‘அடடா மழ டா அட மழ டா’ மழைக்காலங்களில் செய்யக்கூடியது மற்றும் செய்யக்கூடாதவை – விளக்கும் மருத்துவர்!

மழைக்காலத்தில் நாம் உண்ணும் எப்படியிருக்கவேண்டும்?

மழைக்காலத்தில் நாம் உண்ணும் உணவு ஆரோக்கியமாகவும், எளிதில் செரிக்ககூடியதாகவும், சுகாதாரமானதாகவும் இருக்கவேண்டும். அதற்கு நீங்கள் கீழே கொடுக்கப்பட்டுள்ள சில எளிய முறைகளை பின்பற்றி பலன்பெறுங்கள்.

சூடான உணவு

மழைக்காலத்தில் சமைத்த உணவை ஆறிய பின்னர் சாப்பிடக்கூடாது. இளஞ்சூடாக இருக்கும்போதே சாப்பிடவேண்டும். அப்போதுதான் அதன் சுவையும், மணமும் நன்றாக இருக்கும். சூடான உணவுதான் சாப்பிட்டவுடன் செரிக்க ஏதுவாக இருக்கும்.

பழைய சாதம் மற்றும் நீராகாரம் தவிர முதல் நாள் சமைத்த எந்த உணவையும் அடுத்த நாள் சூடாக்கி எடுத்துக்கொள்ளக் கூடாது.

மழை மற்றும் பனிக்காலத்தில் நுரையீரல் மற்றும் சைனஸ் பிரச்னைகள் இருப்பவர்கள், பழைய சோறு சாப்பிடக்கூடாது.

சமைத்த உணவுப் பொருட்களை எப்போதும் திறந்து வைத்திருக்ககூடாது. சமைத்த உணவை சூடு ஆறும் முன்பே சாப்பிடவேண்டும். சமைத்து வைத்து 3 மணி நேரம் கழித்து சாப்பிடக்கூடாது.

ஒவ்வொரு முறையும் புதிதாக சமைத்து சாப்பிடுவதால் உணவுப்பையில் செரிமன பிரச்னைகளை ஏற்படாது. வயிற்றில் மலக்கட்டு ஏற்படாது. சமைத்த உணவுகளை அதிகபட்சமாக 3 மணிநேரம் வைத்திருக்கலாம்.

அதற்கு மேற்பட்ட நேரம் வைத்திருந்து சாப்பிடும்போதுதான் செரிமனக்கோளாறுகள், மலக்கட்டு, புளித்த ஏப்பம், வயிற்றில் வாயு சேருவது, வாந்தி, வயிற்றுப்போக்கு போன்றவை ஏற்படுத்துகிறது.

உணவு எவ்வளவு ருசியாக இருந்தாலும் அளவோடுதான் சாப்பிடவேண்டும். அதாவது அரை பங்கு உணவுதான் சாப்பிட வேண்டும். கால் பங்கு காய்ச்சிய தண்ணீர் குடிக்க வேண்டும். எஞ்சிய கால் பங்கு வயிறு காலியாக இருக்கவேண்டும். வயிறு முட்ட முட்ட சாப்பிடக்கூடாது.

சாப்பிடும் முன்னரும், சாப்பிடும்போதும் தண்ணீர் குடிக்கக்கூடாது. சாப்பிட்டு 10 நிமிடங்கள் கழித்துதான், தண்ணீர் பருகவேண்டும். சாப்பிட்டவுடன் சிறிது தூரம் எப்போதும் நடக்கவேண்டும். அதன் பின்னர் தான் தண்ணீர் அருந்தவேண்டும். வீட்டை விட்டு வெளியே சென்று நடக்க முடிந்தால் நல்லது அல்லது வீட்டிற்கு உள்ளே நடக்கலாம்.

சாப்பிடும் முன் என்ன செய்யவேண்டும்?

மழைக் காலங்களில் மட்டுமல்ல எல்லா காலங்களிலும் சாப்பிடும் முன்னர் இரண்டு கை, கால்கள் மற்றும் முகத்தை நன்றாக கழுவவேண்டும். வாயை சாப்பிடுவதற்கு முன்னரும், பின்னரும் கொப்பளிக்கவேண்டும். அப்போதுதான் தொற்றுநோய்கள் ஏற்படாமல் காக்கப்படும்.

எந்த உணவை சாப்பிடும்போதோ அல்லது பானத்தை பருகும்போதோ வாய் கொப்பளிக்க வேண்டும். அப்போதுதான் உணவுத்துகள்கள் வாயில் தங்கி வாய் துர்நாற்றத்தை ஏற்படுத்தாது. வாயில், பற்களில் எந்த தொற்றும், பற்களில் கரையும் ஏற்படாமல், சொத்தைப் பற்கள் வராமல் தடுக்க முடியும். இது குழந்தைகளுக்கு வயிற்று பூச்சி தொந்தரவு வராமல் தடுக்க உதவும். எந்த வயதிலும் சொத்தைப் பற்கள் வராமல் தடுக்க உதவும். வாய் துர்நாற்றம் ஏற்படாது.