தமிழ் யூடியூப் சேனல்களின் ஆதிக்குடி டெம்பிள் மங்கீஸ் சரவணன் டூ ஆஸ்தான ஹீரோ ஃரண்டு ஷா ரா வரை.. லைஃப் சேஞ்ஜிங் மொமண்ட்ஸ்

யூடியூபர்ஸ்க்கு எல்லாம் முன்னோடி

இப்போது தமிழில் 'பரிதாபங்கள்', 'ஸ்மைல் சேட்டை', 'மைக் செட்', 'விஜே சித்து விலாக்ஸ்', 'நக்கலைட்ஸ்' போன்ற யூடியூப் சேனல்கள் மக்களிடம் தங்களது வித்தியாசமான மற்றும் நகைச்சுவையான வீடியோக்கள் மூலம் ஆதிக்கத்தை செலுத்தி வருகின்றன. இவற்றிற்கெல்லாம் அடித்தளம் போட்ட யூடியூப் சேனல் 'டெம்பிள் மங்கீஸ்' தான்.

யூடியூப் என்றால் என்னவென்றே பெரும்பாலான மக்களுக்கு புரிதல் இல்லாத காலத்தில் தொடங்கப்பட்ட சேனல் தான் டெம்பிள் மங்கீஸ். இந்த யூடியூப் சேனலை விஜய் வரதராஜ் மற்றும் ஷா ரா என்ற சரவணன் ஆகியோர் இணைந்து தொடங்கினர்.

ஆரம்பத்தில் இவர்களுக்கும் யூடியூப் சேனல் எப்படி இயங்கும், அதில் பதிவிடும் வீடியோ மக்களை எப்படி சென்றடையும் என்பதை எல்லாம் அறியாமலேயே இருவரும் வீடியோக்களை யூடியூப் சேனலில் பதிவிட்டு வந்தனர்.

இயக்குநர் லட்சியத்தோடு இருந்த ஷா ரா

நடிகர் ஆக வேண்டும் என்ற கனவோடு இருந்த விஜய் வரதராஜூம், இயக்குநராக வேண்டும் என்ற லட்சியத்தில் இருந்த ஷா ராவும் இணைந்து மிக எதார்த்தமாக பலவற்றை பேசி வீடியோவாக எடுத்திருப்பர். சுமார் 12 வருடங்களுக்கு முன், அவற்றை எல்லாம் பதிவு செய்ய வேண்டும் என்றால் நிச்சயம் அவர்களிடம் கம்யூட்டரும், அதிகளவு ஸ்டோரேஜ் கொண்ட ஹார்ட் டிஸ்க்குகளும் இருந்திருக்க வேண்டும். அது அவர்களிடம் இல்லாததால், நண்பர்களின் அறிவுரைப்படி, யூடியூபை தங்கள் வீடியோக்களை யூடியூப் சேனல் ஒன்றைத் தொடங்கி அதில் ஸ்டோர் செய்து வந்தனர்.

டெம்பிள் மங்கீஸ் டிவி

ஆரம்பத்தில் இவர்களுக்கு யூடியூப் என்றால் என்னவென்றே தெரியாமல், அதனை ஒரு ஆன்லைன் டிவி என நினைத்ததால், அந்த யூடியூப் சேனலுக்கு 'டெம்பிள் மங்கீஸ் டிவி' என பெயரிட்டிருந்தனர்.

நாட்கள் செல்லச் செல்ல இவர்களது வீடியோ இன்டர்நெட் பூமிங்கால் இணையவாசிகள் கண்களில் படுகிறது. அப்போது, இவர்களுக்கும் யூடியூபை எப்படி பயன்படுத்த வேண்டும் என்ற ஸ்பார்க் கிடைக்கிறது. இதையடுத்து, விஜய் வரதராஜூம், ஷா ராவும் சேர்ந்து, சினிமா, சமூகம், அரசியல் பகடி வீடியோக்களை எடுத்து அப்லோடு செய்தனர்.

இளைஞர்களை கவர்ந்த ஷா ரா

இவர்களின் எதார்த்தமான பேச்சாலும், அவற்றை இளைஞர்களைக் கவரும் வகையில் வெளிப்படுத்தியதாலும், அதில் இருக்கும் சில உண்மைத் தன்மை பலருக்கு பிடித்துப் போனதாலும், 'டெம்பிள் மங்கீஸ் டிவி'க்கு பலரும் ரசிகர்கள் ஆகினர்.

இதையடுத்து, யூடியூப் சேனல் மூலம் இவர்கள் அடைந்த புகழைக் கண்ட சிலர் பின்னாளில் யூடியூப் சேனலை தொடங்கி அவர்களும் பிரபலமாகினர். இதனால், தமிழில் உள்ள அனைத்து யூடியூபர்களுக்கும் டெம்பிள் மங்கீஸ் யூடியூப் சேனலின் விஜய் வரதராஜூம், ஷா ராவும் தான் முன்னோடியாக மாறினர்.

சினிமா என்ட்ரி

இப்படி புகழின் உச்சியில் இருக்கும் ஷா ராவைத் தேடி வந்து வாய்ப்பளித்தார் இயக்குநர் லோகேஷ் கனகராஜ். இவரது முதல் படமான 'மாநகரம்' 2017ம் ஆண்டு வெளிவந்தது. இந்தப் படத்தில், குழந்தையைக் கடத்த உதவும் நபர் கதாப்பாத்திரத்தில் நடிக்க ஷா ராவுக்கு வாய்ப்பு அளிக்கப்பட்டது. இந்த வாய்ப்பை கனக்கச்சிதமாக பயன்படுத்திய ஷா ராவிற்கு அடுத்தடுத்து பட வாய்ப்புகள் வரத் தொடங்கின.

இதனால், இயக்குநராக வேண்டும் என்ற ஆசையில் இருந்த ஷா ரா நடிப்பில் கவனம் செலுத்த தொடங்கினார். மாநகரம் படத்தைத் தொடர்ந்து, அதே ஆண்டில் வெளிவந்த ஹிப் ஹாப் ஆதியின் 'மீசைய முறுக்கு' படத்தில் கல்லூரி பேராசிரியராகவும், ஒரு காதலுக்கு ஏங்கும் நபராகவும், தன்னை விட சிறியவர்களிடம் சிக்கிக் கொண்டு போராடுபவராகவும் நடித்து அசத்தி இருப்பார் ஷா ரா.

இரட்டை அர்த்த வசனங்களில் முக்கியத்துவம்

இவரது நடிப்பை பார்த்து கவரப்பட்ட பல இயக்குநர்கள் அடுத்தடுத்த படங்களில் இவருக்கு வாய்ப்புகளை அளித்தாலும், அவர்கள் இவருக்கு பெரும்பாலும் இரட்டை அர்த்த வசனங்களை வழங்கி வந்தனர். மேலும், இளைஞர்களை குறிவைத்து வெளியாகும் படங்களில் வாய்ப்புகளை அளித்தனர். 

இதனால், ஷா ரா அடுத்தடுத்து இருட்டு அறையில் முரட்டு குத்து, பல்லு படாம பாத்துக்க, சொப்பன சுந்தரி, தி பாய்ஸ், குத்துக்குப் பத்து, பாபா பராக் போன்ற படங்களில் பல இரட்டை அர்த்த வசனங்களை பேசி நடித்திருப்பார். இருட்டு அறையில் முரட்டு குத்து படத்தில் கௌதம் கார்த்திக் உடன் 2ம் கதாநாயகனாக நடித்திருப்பார். இவருக்கு ஜோடியாக இந்தப் படத்தில் யாஷிகா ஆனந்த் நடித்திருப்பார்.

ஸ்கோர் செய்த படங்கள்

அதே சமயத்தில், நட்பே துணை, கோமாளி, சூப்பர் டூப்பர், நான் சிரித்தால், ஓ மை கடவுளே, டிக்கிலோனா, ஓ2, வாத்தி, ரோமியோ, படகு, கடைசி உலகப் போர் போன்ற படங்களில் தனக்கான பங்களிப்பை சிறப்பாக வழங்கி இருப்பார்.

நட்புக்கு மரியாதை

என்னதான் சினிமாவில் இத்தனை வாய்ப்புகள் அவரைத் தேடி வந்தாலும், அவர் தற்போதும் டெம்பிள் மங்கீஸில் தொடர்ந்த நட்புக்கு முக்கியத்துவம் அளித்து, பல வீடியோக்களில் நடித்து வருகிறார். தமிழ் சினிமாவின் காமெடி நடிகர்கள் பலரும் தங்களை கதாநாயகர்களாக காட்டிக் கொள்ள பெரும் முயற்சி எடுத்துவரும் நிலையில், அந்த சமயத்தில் யூடியூபிலிருந்து வந்து, தனக்கென இருந்த ரசிகர்களை கவர்ந்து தற்போது புகழின் உச்சியில் இருக்கிறார் ஷா ரா. அவர் இன்று 39வது பிறந்த நாளைக் கொண்டாடுகிறார்.