DMK Vs BJP: வடைக்கு போட்டியான வாழைப்பழம்.. கோவையில் திமுக அரசை கண்டித்து பாஜகவினர் போராட்டம்

பிரதமர் நரேந்திர மோடி கொடுத்த வாக்குறுதிகளை நிறைவேற்றாமல் வாயிலேயே வடை சுடுகிறார் என தொடர்ந்து தமிழகத்தில் சில அரசியல் கட்சியினர் குற்றம் சாட்டி வந்தனர். இந்நிலையில்  தமிழகத்தில் பல்வேறு பகுதிகளில் பல கட்டமாக திமுகவினர் உளுந்த வடை வழங்கி நூதன பிரசாரத்தில் ஈடுபட்டு வருகின்றனர். கோவையிலும் பல்வேறு இடங்களில் திமுகவினர் பிரதமர் மோடி புகைப்படத்துடன் உளுந்த வடை வழங்கி பிரச்சாரத்தில் ஈடுபட்டு வருகின்றனர். இந்நிலையில் இதற்கு பதிலடி கொடுக்கும் விதமாக பாஜக சார்பில் வாழைப்பழம் கொடுக்கும் நூதன பிரச்சார இயக்கம் நேற்று கோவையில் நடைபெற்றது. கோவை சிவானந்தா காலனியில் பாஜக நிர்வாகிகளும், தொண்டர்களும் கையில் வாழைப்பழத்துடன் திரண்டனர். 

ஆனால் போலீசார் வாழைப்பழத்தை பொதுமக்களுக்கு வழங்க அனுமதி மறுத்தனர். அப்படி வழங்கினால் கைது செய்ய நேரிடும் என கடுமையாக எச்சரித்தனர். இதனையடுத்து பா.ஜ.கவினர் முதல்வர் ஸ்டாலின் முகமூடியையும், கையில் வாழைப்பழத்துடனும் ஆர்ப்பாட்டத்தில் ஈடுபட்டனர். 

அப்பொழுது திமுக தேர்தல் காலத்தில் கொடுத்த வாக்குறுதிகள் எதையும் நிறைவேற்றாமல் பொது மக்களை ஏமாற்றி விட்டதாகவும், பொதுமக்களுக்கு வாழை பழத்தை கொடுத்து விட்டதாகவும் தெரிவித்தனர். போராட்டத்தின் முடிவில் வாழைப்பழங்களை பொதுமக்களுக்கு கொடுக்க முடியாமல் போனதால் , போராட்டத்திற்காக எடுத்து வந்த வாழை பழங்களை மக்கள் சார்பில் தாங்களே சாப்பிடுவதாக கூறி வாழைப்பழங்களை பாஜகவினர் சாப்பிட்டு விட்டு அந்த பகுதியில் இருந்து கலைந்து சென்றனர்.

முன்னதாக நேற்று மதுரையில் அதிமுக முன்னாள் அமைச்சரும், சட்டமன்ற உறுப்பினருமான செல்லூர் ராஜூ செய்தியாளர்களை சந்தித்தார். அப்போது பேசிய அவரிடம்  கண்ணடித்தால் வராத கூட்டணி கட்சிகள் கையை பிடித்து இழுத்தால் மட்டும் வரவா போகிறது என துரைமுருகன் பேசி உள்ளது குறித்த கேள்வி எழுந்தபோது, யாரு கையை பிடித்து இழுக்கிறது, அவர்கள் கூட்டணியை மக்களே ஏற்றுக் கொள்ளவில்லை. தேர்தலில் பணம் செலவழிக்க வேண்டும் என்பதால் கூட்டணி கட்சிகள் திமுக உடன் உள்ளன. ஆளும் பாஜகவையே வேண்டாம் என்று சொல்லிவிட்டு வந்த நாங்கள் மற்ற கட்சிகளை அழைப்போமா? என்றார்.

தொடர்ந்து பேசிய செல்லூர் ராஜூ, நான் உடல் ரீதியாக நன்றாக உள்ளேன், ஆனால் மக்கள் நலமாக உள்ளார்களா, வாயிலேயே வடை சுடுவதில் இந்திய அளவில் மோடிஜி, தமிழ்நாட்டில் நம்ம முதலமைச்சர் ஸ்டாலின் அவர்கள்.

ஏதாவது ஒரு திட்டத்தை அறிவித்தாலும் அது நிறைவேறப்போவதில்லை, தமிழ்நாட்டு போதை மாநிலமாக மாறி வருகிறது. ராமேஸ்வரத்தில் 108 கோடி ரூபாயில் போதை பொருள் கைப்பற்றப்பட்டுள்ளது. போதையில் விதவிதமாக போதை வருகிறது. தமிழ்நாட்டை ஒரு தளமாக வைத்துக் கொண்டு போதை பொருட்கள் கடத்தப்படுவதால், மீனவர்கள் பாதிக்கப்படுகின்றனர்.

நீட் ரத்து, கல்விக்கடன் ரத்து, அனைத்து மகளிருக்கும் ஆயிரம் ரூபாய், நகைக்கடன் தள்ளுபடி திட்டங்களை அறிவித்த முதலமைச்சர் எதுவுமே செய்யவில்லை. முதலமைச்சர் ஒரே வடையாக சுட்டுக்கொண்டு இருக்கிறார். 15 லட்சம் போடுவோம் என்ற பிரதமர் ஏதும் செய்யவில்லை.

இதற்கு மாற்று சக்தியாக அதிமுக உள்ளது. கொரோனா காலத்தில் ஈபிஎஸ் மிக சிறப்பாக செயல்பட்டார். எதுவுமே செய்யாமல் நீங்கள் நலமா என முதலமைச்சர் கேட்கிறார். இவர்களாகவே ஆட்களை செட்டப் செய்துவிட்டு நாங்கள் நலம் என பேச வைக்கின்றனர். நம்ம முதலமைச்சர் நல்லாவே நடிக்கிறார்.

மோடி ஜி அவர்கள் அம்மாவை புகழ்கிறார், அவர்கள் தலைவராக உள்ள வாஜ்பாய், அத்வானியை பற்றி எல்லாம் பேசவில்லை. பாஜக ஆட்சியில் தமிழ்நாடு எல்லாவற்றிலும் பின் தங்கிவிட்டது. பிரதமர் அதிமுகவுக்கு ஓட்டுப்போடும் மக்களை எப்படியாவது மாற்றிவிடலாமா என நினைக்கிறார்; ஆனால் எதுவும் நடக்காது. தமிழ்நாட்டுக்கு பிரதமர் மோடி எத்தனை முறை வந்தாலும் மக்கள் ஏற்றுக் கொள்ள மாட்டார்கள்.

ஒரு அரசியல் கட்சி என்பது எல்லா மக்களுக்காகவும் இருக்க வேண்டும். ஆனால் பாஜக ஒரு மதத்தை முன்னோக்கி எடுத்து செல்கிறது. தந்தை பெரியார், பேரறிஞர் அண்ணா, புரட்சித் தலைவர் எம்ஜிஆர், அம்மா காலத்தில் எந்த காலத்திலும் மத வெறியர்களுக்கு எதிராக இருந்துள்ளனர் என கூறினார்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews

https://www.facebook.com/HTTamilNews

https://www.youtube.com/@httamil

Google News: https://bit.ly/3onGqm9