Thug Life: ‘இந்தியன் 2,3 ஆனாலும் ஆச்சு..’: தக் லைஃப் படத்தில் மும்முரமாக இறங்கிய கமல்ஹாசன்

ராஜ்கமல் பிலிம்ஸ் இன்டர்நேஷனல், மெட்ராஸ் டாக்கீஸ் மற்றும் ரெட் ஜெயன்ட் மூவிஸ் இணைந்து தயாரிக்கும் படம், தக் லைஃப். நடிகர் கமல்ஹாசன், சிலம்பரசன், அசோக் செல்வன், த்ரிஷா, அபிராமி, நாசர், ஐஸ்வர்யா லெக்‌ஷ்மி, ஜோஜூ ஜார்ஜ் உள்ளிட்டப் பலர் நடித்துவருகின்றனர்'. ஒளிப்பதிவாளர் ரவி கே.சந்திரன் ஒளிப்பதிவு செய்ய, படத்தொகுப்பாளர் ஸ்ரீகர் பிரசாத் எடிட் செய்ய, ஏ.ஆர்.ரஹ்மான் இப்படத்துக்கு இசையமைக்கிறார். இப்படத்தை மணிரத்னம் எழுதி இயக்குகிறார்.

‘நாயகன்’ படத்துக்குப் பின் ‘தக் லைஃப்’:

'தக் லைஃப்’ படத்தின்மூலம் 36 ஆண்டுகளுக்குப் பின், கமல்ஹாசன் மற்றும் மணிரத்னம் ஆகியோர் மீண்டும் ஒன்றுசேர்ந்துள்ளது, உலக அளவில் மிகப்பெரிய கவனத்தை ஈர்த்துள்ளது. ஏனெனில், மும்பையில் கோலோச்சிய தாதா தமிழர் வரதராஜ முதலியாரின் வாழ்க்கையை அடிப்படையாகக் கொண்டு, 1987ஆம் ஆண்டு கமல்ஹாசனை வைத்து மணிரத்னம் இயக்கிய ‘நாயகன்’ திரைப்படம் உலகளவில் கல்ட் ஃபிலிமாக பார்க்கப்படுகிறது.

மேலும், டைம் வார இதழ் மற்றும் சிஎன்என் மற்றும் ஐபிஎன் நிறுவனம், குறிப்பிட்ட உலகின் நூறு சிறந்த திரைப்படங்களில் ஒன்றாக, ‘நாயகன்’ படம் உள்ளது. இதனால், கமல்ஹாசன் மற்றும் மணி ரத்னம் மீண்டும் இணைந்து உருவாகவுள்ள ‘தக் லைஃப்’படத்துக்கும் மிகப்பெரிய வரவேற்பு உலகளவில் இருக்கும் என்று எதிர்பார்க்கப்படுகிறது.

டைட்டில் வீடியோ ஏற்படுத்திய எதிர்பார்ப்பு: 

'தக் லைஃப்’ படத்தின் டைட்டில் அறிவிப்பு வீடியோவில், ஒரு வறண்ட மற்றும் புழுதி நிரம்பிய நிலத்தில் ஒருவர் நிற்கிறார். அவர் தன்னை ஒரு கிராமிய உடையில் மூடியிருக்கிறார். அவர் மீது தாக்குதல் நடத்தத் தயாராக ஐந்து பேர் தூரத்தில் பல்வேறு ஆயுதங்களை ஏந்தியபடி நிற்கிறார்கள். அடர்த்தியான மீசை மற்றும் தாடியுடன் அவரின் முகத்தைக் கேமரா காட்டுகிறது.

ஐந்து பேர் சேர்ந்து அவரை அடிக்க நெருங்கியதும், அவர் தனது முகத்தை மூடியிருந்த துணியை நீக்கி, ஒரு தற்காப்புக் கலை நிலையில் சண்டையிடத் தயாராகிறார். பின்னர், தன்னை தாக்க நினைப்பவர்களையும் கீழே விழ வைக்கிறார். அதன்பின் அவர் மீண்டும் தனது மேலங்கியை அணிந்து கேமராவைப் பார்த்து புன்னகைக்கிறார். அப்போது ‘’என்பேர் ரங்கராய சக்திவேல் நாயக்கன்'' என சொல்கிறார். மேலும் அவர் தன்னை கிரிமினல் எனப் பிறர் சொல்வதாகக் கூறுகிறார். படத்தின் தலைப்பு 'தக் லைஃப்' என்று வெளியிடப்படுகிறது.

‘’தக் லைஃப்'' படத்தில் சிம்பு:

‘’தக் லைஃப்'' படத்தின் முதல் செட்யூல் சென்னையில் முடிந்ததைத் தொடர்ந்து, இரண்டாவது செட்யூல் செர்பியாவில் நடைபெற்றுவருகிறது. இதனிடையே இப்படத்தில் நடித்து வந்த துல்கர் சல்மான், கால்ஷீட் பிரச்னைகளால் வெளியேறியதால் துல்கர் சல்மானுக்குப் பதிலாக, சிம்புவை நடிக்க வைத்திருக்கிறார், மணிரத்னம்.

இப்படத்தின் சூட்டிங்கிற்காக சிம்பு, ராஜஸ்தானின் ஜெய்சல்மர் பகுதியில் கடும் வெயிலில் நடித்துவருவதாகக் கூறப்படுகிறது. மேலும் படத்துக்காக, சிம்பு நீண்ட முடி வளர்த்து இருக்கிறார். இப்படத்தில் ‘விண்ணைத்தாண்டி வருவாயா’ படத்துக்குப் பின், சிம்புவின் ஜோடியாக திரிஷா நடிப்பதாகக் கூறப்படுகிறது.

ஆர்வமுடன் நடிக்கும் தக் லைஃப் படக்குழுவினர்:

படத்தின் தயாரிப்பாளர்களில் ஒருவரான சிவ ஆனந்த், ’தக் லைஃப் படம் மிகப் பிரமாதமாக இருக்கும். இந்த உற்சாகம் படக்குழுவில் பணியாற்றும் அனைத்து நடிகர்களிடமும் உள்ளது’ எனக் கூறியுள்ளார்.

தக் லைஃப் படத்தின் படப்பிடிப்பு தொடர்ச்சியாக 70 நாட்களைக் கடந்து நடைபெற்று வரும் நிலையில், இப்படத்தை ஆகஸ்ட் மாதத்துக்குள் முடிக்க படக்குழுவினர் திட்டமிட்டுள்ளனர். இதற்காக தனது 25 நாட்கள் கால்ஷீட்டை கமல்ஹாசன் கொடுத்துள்ளாராம். 

மேலும் இந்தியன் 2 படத்தின் இயக்கத்தினைப் பலரும் கலாய்த்து வரும் நிலையில், நடிகர் கமல்ஹாசன் தன் கவனத்தை ‘தக் லைஃப்’ படத்தில் செலுத்திவருகிறாராம். இதனால், இயக்குநர் ஷங்கர் சொன்ன ஆறு மாத காலத்துக்குள் இந்தியன் 3 படம் முடிக்கப்பட்டு ரிலீஸாகுமா என சந்தேகம் எழுந்துள்ளது.