100 கோடிப்பு.. அரண்மனையை சுற்றி வரும் வதந்திகள்.. முடித்து விட்ட குஷ்பு! நம்ப வச்சு ஏமாத்திட்டாங்களே

இரவு நேரங்களில் தனியாக செல்வது, வீட்டில் தனியாக இருப்பது போன்ற சமயங்களில் பெரியவர்களே ஆனாலும் பேய் பயம் வராமல் இருக்காது. அந்த அளவு பேய்க் கதைகள் மக்களிடம் தாக்கத்தை ஏற்படுத்தியுள்ளன.

அந்த பயத்தை தங்களுக்கான வியாபாரமாக பார்த்த சினிமா இயக்குநர்கள், பல ஆணடுகளாக வேறு வேறு வடிவில் பேய் படங்களை இயக்கி வருகின்றனர்.

ஜெகன் மோகினி- அரண்மனை

ஜெகன் மோகினியில் தொடங்கி அரண்மனை வரை வெளியான படங்களில் பழி வாங்குவதற்காகவும், தங்களின் நிறைவேறாத ஆசைகளை நிறைவேற்றிக் கொள்ளவும் உயிரிழந்தவர்கள் பேய்களாக வலம் வருவர். அவர்கள் மக்களுடன் மக்களாக இருப்பர். அவர்களுக்கு அபரிவிதமான சக்திகள் இருக்கும் என்பதை மையமாக வைத்தும், கூடு விட்டு கூடு பாய்ந்து காரியத்தை சாதிக்கும் எனவும் மக்கள் இன்றைய அறிவியல் காலகட்டத்திலும் நம்புகின்றனர். அதே சமயம் பேய் போன்ற துஷ்ட சக்திகளை கடவுளின் சக்தி மட்டுமே காப்பாற்றும் என்பதை சினிமாக்கள் தொடர்ந்து வலியுறுத்தி வருகின்றன.

மதங்கள் ஆதரிக்கும் படம்

இதற்கு இந்து, கிருத்துவம், இஸ்லாம் மதங்களும் ஆதரவு தெரிவிப்பது போலும் காட்சிகளை முன்வைத்து சம்மந்தப்பட்ட மக்களை மதரீதியான சிந்தனைகளில் மடை மாற்றுகின்றன.

இந்த அடிநாதத்தை சரியாக புரிந்து கொண்ட இயக்குநர் சுந்தர்.சி அரண்மனை எனும் பெயரில் குடும்ப ரசிகர்களையும், குழந்தைகளையும் மதம் சார்ந்த மக்களையும் ஒன்று சேர்த்து வெற்றி பெற்று வருகிறார்.

குடும்பங்கள் விரும்பும் படம்

குழந்தைகளுக்கு தேவையான மர்மங்களையும், பயத்தையும் தருவதாலும், குடும்ப உறுப்பினர்களுக்குத் தேவையான காமெடிகளை வழங்குவதாலும் சுந்தர்.சியின் அரண்மனை படத்தின் 4 பாகங்களுக்கும் இந்த வெற்றியை மக்கள் வழங்கி வருகின்றனர்.

அரண்மனை 5

கடைசியாக சுந்தர்.சி இயக்கத்தில் வெளியான அரண்மனை 4 திரைப்படம் 100 கோடி ரூபாய்க்கும் அதிகமான வசூலைக் குவித்ததால். தற்போது அவர் அரண்மனை 5ம் பாகத்திற்கான வேலைகளைத் தொடங்கி உள்ளதாக பல மாதங்களாக வதந்திகள் பரவி வந்தது. இந்த வதந்தி கடந்த வாரம் அதிகாரப்பூர்வ தகவலாக மாறியது. மேலும், சுந்தர்.சியின் விருப்பமான இசையமைப்பாளரான ஹிப்ஹாப் ஆதி இந்தப் படத்திற்கு இசையமைக்கிறார். பென்ஸ் மீடியா பிரைவேட் லிமிடெட் நிறுவனமும் ஏ.சி.எஸி அருண் குமாரும் இணைந்து இந்தப் படத்தை தயாரிக்கின்றனர் எனவும் தகவல் பரவியது.

அத்துடன் சுந்தர்.சி அரண்மனை 5ம் பாகத்திற்கான போஸ்டரையும் வெளியிட்டுள்ளதாக தகவல்கள் வெளியாகி புகைப்படம் ஒன்று வைரலானது.

அறிவிப்பு பொய்யானது

இந்த நிலையில், அரண்மனை 5 குறித்து வெளியான அனைத்து தகவல்களும் பொய்யானவை என சுந்தர்.சியின் மனைவி குஷ்பு தெரிவித்துள்ளார்.

இதுகுறித்து அவர் பேசுகையில், சுந்தர்.சி தற்போது கேங்கரஸ் படத்தில் தனது முழு கவனத்தையும் செலுத்தி வருகிறார். ஆனால், பலரும் அவர் அரண்மனை 5ம் பாகத்தை இயக்க தயாராகிவிட்டதாக கூறி படத்தில் நடிக்க உள்ள நபர்களின் பட்டியலை வெளியிட்டு வருகின்றனர்.

சுந்தர்.சி சொன்னால் மட்டும் தான் உண்மை

இது முற்றிலும் போலியானது. சுந்தர்.சியும் அவ்னி சினி மேக்ஸ் நிறுவனமும் எப்போது அரண்மனை 5 திரைப்படம் குறித்து அறிவிப்பு வெளியிடுகிறார்களோ அதுதான் உண்மையான தகவலாக இருக்கும். அதுவரை வெளியாகும் எந்தவொரு தகவலையும் நம்பர வேண்டாம் என மக்களிடம் வேண்டுகோள் விடுத்துள்ளார்.