சூப்பர் ஸ்டார் ஹிட்ஸ்.. ரஜினிகாந்த் கையெப்பமிட்ட பரிசு! இந்த வார சூப்பர் சிங்கர் நிகழ்ச்சியில் காத்திருக்கும் சர்ப்ரைஸ்

சூப்பர் ஸ்டார் ஹிட்ஸ்

இந்த சூப்பர் சிங்கர் ஜூனியர் நிகழ்ச்சி தொடங்கி சில வாரங்களே ஆனா நிலையில் டிசம்பர் 12ஆம் தேதி சூப்பர் ஸ்டார் ரஜினிகாந்த் பிறந்தநாளை முன்னிட்டு ஒரு சிறப்பு ரவுண்டு இந்த மேடையில் அரங்கேற உள்ளது. டிசம்பர் 7, 8, 2024 ஆகிய தேதிகளில் ஒளிபரப்பாகும் நிகழ்ச்சியில் ‘சூப்பர் ஸ்டார் ஹிட்ஸ்’ ரவுண்டில் குழந்தைகள் சூப்பர் ஸ்டாரின் ‘ஹிட்’ பாடல்களை தேர்வு செய்து தங்கள் திறமையை வெளிப்படுத்தி போட்டியை சந்திக்க உள்ளனர்.

இதில் சிறப்பாக பாடும் ஒரு குழந்தையை தேர்வுசெய்து அவருக்கு ஒரு பரிசு அளிக்கப்படுகிறது. சூப்பர் ஸ்டார் ரஜிகாந்த் தானே கையெழுத்திட்ட ஒரு கிட்டார் பரிசாக காத்திருக்கிறது. அதை வெல்லப்போவது யார் என்பதை வரும் டிசம்பர் 7, 8, சனி மற்றும் ஞாயிறு மாலை 6.30 மணிக்கு விஜய் டிவியின் சூப்பர் சிங்கர் ஜூனியர் சீசன் 10ல் கண்டு ரசிக்கலாம்.

சூப்பர் சிங்கர் சீசன் 10

இந்த நிகழ்ச்சியின் கௌரவமிக்க நடுவர்களாக பிரபல பின்னணி பாடகர்கள் மனோ, சின்னக்குயில் சித்ரா மற்றும் இசையமைப்பாளர் டி. இமான் ஆகியோர் உள்ளனர். இதையடுத்து இந்த சீசனில் பங்கேற்றுக்கொண்டிருக்கும் குழந்தைகளுக்கு பல நெகிழ்வான கதைகள் உள்ளது. சூப்பர் சிங்கர் ஜூனியர் நிகழ்ச்சி தொடங்கும் முன்பு இந்த நிகழ்ச்சி சார்ந்த ப்ரோமோ வெளிவந்தது. அதில், ராணிப்பேட்டையில் இருந்து நஸிரீன், சேலத்தில் இருந்து ரேணுகா கோவையில் இருந்து ப்ரனேஷ் மற்றும் சென்னையில் இருந்து சாராஸ்ருதி ஆகியோர்கள் இந்த சூப்பர் சிங்கர் ஜூனியர் போட்டியில் கலந்துகொள்ள எத்தகைய சவால்களை கடந்து வந்து பங்கேற்றுள்ளனர் என்பதை அழகாக எடுத்துக்கூறியது பார்ப்பவர்கள் நெஞ்சங்களை உருகச்செய்தது.

“ஒவ்வொரு குரலும் ஒரு கதை சொல்லும்” என்ற ‘டேக்லைனு’க்கு ஏற்ப அவர்கள் வாழ்க்கையில் சந்திக்கும் இன்னல்களும் ஏராளமாக இருக்கின்றன. அத்தகைய, திறமை மிக்க குழந்தைகளை இந்த மேடை அறிமுகம் செய்து வைத்து இந்த உலகில் அவர்கள் தங்களது வெற்றியின் உச்சத்தை அடைய வைப்பதில் பெருமை கொள்கிறது.

முதல் முறையாக இசையமைப்பாளர் டி. இமான்

டிவி ரசிகர்களால் விரும்பி பார்க்கப்படும் இசை நிகழ்ச்சியாக இருந்து வரும் சூப்பர் சிங்கர் ஜூனியர் சீசன் 10 கடந்த மாதம் 16ஆம் தேதி முதல் ஒளிபரப்பாகி வருகிறது. வாரந்தோறும் சனி மற்றும் ஞாயிற்றுக்கிழமைகளில் மாலை 6:30 மணிக்கு இந்த நிகழ்ச்சி விஜய் டிவியில் ஒளிபரப்பாகிறது.  

இந்த நிகழ்ச்சியில் தற்போது நடைபெற்றும் வரும் சீசனில் முதல் முறையாக, இசையமைப்பாளர் டி. இமான் நடுவர்களில் ஒருவராக இணைந்துள்ளார். சூப்பர் சிங்கர் நிகழ்ச்சியின் கடந்த சீசன்களை தொகுத்து வழங்கிய மாகாபா ஆனந்த் மற்றும் பிரியங்கா தேஷ்பாண்டே ஆகியோர் இந்த சீசனிலும் மீண்டும் தொகுப்பாளர்களாக இணைந்துள்ளனர்.