தீபாவளி போனஸ் வாங்கியது இல்லை.."நீங்க எந்த விதத்துல பாத்தீங்க.."நிருபருடன் நடிகை ரித்விகா கார சார உரையாடல்

இதையடுத்து விக்ராந்த் ஜோடியாக ரித்விகா சிங் நடித்திருக்கும் புதிய படம் தீபாவளி போனஸ். இந்த படத்தின் செய்தியாளர்கள் சந்திப்பு சென்னையில் நடைபெற்றது. இதில் படக்குழுவினர்கள் பங்கேற்றார்கள். இந்த நிகழ்ச்சியில் ரித்விகா பேசும்போது தான் சென்னை பெண் எனவும், இதுவரை வாழ்க்கையில் தீபாவளி போனஸ் வாங்கியது இல்லை எனவும் தெரிவித்தார்.

நான் சென்னை பெண்

விழாவில் நடிகை ரித்விகா சிங் பேசியதாவது, "என்னைப் பற்றி தொகுப்பாளினி நன்றாக அறிமுகம் கொடுத்தார். ஆனால் அவர் சொன்னது போல் என் சொந்த ஊர் சேலம் இல்லை, சென்னை தான். நான் சென்னை பெண் என்பதை தெரிவித்துக் கொள்கிறேன்.

இயக்குநர் ஜெயபால் இந்த படத்துக்காக என்னை தொலைபேசியில் தான் முதலில் தொடர்பு கொண்டார். அப்போது ஒரு ஒன்லைன் சொன்னார். அதை கேட்டதும் இந்த படத்தில் நடிக்க வேண்டும் என்று முடிவு செய்தேன். இந்த படத்தின் கதையை கேட்கும் போது இது நன்றாக இருக்கும் என்று என் உள்ளுணர்வு சொன்னது. படமும் சிறப்பாக வந்துள்ளது. படத்தின் டைட்டில் அனைவரையும் ஈர்க்கும் விதமாக இருக்கிறது.

படக்குழுவினர்கள் சரியாக திட்டமிட்டு வேலையை முடித்தார்கள்

இந்த படத்துக்காக என்னிடம் 22 நாள்கள் கால்ஷீட் கேட்டார்கள், ஆனால் என்னுடைய பகுதியை 19 நாட்களில் முடித்து விட்டார்கள். படத்தில் பணியாற்றியவர்கள் பெரும்பாலும் புதியவர்களாக இருந்தாலும், சில தடுமாற்றங்களை சந்தித்தபோதிலும் திட்டமிட்டபடி ஒவ்வொரு நாளும் படப்பிடிப்பை முடித்ததோடு, பின்னணி வேலைகளையும் சரியாக திட்டமிட்டு செய்து முடித்தார்கள்.

படத்தின் தலைப்பை நடிகர் வடிவேலு வெளியிட்டார். இதில் நாயகனாக நடித்த விக்ராந்த் நல்ல நடிகர். அவரால் இன்று இங்கு வர முடியவில்லை. அவருக்கு இன்னும் நல்ல வாய்ப்புகள் கிடைக்க வேண்டும்.

எனது மகனாக நடித்த சிறுவன் ஹரிஷ் சிறப்பாக நடித்தார். எனக்கும், விக்ராந்துக்கும் அடுத்து என்ன வசனம், என்ன காட்சி என்று தெரியாது. ஆனால் சிறுவன் ஹரிஷுக்கு அனைத்தும் தெரியும். அந்த அளவுக்கு அவனுக்கு பயிற்சி கொடுத்திருந்தார்கள்.

தீபாவளி போனஸ் வாங்கியது இல்லை

என் வாழ்க்கையில் நான் தீபாவளி போனஸ் வாங்கியதே இல்லை. உங்களுக்கே தெரியும் சினிமாவில் யாருக்கும் போனஸ் என்பது இல்லை. நான் படிப்பு முடிந்ததும் சினிமாவுக்குள் வந்துவிட்டேன். அதனால் நிறுவனங்களில் பணியாற்றும் வாய்ப்பு கிடைக்கவில்லை என்பதால் போனஸ் வாங்கும் வாய்ப்பும் அமையவில்லை. ஆனால், இந்த 2024 ஆம் ஆண்டு எனக்கு தீபாவளி போனஸ் கிடைத்திருக்கிறது.

நிருபருடன் ரித்விகா கார சார உரையாடல்

முன்னதாக, தீபாவளி போனஸ் படத்தின் சிறப்பு காட்சி பத்திரிகையாளர்களுக்காக திரையிடப்பட்டது. இதன் பின்னர் படக்குழுவனர்கள், பத்திரிகையாளர்களின் கேள்விகளுக்கு பதில் அளிக்கும் விதமாக உரையாடினர்.

அப்போது நிருபர் ஒருவரிடம் நடிகை ரித்விகா சிங் கார சார உரையாடல் நடந்தது. அதில், உங்களை ரொம்ப நாளா சினிமா துறையில் காணும், பொருத்தமான கதாபாத்திரங்களை மட்டும் தேர்வு செய்து நடிக்கிறீங்களா என்று ஒரு நிருபர் கேள்வி எழுப்பினார். அதற்கு பதிலளித்த ரித்விகா, "நான் இங்குதான் இருக்கிறேன். நீங்க ஃபாலோ பண்றீங்களான்னு தெரியல. பிக் பாஸுக்கு அப்புறம் நிறைய படங்கள் பண்ணிட்டேன். அதில் ஐந்து படங்கள் ரிலீஸூக்கு தயாராக இருக்கிறது. அது ரிலீஸானா தானே உங்களுக்கு தெரியும்" என்றார்.

தொடர்ந்து, "பிக் பாஸுக்கு பிறகு நான் காணும் என்று சொல்வது சரியாக இருக்காது. நான் பிக் பாஸ் முடிச்சு ஏழு வருஷம் ஆச்சு. அதுக்கபுறம் இன்ஜினியர் காலேஜ் போல நிறைய பேர் பிக் பாஸுல கலந்துகிட்டு வெளியே வந்துட்டாங்க. எல்லாரும் அவங்கங்க வேலையில கவனம் செலுத்திட்டு வராங்க. நீங்க எல்லாரையும் ஃபாலோ பண்ணா உங்களுக்கு அப்டேட் தெரியும்" எனக் கூறினார்.

பின்னர் அந்த நிருபர், உங்க ஐந்து படமும் வெளியாகட்டும், அதை பார்த்து ரிவியூ கொடுக்கிறோம்” என சொல்ல, "பிக் பாஸுக்கு அப்புறம் கடைசி உலகப் போரின் கடைசி குண்டு படம் ரிலீஸானது. அதை பாத்தீங்களா" என பதில் கேள்வி கேட்க, நிருபர், " அந்த படத்தை பார்த்தோம். ஆனால் நீங்க வெளியே தெரியவில்லை" என பதிலளித்தார்.

உடனே ரித்விகா, "நீங்க எந்த விதத்துல பாத்தீங்கன்னு எனக்கு தெரியல" என சிரித்தவாறே சொல்ல இந்த உரையாடல் முடிந்தது.

தீபாவளி போனஸ் படம்

பேமிலி ட்ராமா படமாக உருவாகியிருக்கும் தீபாவளி போனஸ் படத்தை அறிமுக இியக்குநர் ஜெ. ஜெயபால் இயக்கியுள்ளார். ஸ்ரீ அங்காளி பரமேஸ்வரி புரொடக்‌ஷன்ஸ் சார்பில் தீபக் குமார் டாலா தயாரித்துள்ளார். படத்தின் ட்ரெயலர் வெளியாக வரவேற்பை பெற்றிருக்கும் நிலையில், படம் இன்று வெளியாகியுள்ளது.