பிசிஓஎஸ் பிரச்னைகளுக்காக மருத்துவமனைகளுக்கு அலைகிறீர்களா? சித்த மருத்துவர் கூறும் எளிய தீர்வுகள் இதோ!

சினைப்பையில் நீர்க்கட்டிகள் வந்தால் அதன் அறிகுறிகள்

முறையற்ற மாதவிடாய் சுழற்சி 45 நாட்களுக்கு மேல் மாதவிடாய் இல்லாமல் இருப்பது அல்லது ஓராண்டுக்கு 8 முறைக்கும் குறைவாக மாதவிடாய் சுழற்சி ஏற்படுவது.

சினைப்பை சற்று பெரியதாக காணப்படும் மற்றும் சிறிய கட்டிகள் இருக்கலாம்.

இதை (ULTRA SOUND) அல்ட்ரா சவுண்ட் பரிசோதனையின் மூலம் அறியலாம்.

முகம் மற்றும் உடலின் மற்ற பகுதிகளிலும் முடி வளர்ச்சி

முகப்பரு

இடுப்பு வலி

வயிற்று பகுதிகளில் எடை அதிகரித்தல் மற்றும் பொதுவான உடல் எடை அதிகரிப்பு.

கழுத்து மற்றும் பிற‌ பகுதிகளில் கருந்திட்டுகள் ஏற்படுவது (DARK SKIN PATCHES)

தலைமுடி கொட்டுதல் (HAIR FALL) முடியின் அடர்த்தி குறைவது, ஒரு சிலருக்கு வழுக்கை ஏற்படுதல்.

மன அழுத்தம்

சோர்வு

பிற்காலத்தில் ஏற்படக்கூடிய பாதிப்புகள்

ரத்த போக்கு அதிகமாகுதல்

நீரிழிவு

உயர் ரத்த அழுத்தம்

குறைப்பிரசவம்

இதய நோய் மற்றும் பக்கவாதம்

மன அழுத்தம்

மலட்டுத்தன்மை

கருப்பை புற்றுநோய்

கருச்சிதைவு

தூக்கத்தில் ஏற்படும் மூச்சுத்திணறல்.

சிகிச்சையின் நோக்கம்

ஹார்மோன்களை சமநிலைப் படுத்துதல்

டெஸ்டோஸ்டிரான் அளவை குறைத்தல்

மாதவிடாயை முறைப்படுத்துதல்

இன்சுலின் அளவை கட்டுப்பாட்டுக்குள் கொண்டு வருதல்.

உடல் எடையை குறைத்தல்

குணம் தரும் மூலிகைகள்

கழற்ச்சிக்காய் - ஆரம்ப நிலையில் மிகுந்த பயனளிக்கும்.

மலைவேம்பு - கருப்பை நீர்க்கட்டிகள், கருமுட்டை வளர்ச்சியில் குறைபாடு இருந்தால் மலைவேம்பு உதவும். சினைப்பையில் வளரும் நீர்க்கட்டிகளை நீர்த்து போகச் செய்யும்.

அசோகமரப்பட்டை - கர்ப்பப்பை டானிக் என்று அழைப்பார்கள். இது சினைப்பை நீர்க்கட்டியை மட்டும் சரிசெய்யாமல் கர்ப்பப்பை சார்ந்து வரும் சகல பிரச்னைகளையும் சரி செய்கிறது.

அரசமர இலைக்கொழுந்து - குழந்தைப்பேறு மட்டுமல்லாமல் கர்பப்பை சார்ந்த பிரச்னைகளையும் சரி செய்கிறது.

செம்பருத்தி பூ தேநீர் - நீர்க்கட்டியை குறைப்பதில் மிகுந்த பயனளிக்கிறது. கர்ப்பப்பை பிரச்களை எளிதில் சரிசெய்கிறது.

கறிவேப்பிலை - வெறும் வயிற்றில் தொடர்ந்து எடுக்க பயனளிக்கிறது.

சோற்றுக் கற்றாழை - சோற்றுக் கற்றாழையை தினசரி காலை வெறும் வயிற்றில் 50 கிராம் அளவு எடுத்து நன்றாக 5- 7 முறை கழுவி பின் நீராகாரத்தில் தொடர்ந்து 48 நாட்கள் சாப்பிட்டு வந்தால் மேற்கண்ட பிரச்னை தீரும்

விதை சுழற்சி (SEED CYCLING)

தற்போது விதை சுழற்சி முறை PCOS க்கு மிகுந்த பயனளிக்கிறது. இதற்கு தேவையானவை ஆளிவிதை, பரங்கி விதை, சூரியகாந்தி விதை மற்றும் எள்ளு. இவை ஒவ்வொன்றிலும் 100 கிராம் அளவு சமமாக எடுத்துக் கொள்ள வேண்டும். மாதவிடாய் ஆரம்பித்த முதல் நாள் முதல் 14 நாட்கள் வரை ஆளிவிதை மற்றும் பரங்கி விதை இரண்டையும் சமமாக எடுத்து பொன் வறுவலாக வறுத்து பொடி செய்து அரைத்து சலித்து வைத்துக் கொள்ள வேண்டும். பின்னர் ஒரு ஸ்பூன் அளவு எடுத்து காலை வெறும் வயிற்றில் தண்ணீரில் கலந்து முதல் 14 நாட்களுக்கு எடுத்துக்கொள்ள வேண்டும்.

பின்னர் 15ம் நாள் முதல் 28ம் நாள் வரை சூரியகாந்தி விதை மற்றும் எள்ளு ஆகியவற்றை சமஅளவு எடுத்து பொன் வறுவலாக வறுத்து பொடி செய்து சலித்து வைத்துக்கொண்டு காலை வெந்நீரில் கலந்து சாப்பிட வேண்டும்.

ஒவ்வொருவருக்கும் மாதவிடாய் சுழற்சி மாறுபடும். அதற்கேற்றவாறு மருத்துவரை அணுகி எடுத்துக்கொள்ளவேண்டும். இந்த விதைகளை காலையில் மட்டுமே எடுத்துக் கொள்ள வேண்டும். ஏனெனில் செரிமான பிரச்னைகள் ஏற்படலாம். மேலும் நிறைய தண்ணீர் அருந்த வேண்டும்.

இதை முறையாக மூன்று மாதத்திற்கு எடுத்துக் கொண்டால் ஹார்மோன்களின் சமமின்மையை சரிசெய்கிறது. மேலும் சில பேர் கழற்ச்சிக்காய் சூரணம் எடுத்துக் கொண்டிருப்பார்கள்.

இதுவும் PCOD க்கு சிறந்த தீர்வளிக்கிறது. கழற்சிக்காய் எடுத்துக் கொண்டால் அதை 48 நாட்கள் முடித்து விட்டு பின் விதை சுழற்சி சிகிச்சை ஆரம்பிக்க வேண்டும்.

விதை சுழற்சி சிகிச்சை மேற்கொள்ளும்போது வேறு எந்த ஒரு மூலிகையுடன் சேர்த்துக்கொள்ளகூடாது காரணம். இதனால் ஹார்மோன் சமமின்மை ஏற்படலாம்.

உணவு முறைகள்

காலை உணவை தவிர்க்க கூடாது.

பொதுவாக நார்ச்சத்து அதிகமுள்ள உணவுகள், செரிமான வேகத்தைக் குறைத்து, ரத்தத்தில் உள்ள சர்க்கரையின் அளவை சீராக்கி, உடல் வீக்கம் அல்லது அலர்ஜி போன்றவற்றைக் குறைத்து குடல் ஆரோக்கியத்தை அதிகரிப்பதன் மூலம் சரிசெய்யலாம்.

அறுசுவை உணவு, தொடர் உடற்பயிற்சி, ஆடைகளில் காட்டன் வகை ஆடைகளை அணிவது, துரித உணவுகளை தவிர்ப்பது சாப்பிடும் நேரம், உறங்கும் நேரத்தை சரியாக கடைபிடிப்பது. சுயமருத்துவத்தை தவிர்ப்பது போன்றவைகளை கடைபிடித்தால் சினைப்பை நீர்க்கட்டிகள் பிரச்னையிலிருந்து தப்பிக்கலாம்.

நன்றி -

டாக்டர். காமராஜ்,

மாவட்ட சித்த மருத்துவ அலுவலர் ஓய்வு,

திருச்சி.