Stone Quarry Explosion: தமிழகத்தை உலுக்கிய கல்குவாரி வெடிவிபத்து.. எப்ஐஆரில் வெளியான அதிர்ச்சி தகவல்!

தகவலறிந்து வந்த ஆவியூர் போலீஸார் மற்றும் மதுரையில் இருந்து வந்த வெடிகுண்டு தடுப்புபிரிவு நிபுணர்கள் அங்கு சோதனை மேற்கொண்டனர். விருதுநகர் மாவட்ட வருவாய் அலுவலர் ராஜேந்திரன், எஸ்.பி. பெரோஸ்கான் அப்துல்லா ஆகியோரும் விசாரணை நடத்தினர்.

இந்த பயங்கர வெடி விபத்தின் போது அங்கு பணியில் இருந்த தொழிலாளர்கள் கந்தசாமி (47), துரை (25), குருசாமி (60) ஆகியோர் உடல் சிதறி உயிரிழந்தனர். சுமார் ஒரு கி.மீ. வரை உயிரிழந்தவர்களின் உடல் பாகங்கள் சிதறிக் கிடந்தன. மேலும், வெடிபொருட்கள் வைக்கப்பட்டிருந்த கிடங்கு முழுவதுமாக தரைமட்டமானது. இந்த விபத்தில் காயமடைந்த 8 பேர் மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

சாலை மறியல்:

விபத்து தொடர்பாக உரிய நடவடிக்கை எடுக்க கோரி கடம்பன்குளம், ஆவியூர், உப்பிலிக்குண்டு கிராம மக்கள், மதுரை - தூத்துக்குடி தேசிய நெடுஞ்சாலையில் மறியலில் ஈடுபட்டனர். இதனால் சுமார் ஒரு மணி நேரம் போக்குவரத்து பாதிக்கப்பட்டது. அதிகாரிகள் மற்றும் போலீஸார் பேச்சுவார்த்தை நடத்தி, உரிய நடவடிக்கை எடுப்பதாக உறுதியளித்த பின்னர் சாலை மறியல் கைவிடப்பட்டது.

இரண்டு பேர் கைது:

கல்குவாரி வெடிவிபத்து தொடர்பாக, மனித உயிருக்கு ஆபத்து விளைவித்தல், மரணம் விளைவிக்கும் வகையில் குற்றம்புரிதல் உள்ளிட்ட 4 பிரிவுகளின் கீழ் வழக்குப்பதிவு செய்த ஆவியூர் காவல்துறையினர் கல்குவாரியின் உரிமையாளரான ஆவியூரைச் சேர்ந்த சேது, வெடிபொருள் சேமிப்பு கிடங்கு உரிமையாளரான சங்கரன்கோவிலை சேர்ந்த ராஜ்குமார் ஆகிய இருவரை கைது செய்தனர்.

விபத்துக்கு காரணம் என்ன?

போலீஸாரின் முதல் தகவல் அறிக்கையில், "மனித உயிருக்கு ஆபத்து ஏற்படும் எனத் தெரிந்தும், போதிய பாதுகாப்பு உபகரணங்கள் ஏதும் கொடுக்காமல், எலெக்ட்ரிக் டெட்டனேட்டர் வைக்கப்பட்டிருந்த வெடிமருந்து வேனையும் நைட்ரேட் மிக்சர் வெடிமருந்து இருந்த லோடு வேனையும் அருகருகே வைத்து வெடிமருந்துகளை இறங்கியுள்ளனர். வெடிவிபத்து ஏற்பட்டு உயிர் சேதத்தை விளைவிக்கும் என்று தெரிந்திருந்தும் அஜாக்கிரதையாகவும் கவனக்குறைவாகவும் இருந்து வேலை செய்ததால் வெடி விபத்து ஏற்பட்டுள்ளது. வெடிமருந்துகளை கையாள போதிய பாதுகாப்பு செய்து கொடுக்காமல் வெடிமருந்து குடோனை முறையாக நிர்வகித்துள்ளனர்." என்று தெரிவிக்கப்பட்டுள்ளது.

முதல்வர் ஸ்டாலின் இரங்கல்:

காரியாபட்டி அருகே கல்குவாரியில் வெடிமருந்து கிடங்கு வெடித்ததில் 3 பேர் உடல் சிதறி உயிரிழந்த சம்பவத்திற்கு முதல்வர் ஸ்டாலின் இரங்கல் தெரிவித்துள்ளார். இதுகுறித்து முதல்வர் மு.க.ஸ்டாலின் நேற்று வெளியிட்ட சமூகவலைதள பதிவில், "விருதுநகர் மாவட்டத்தில் நேரிட்ட வெடிவிபத்தில் 3 தொழிலாளர்கள் உயிரிழந்த செய்தியறிந்து மிகுந்த வேதனையடைந்தேன். விபத்தில் உயிரிழந்தோர் குடும்பத்தினருக்கு ஆழ்ந்த இரங்கல். அவர்களது வாரிசுகளுக்கு தேர்தல் ஆணையத்தின் அனுமதி பெறப்பட்டதும், அரசின் நிவாரண உதவி வழங்கப்படும்" என்று தெரிவித்துள்ளார்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9