பான் இந்தியா அளவில் கவனம் பெற்ற கோலிவுட் ஒளிப்பதிவாளர்..சமந்தா ஹீரோயினாக நடித்த முதல் பட இயக்குநர்
HBD Ravi varaman: பான் இந்தியா அளவில் கவனம் பெற்ற கோலிவுட் சினிமா ஒளிப்பதிவாளராக இருந்து வருகிறார் ரவிவர்மன். தமிழ், மலையாளம், இந்தி மொழிகளில் பல்வேறு ஹிட் படங்களுக்கு ஒளிப்பதிவு செய்த இவர் சமந்தா ஹீரோயினாக நடித்த முதல் தமிழ் படத்தை இயக்கியுள்ளார்.
இந்திய சினிமாவில் முக்கியமான ஒளிப்பதிவாளர்களில் ஒருவராகவும், கடந்த ஆக்ஸ்ட் மாதம் அறிவிக்கப்பட்ட 70வது தேசிய விருதில் பொன்னியின் செல்வன் படத்துக்காக சிறந்த ஒளிப்பதிவாளர் விருதை வென்றவராகவும் இருப்பவர் ரவிவர்மன்.
தமிழ், மலையாளம், இந்தி சினிமாக்களில் முக்கிய ஒளிப்பதிவாளராக இருந்து வரும் ரவிவர்மன், இயக்குநராகவும் மாஸ்கோவின் காவேரி என்ற ரொமாண்டிக் படத்தையும் இயக்கியுள்ளார்.
சினிமா பயணம்
தஞ்சாவூர் மாவட்டம் பட்டுக்கோட்டை அருகே பொய்யுந்தர்குடிகாடு என்ற கிராமம் தான் ரவிவர்மன் சொந்த ஊர் என கூறப்படுகிறது. சிறு வயதிலேயே தாய் தந்தையை இழந்தவர் ரவிவர்மன். தாயார் இறந்ததை படம் பிடிக்க வந்த விடியோகிராபரை பார்க்க ஸ்டுடியே சென்றபோது ரவிவர்மனுக்கு கேமரா பற்றிய அறிமுகம் கிடைத்துள்ளது. கேமரா பற்றி அனைத்து விஷயங்களையும் கேட்டு தெரிந்து கொண்ட அவர், பின்னர் சினிமாவில் சாதிக்க சென்னைக்கு வந்து முறையாக உதவி ஒளிப்பதிவாளராக ரவி கே சந்திரனிடம் பணிபுரிந்துள்ளார். தற்போது இந்தியாவின் டாப் ஒளிப்பதிவாளராக உயர்ந்து நிற்கிறார்.