார். இதன் பின்னர், கலப்பு 10 மீட்டர் ஏர் பிஸ்டல் குழு போட்டியில் சக வீரர் சரப்ஜோத் சிங்குடன் இணைந்து வெண்கலம் வென்றார்.

பிரதமர் மோடியுடன் சந்திப்பு

பிரதமர் நரேந்திர மோடி டெல்லியில் உள்ள அவரது இல்லத்தில் ஒலிம்பிக்கில் பங்கேற்ற இந்திய அணியினரை சந்தித்தார். அப்போது மனு பாக்கர், தனக்கு இரண்டு பதக்கங்களை வெல்ல காரணமாக இருந்த கைத்துப்பாக்கியை பிரதமரிடம் காண்பித்தார். தொடர்ந்து தனது பதக்கங்களை பிரதமரிடம் கொடுத்தார்.

ஒலிம்பிக் வீரர்கள், வீராங்கனைகளுடனான சந்திப்பு குறித்து பிரதமர் மோடி தனது எக்ஸ் பக்கத்தில், "பாரிஸ் ஒலிம்பிக்கில் நமது நாட்டைப் பிரதிநிதித்துவப்படுத்திய இந்தியக் குழுவுடன் உரையாடியது மகிழ்ச்சி அளிக்கிறது. விளையாட்டுகளில் அவர்களின் அனுபவங்களைக் கேட்டறிந்து, விளையாட்டுத் துறையில் அவர்களின் சாதனைகளைப் பாராட்டினேன்.

பாரிஸுக்குச் சென்ற ஒவ்வொரு வீரரும் சாம்பியன்கள். இந்திய அரசு விளையாட்டுக்கு தொடர்ந்து ஆதரவளித்து, உயர்தர விளையாட்டு உள்கட்டமைப்பு உருவாக்கப்படுவதை உறுதி செய்யும்." என்று பதிவிட்டார்.

இந்திய ஹாக்கி அணி பரிசு

இந்திய ஆடவர் ஹாக்கி அணி வீரர்களும், அதன் உறுப்பினர்கள் கையெழுத்திட்ட ஹாக்கி ஸ்டிக் பிரதமருக்கு பரிசாக அணியினர் வழங்கினர். அதன் பின்னர் அவர்கள் கழுத்தில் பதக்கங்களுடன் பிரதமர் மோடியுடன் புகைப்படம் எடுத்துக்கொண்டனர்.

இந்த சந்திப்பின் ஈட்டி எறிதலில் வெள்ளிப்பதக்கம் வென்ற நீரஜ் சோப்ரா பங்கேற்கவில்லை. பாரிஸ் ஒலிம்பிக் முடிந்த கையோடு இடுப்பு காயத்துக்கு சிகிச்சை பெற அவர் ஜெர்மனி சென்றுள்ளார். விரைவில் ஐரோப்பாவில் நடைபெற இருக்கும் டைமண்ட் லீக் தொடரில் அவர் பங்கேற்பார் என எதிர்பார்க்கப்படுகிறது

ஒலிம்பிக்கில் சிறப்பாக செயல்பட்ட பேட்மிண்டன் வீரர் லக்‌ஷயா சென், குத்துச்சண்டை வீராங்கனை லோவ்லினா போர்கோஹைன் மற்றும் பளுதூக்கும் வீராங்கனை மீராபாய் சானு ஆகியோரையும் பிரதமர் மோடி சந்தித்து உரையாடினார்.

பாரிஸ் ஒலிம்பிக்கில் இந்தியா வென்ற பதக்கங்கள்

சமீபத்தில் நடந்து முடிந்த பாரிஸ் 2024 ஒலிம்பிக் போட்டியில் இந்தியா மொத்தம் ஆறு பதக்கங்களை வென்றது. இந்த வென்ற அனைத்து பதக்கங்களும் வெண்கல பதக்கமாகும். இதில் துப்பாக்கி சுடுதலில் மனு பாக்கர் 2 பதக்கங்களையும், (இதில் ஒன்று குழு போட்டியில் சரப்ஜோத் சிங்குடன் இணைந்து வென்றார்), துப்பாக்கி சுடுதலில் மற்றொரு பதக்கமாக ஸ்வப்னில் குசேலும் வெண்கலம் வென்றார்.

ஆடவர் ஈட்டி எறிதலில் நீரஜ் சோப்ரா வெள்ளிப் பதக்கம் வென்றார். அதேபோல் ஆடவர் ஹாக்கி அணி ஸ்பெயினை வீழ்த்தி வெண்கல பதக்கம் வென்றது. அமன் செராவத் மல்யுத்தத்தில் வெண்கல பதக்கத்துடன் திரும்பினார்.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews

Facebook" https://www.facebook.com/HTTamilNews

You Tube: https://www.youtube.com/@httamil

Google News: https://tamil.hindustantimes.com/