NEET UG Revised Results: நீட் இளங்கலை திருத்தப்பட்ட முடிவுகள் வெளியீடு: முதலிடம் பிடித்தவர்களின் எண்ணிக்கை 17ஆக குறைவு!
NEET UG Revised Results: நீட் இளங்கலை திருத்தப்பட்ட முடிவுகள் வெளியீடு மற்றும் முதலிடம் பிடித்தவர்களின் எண்ணிக்கை 17ஆக குறைந்துள்ளது.
NEET UG Revised Results: நீட் இளங்கலை 2024-ன் திருத்தப்பட்ட முடிவுகளை தேசிய தேர்வு முகமை வெளியிட்டதில், 61ஆக இருந்த முதலிடம்பெற்றவர்களின் எண்ணிக்கை 17ஆக குறைந்துள்ளது.
சமீபத்தில் மருத்துவப் படிப்பில் படிப்பதற்கான நுழைவுத்தேர்வான நீட் இளங்கலை நுழைவுத்தேர்வு முடிவுகளின்படி, மொத்தம் 24 லட்சத்து 06 ஆயிரத்து 79 பேர் தேர்வு எழுதினர். அதில் 23 லட்சத்து 33 ஆயிரத்து 162 பேர் தேர்வு எழுதினர். மொத்தம் 13 லட்சத்து 15 ஆயிரத்து 853 பேர் தேர்ச்சி பெற்றுள்ளதாக தேசியத் தேர்வு முகமை தெரிவித்துள்ளது.
நீட் வினாத்தாள் கசிவு, விடைகளில் இருந்த குழப்பத்துக்குப் பின், உச்ச நீதிமன்ற உத்தரவுக்கு இணங்க, நீட் இளங்கலை 2024-ன் திருத்தப்பட்ட முடிவுகளை தேசிய தேர்வு முகமை (என்.டி.ஏ) வெளியிட்ட பின்னர், முதலிடம் பெற்ற 61 தேர்வர்களில் 17 பேர் மட்டுமே நீட்டில் முதலிடம்பெற்றவர்களாக அறிவிக்கப்பட்டுள்ளனர்.
சர்ச்சைக்குரிய கேள்விக்கு கிடைத்த தீர்வு:
நீட் இளங்கலை நுழைவுத்தேர்வின் சர்ச்சைக்குரிய இயற்பியல் கேள்விக்கு ஐஐடி டெல்லியின் பரிந்துரையைப் பின்பற்றவும்; முடிவுகளை மீண்டும் ஒப்பிடவும் உச்ச நீதிமன்றம் தேசிய தேர்வு முகமைக்கு உத்தரவிட்டது. டெல்லி ஐ.ஐ.டி.யின் நிபுணர் குழு, இந்த கேள்விக்கு ஒரே ஒரு சரியான பதில் மட்டுமே இருப்பதாகவும், இரண்டு அல்ல என்றும் உச்ச நீதிமன்றத்தில் தெரிவித்திருந்தது.
இதன் விளைவாக, 44 வேட்பாளர்களில் ஒவ்வொருவரும் நான்கு முதல் ஐந்து மதிப்பெண்களை இழந்து, முதலிடம் பெற்றவர்களின் எண்ணிக்கை 17 ஆகக் குறைந்தது.
முதலிடம்பெற்றவர்களில் யார் எந்த மாநிலத்தைச் சார்ந்தவர்கள்?:
நீட் தேர்வு முடிவுகளின்படி, முதலிடம்பெற்றவரில் 17 பேரில், அதிக மதிப்பெண் பெற்றவர்கள் ராஜஸ்தானைச் சேர்ந்தவர்கள், நான்கு பேர் 720 மதிப்பெண் பெற்றவர்கள். அதைத் தொடர்ந்து மகாராஷ்டிராவைச் சார்ந்த மூன்று பேர் முதலிடம் பெற்றுள்ளனர்.
டெல்லி மற்றும் உத்தரப்பிரதேசத்தைச் சார்ந்தவர்கள் தலா இரண்டு முதல் இடங்களையும், பீகார், பஞ்சாப், மேற்கு வங்கம், தமிழ்நாடு, கேரளா மற்றும் சண்டிகர் ஆகிய மாநிலங்களில் இருந்து தலா ஒருவர் முதல் இடத்தையும் பிடித்துள்ளனர்.
முதல் 100 இடங்களைப் பிடித்த பட்டியலில் 6 பேர் 716 மதிப்பெண்களும், 77 பேர் 715 மதிப்பெண்களும் பெற்றுள்ளனர்.
பாலின வாரியான மதிப்பெண் விநியோகத்தைப் பார்த்தால், முதல் 20 பெண்கள் பட்டியலில் நான்கு பேர் 720 மதிப்பெண்களைப் பெற்றுள்ளனர். அதன்படி அவர்களின் பெயர்கள் பிராச்சிதா (ராஜஸ்தான்), பலன்ஷா அகர்வால் (மகாராஷ்டிரா), மானே நேஹா குல்தீப் (மகாராஷ்டிரா), இராம் குவாசி (ராஜஸ்தான்) ஆகியோர் ஆவர்.
திருத்தப்பட்ட நீட் முடிவுகளில் முதலிடம் பெற்றவர்களின் எண்ணிக்கை 61-ல் இருந்து 17 ஆக குறைந்துள்ளது. 13ஆண்கள் 720 மதிப்பெண்கள் பெற்றுள்ளனர். அவர்களின் பெயர்கள்: மிருதுல் மான்யா ஆனந்த் (டெல்லி), ஆயுஷ் நௌக்ரையா (உத்தரபிரதேசம்), மாசின் மன்சூர் (பீகார்), சவுரவ் (ராஜஸ்தான்), திவ்யான்ஷ் (டெல்லி), குன்மய் கார்க் (பஞ்சாப்), அர்க்யதீப் தத்தா (மேற்கு வங்கம்), சுபம் சென்குப்தா (மகாராஷ்டிரா), ஆர்யன் யாதவ் (உத்தரபிரதேசம்), ரஜ்னீஷ் பி (தமிழ்நாடு), ஸ்ரீனந்த் ஷர்மில் (கேரளா), தைஜாஸ் சிங் (சண்டிகர்), தேவேஷ் ஜோஷி (ராஜஸ்தான்) ஆகியோர் ஆகும்.
மேலும், மாநில வாரியான நீட் திருத்தப்பட்ட முடிவுகள் தரவுகளின்படி, அதிகபட்சமாக உத்தரபிரதேசத்தில் இருந்து 1,65,015 பேரும்; மகாராஷ்டிராவில் 1,42,829 பேரும்; ராஜஸ்தானில் 1,21,166 பேரும் தகுதி பெற்றுள்ளனர்.
’தினமும் 5 மணிநேரத்தூக்கம் மட்டுமே’: நீட்டில் அதிகமதிப்பெண் பெற்றவர்!
பல மாத எதிர்பார்ப்புக்குப் பிறகு திருத்தப்பட்ட முடிவுகள் தேர்வர்களுக்கு ஒரு புதிய நம்பிக்கை ஒளியைக் கொண்டு வந்துள்ளது குறிப்பிடத்தக்கது. உதாரணமாக, 720 மதிப்பெண் பெற்ற உத்தரபிரதேசத்தைச் சேர்ந்த ஆயுஷ் நௌக்ரையா, இதயவியலில் நிபுணத்துவம் பெற விரும்புகிறார். மேலும் இந்தியாவில் நோயாளிகளின் பராமரிப்பை மேம்படுத்துவதற்கான ஆராய்ச்சியை மேற்கொள்ள விரும்புகிறார்.
இந்துஸ்தான் டைம்ஸிடம் பேசிய ஆயுஷ், "இதயவியலில் ஆராய்ச்சிக்கு நிறைய வாய்ப்புகள் உள்ளன. இதயத்துறையில் பங்களிக்க திட்டமிட்டுள்ளேன். டெல்லி எய்ம்ஸ் மருத்துவமனையில் படிக்க வாய்ப்புகேட்பேன்’’ என்றார்.
ஜான்சியை பூர்வீகமாகக் கொண்ட ஆயுஷ், லக்னோவில் உள்ள ஒரு பள்ளியில் தனது இடைநிலை வகுப்புகளை முடித்து, 2024 வாரியத் தேர்வில் 99 சதவீத விழுக்காடைப் பெற்றார். உண்மையில், இது நீட்-யுஜியில் அவரது முதல் முயற்சியாகும். இதில் அவர் 99.9992714 சதவீதத்துடன் முதலிடம் பிடித்துள்ளார்.
தனது தயாரிப்பு முறையைப் பற்றி பகிர்ந்து கொண்ட ஆயுஷ், "நான் காலை 8 மணி முதல் மதியம் 2 மணி வரை பள்ளிக்குச் செல்வேன். பின்னர் இரவு 8 மணி வரை நீட் பயிற்சிக்குச்செல்வேன். இரவு 8 மணி முதல் அதிகாலை 2 மணி வரை படிப்பைத் தொடர்ந்தேன். காலை 7 மணி வரை தூங்குவேன். அதாவது 5 மணிநேரத்தூக்கம்’’ என்று தெரிவித்தார்.
மருத்துவ ஆலோசனை:
அடுத்து, மருத்துவ ஆலோசனைக் குழு (எம்.சி.சி) மற்றும் மாநில ஆலோசனை அமைப்புகள் யுஜி மருத்துவ சேர்க்கைக்கான ஆன்லைன் கவுன்சிலிங் செயல்முறையைத் தொடங்கும். தேசிய தேர்வு முகமையின் நீட் திருத்தப்பட்ட முடிவுகளின்படி, ஆலோசனையின் விவரங்கள் மற்றும் அட்டவணை மாநிலங்களின் சுகாதார அமைச்சகம் மற்றும் மருத்துவக் கல்வி இயக்குநரகங்களின் வலைத்தளங்களில் கிடைக்கும் எனத் தெரிவிக்கப்பட்டுள்ளது.
