Thol. Thirumavalavan : அருண் கோயல் பதவி விலகல்; நாடாளுமன்ற தேர்தல் நேர்மையாக நடைபெறுமா? – திருமா கேள்வி!

ஏற்கனவே தேர்தல் ஆணையத்தில், ஒரு ஆணையர் இல்லை. தலைமை தேர்தல் ஆணையரும், இவரும் மட்டும்தான். இப்போது இவரும் பதவி விலகியுள்ள நிலையில் தலைமை தேர்தல் ஆணையர் மட்டுமே இருக்கிறார். இன்னும் ஓரிரு நாட்களில் நாடாளுமன்ற தேர்தலுக்கான தேதியை அறிவிக்க உள்ள நிலையில் இப்படி பதவி விலகியிருப்பது சந்தேகத்தை ஏற்படுத்தியுள்ளது.

பாஜகவும் அதன் ஆதரவு சக்திகளும் தேர்தல் முறையை சீரழித்து, முறைகேடான முறையில் ஆட்சியைக் கைப்பற்றுவதற்கு முயற்சிக்கின்றன என்பதைத்தான் தேர்தல் ஆணையத்தில் நடக்கும் இந்த நாடகக் காட்சிகள் உணர்த்துகின்றன.

உடனடியாக உச்சநீதிமன்றம் இதில் தலையிடவேண்டும். ஏற்கனவே நிலுவையில் உள்ள வழக்குகளை விசாரித்து, குறிப்பாக தேர்தல் ஆணையர்களை தேர்வு செய்வதற்கான தேர்வுக்குழுவில், இந்திய தலைமை நீதிபதி இடம்பெற தேவையில்லை என்ற வகையில் இயற்றப்பட்ட சட்டத்தை எதிர்த்து தொடுக்கப்பட்ட வழக்கு நிலுவையில் உள்ளது.

அந்த வழக்கை விரைந்து விசாரித்து, ஓரிரு நாளில் அந்த சட்டத்தை தடை செய்து, இந்திய தலைமை தேர்தல் ஆணையரும் இடம்பெறக்கூடிய தேர்வுக்குழுவை உருவாக்கி, தேர்தல் ஆணையர்களை நியமிக்க வேண்டும் என்று விடுதலை சிறுத்தைகள் கட்சி வேண்டுகோள் விடுக்கிறது.

தேர்தல் ஆணையர் அருண்கோயல் கடந்த 2022ம் ஆண்டு நவம்பரில் மோடி அரசின் அழுத்ததால் விருப்ப ஓய்வு கொடுத்துவிட்டு, இந்தப்பதவிக்கு 24 மணிநேரத்தில் நியமனம் செய்யப்பட்டார். இவர் மோடி அரசுக்கு சாதகமானவர்தான். ஆனால் பதவி விலகியிருப்பது ஏன்? மோடி அரசை எதிர்த்தா? அல்லது மோடி அரசின் சதிக்கு ஒத்துழைக்கும் நோக்கமா என்ற கேள்வி எழுகிறது. நேர்மையான முறையில் நாடாளுமன்ற தேர்தல் நடைபெறுமா என்ற சந்தேகம் எழுகிறது.

மின்னணு வாக்குப்பதிவு இயந்திரத்தில் என்ன சதித்திட்டங்கள் செய்துள்ளார்கள் என்ற சந்தேகம் எழுகிறது. இதுபோன்ற பல சந்தேகங்களை எழுப்பக்கூடிய வகையில் இந்த பதவி விலகல் ஏற்படுத்தியுள்ளதால், ஜனநாயக சக்திகள் அனைத்தும் இதை எதிர்த்துள்ளனர். உச்சநீதிமன்றம் உடனடியாக இதில் தலையிடவேண்டும்.

தேர்தல் ஆணையர்களை நியமிக்கும் குழுவில் இந்திய பிரதமரே தலைமை தேர்தல் ஆணையரை நியமித்துக்கொள்ளலாம் என்ற சட்டம் கொண்டுவரப்பட்டுள்ளது. இது உச்சநீதிமன்றதீர்ப்பையும் மீறி இந்திய தலைமை நீதிபதி இடம்பெறதேவையில்லை என்ற நிலை உள்ளது. 

அதன்படி, பிரதமர், எதிர்க்கட்சி தலைவர், இந்திய தலைமை நீதிபதி கொண்ட குழுவில், பிரதமரே நியமிக்கக்கூடிய வகையில் சட்டம் கொண்டு வந்திருக்கிறார்கள். அந்தச்சட்டம் கூடாது, தடைசெய்யப்பட வேண்டும். அந்த வழக்கை விசாரித்து இந்த சட்டத்தை தடை செய்யவேண்டும். 

தலைமை நீதிபதியும் இடம்பெறவேண்டும். தலைமை நீதிபதியும் இடம்பெறும் அந்தக்குழு தேர்தல் ஆணையர்களை நியமிக்க வேண்டும் என்பதுதான் விடுதலை சிறுத்தைகளின் இப்போதைய கோரிக்கையாகும் என்று விசிக தலைவர் திருமாவளவன் எம்.பி. தெரிவித்துள்ளார்.

சமூக வலைத்தளங்களில் எங்களை பின்தொடரலாம். லிங்க்குக ள் கீழே கொடுக்கப்பட்டுள்ளன:

https://twitter.com/httamilnews

https://www.facebook.com/HTTamilNews

https://www.youtube.com/@httamil

Google News: https://bit.ly/3onGqm9