Telugu Actor Sunil: சபரிமலை ஐயப்பன் கோயிலில் இருமுடி கட்டி நடிகர் சுனில் சாமி தரிசனம்!
விரதமிருந்து, இருமுடி கட்டி சபரிமலைக்கு சென்ற தெலுங்கு நடிகர் சுனில் சுவாமி ஐயப்பனை தரிசனம் செய்துள்ளார்.
கேரளா சபரிமலை ஐயப்பன் கோயிலுக்கு பொதுமக்கள் மட்டுமல்லாமல், சினிமா பிரபலங்கள் மாலை அணிந்து, விரதம் இருந்து செல்கிறார்கள். அந்த வகையில் பிரபல தெலுங்கு காமெடி நடிகரும், தமிழில் கடந்த ஆண்டு வெளியாகி சூப்பர் ஹிட்டான ஜெயிலர், மார்க் ஆண்டனி படங்களில் முக்கிய கதாபாத்திரத்தில் தோன்றிய சுனில் சாமி தரிசனம் செய்துள்ளார்.
முன்னதாக, மாலை அணிந்து விரதமிருந்த சுனில், ஜனவரி 5ஆம் தேதி இருமுடி கட்டி சபரிமலை சென்று சுவாமி ஐயப்பனை தரிசனம் செய்துள்ளார்.
இவரை போல் இன்னும் சில சினிமா பிரபலங்களும் கடந்த நவமபர், டிசம்பர் மாதங்களில் ஐயப்பன் கோயில் சென்று சாமி தரிசனம் செய்தனர். வரும் 15ஆம் தேதி மாலை மகர ஜோதி தரிசனம் நடைபெற இருக்கும் நிலையில், அன்றைய நாளி சுவாமி ஐயப்பனை தரிசிப்பதற்காக ஏரளமான பக்தர்கள் சபரிமலைக்கு வருகை புரிவார்கள்.
மண்டல மற்றும் மகர விளக்கு பூஜைக்காக கடந்த நவம்பர் 16ஆம் தேதி சபரிமலை ஐயப்பன் கோயில் நடை திறக்கப்பட்டது. இதையடுத்து 41 நாள்கள் கழித்து மூடப்பட்டு மீண்டும் டிசம்பர் 29ஆம் தேதி திறக்கப்பட்டது.
இதைத்தொடர்ந்து விரதமிருந்து சாமி தரிசனம் செய்வதற்கு பக்தர்களின் வருகையும் அதிகரிக்க தொடங்கியது.
வரும் 19ஆம் தேதி வரை சபரிமலை ஐயப்பன் கோயிலில் மகர விளக்கு பூஜைகள் நடைபெறவுள்ளன. ஜனவரி 20ஆம் தேதி பந்தளம் ராஜ குடும்ப பிரதிநிதி தரிசனத்துக்கு பின் கோயில் நடை அடைக்கப்படும்.
காமெடி நடிகரான சுனில் தற்போது வில்லன் கதாபாத்திரத்திலும் நடித்து வருகிறார். இந்த ஆண்டில் சுனில் நடிப்பில் புஷ்பா 2, கேம் சேஞ்சர், குண்டூர் காரம் எதிர்பார்ப்பை ஏற்படுத்தியிருக்கும் படங்களாக உள்ளன.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
