Heatwave Warning: வரும் மே 21ஆம் தேதி வரை புதிய வெப்ப அலைவீசும்: இந்திய வானிலை ஆய்வுமையம் எச்சரிக்கை

மே 17 முதல் 21 வரை ராஜஸ்தான், பஞ்சாப், ஹரியானா மற்றும் டெல்லியின் பல பகுதிகள் உட்பட வட இந்தியா முழுவதும் கடுமையான வெப்ப அலை நிலைகளை வானிலைத் துறை கணித்துள்ளது.

மே 17 முதல் 21 வரை உத்தரப்பிரதேசத்தின் சில பகுதிகளிலும், மே 17 முதல் 21 வரை குஜராத்தின் தனிமைப்படுத்தப்பட்ட பகுதிகளிலும், மே 17 முதல் 20 வரை பீகாரிலும், மே 19 முதல் 20 வரை ஜார்க்கண்டிலும், மே 18 முதல் 21 வரை வடக்கு மத்தியப் பிரதேசத்திலும், மே 18 முதல் 20 வரை மேற்கு வங்கத்திலும், மே 20 மற்றும் 21 தேதிகளில் ஒடிசாவிலும் வெப்ப அலை வீசக்கூடும் என்று இந்திய வானிலை ஆய்வுமையம் தெரிவித்துள்ளது.

புதிய வெப்ப அலை:

தென்மேற்கு டெல்லியில் உள்ள நஜாகர் நகரில் 47 டிகிரி செல்சியஸுக்கு மேல், வெப்பநிலைப் பதிவாகி நாட்டின் வெப்பமான இடமாக அது மாறியது. 

 மேற்கு ராஜஸ்தானுக்கு கடுமையான வெப்ப அலைக்கான சிவப்பு எச்சரிக்கை விடுக்கப்பட்ட நிலையில், கிழக்கு ராஜஸ்தான், டெல்லி, பஞ்சாப், ஹரியானா, உத்தரபிரதேசம், பீகார் மற்றும் குஜராத் ஆகிய மாநிலங்களுக்கு புதிய வெப்ப அலைக்கான ஆரஞ்சு எச்சரிக்கை விடுக்கப்பட்டது. ஒடிசா, ஜார்க்கண்ட்,  மேற்கு வங்கம் மற்றும் மத்திய பிரதேசத்திற்கு வெப்ப அலை போன்ற நிலைக்கு மஞ்சள் எச்சரிக்கை விடுக்கப்பட்டது.

உயரும் வெப்பநிலை:

இமாச்சலப் பிரதேசத்தின் உனா இந்தப் பருவத்தின் அதிகபட்ச வெப்பநிலையை 43.2 டிகிரி செல்சியஸாகவும், ஆக்ராவில் 46.9 டிகிரி செல்சியஸாகவும் பதிவாகியுள்ளது. சண்டிகரில் அதிகபட்சமாக 44.5 டிகிரி செல்சியஸ் வெப்பநிலை பதிவாகியுள்ளது. இது நகரத்தில் பதிவான மூன்றாவது மிக உயர்ந்த வெப்பநிலையாகும்.

ராஜஸ்தானின் பார்மரில் வெள்ளிக்கிழமை அதிகபட்சமாக 46.5 டிகிரி செல்சியஸும், டெல்லியின் ஆயாநகரில் 46.2 டிகிரி செல்சியஸும் வெப்பநிலைப் பதிவாகியுள்ளது. மத்திய பிரதேசத்தின் குவாலியரில் 44.9 டிகிரி செல்சியஸ் பதிவானது. குஜராத்தின் சுரேந்திரநகரில் 44.7 டிகிரி செல்சியஸும், பஞ்சாபின் பாட்டியாலாவில் 44.4 டிகிரி செல்சியஸும் பதிவாகியுள்ளது.

விலங்குகளுக்கு குளிர்ச்சியான சீதோஷண நிலைக்கு ஏற்பாடு:

இடைவிடாத வெப்ப அலைக்கு மத்தியில், ஜெய்ப்பூரின் நஹர்கர் உயிரியல் பூங்காவில் உள்ள விலங்குகள் குளிர்ச்சியாக இருக்க உதவ சிறப்பு நடவடிக்கைகள் எடுக்கப்பட்டன. இந்த ஏற்பாடுகள் குறித்து பேசிய நஹர்கர் உயிரியல் மற்றும் விலங்கியல் பூங்காவின் மூத்த வனவிலங்கு கால்நடை அதிகாரி டாக்டர் அரவிந்த் மாத்தூர், "சில விலங்குகளின் உணவுகளும் மருத்துவ ஆலோசனையின் பேரில் மாற்றப்பட்டுள்ளன. கரடிகளுக்கு பார்லி அடிப்படையிலான பானங்கள் மற்றும் பழ ஐஸ்கிரீம் கூடுதலாக வழங்கப்படுகின்றன. மான் போன்ற தாவர உண்ணிகளுக்கு தர்பூசணி, வெள்ளரி போன்றவை உணவாக அளிக்கப்பட்டு வருகின்றன. 

அனைத்து கால்நடைகளுக்கும் திரவ உட்கொள்ளலை அதிகரிக்க சுழற்சி முறையில் எலக்ட்ரோ மற்றும் குளுக்கோஸ் செலுத்தப்படுகிறது. அவர்களுக்கு குடற்புழு நீக்கம் செய்யப்பட்டு 24/7 கண்காணிக்கப்படுவதுடன், ஊட்டச்சத்து மருந்துகளும் வழங்கப்படுகின்றன.

இதேபோல், கான்பூர் உயிரியல் பூங்காவில் விலங்குகளுக்கு வெப்ப அலையில் இருந்து சிறிது நிவாரணம் அளிக்க தெளிப்பான்கள் மற்றும் குளிரூட்டிகள் அமைக்கப்பட்டுள்ளன’’ என்றார்.