"அன்பு பொங்கட்டும் மகிழ்ச்சி நிறையட்டும்" ரசிகர்களுக்கு தீபாவளி வாழ்த்து கூறிய பிரபலங்கள்..

அந்த வகையில், சினிமா பிரபலங்களும், அரசியல் பிரபலங்களும் இன்று மக்களுக்கு தீபாவளி வாழ்த்துகளைத் தெரிவித்து வருகின்றனர்.

ரஜினிகாந்த் தீபாவளி வாழ்த்து

அதன்படி, நடிகர் ரஜினி காந்த், வழக்கம் போல தனது வீட்டின் முன் குவிந்துள்ள மக்களை சந்தித்து அவர்களுக்கு தீபாவளி வாழ்த்துகளைத் தெரிவித்தார். அத்தோடு செய்தியாளர்களை சந்தித்த அவர், " அனைவருக்கும் என்னுடைய தீபாவளி நல்வாழ்த்துக்கள். எல்லோரும் மகிழ்ச்சியாக, ஆரோக்கியமாக, சந்தோஷமாக இருக்க வேண்டும்." என தீபாவளி வாழ்த்து தெரிவித்துள்ளார்.

கமல் ஹாசன் தீபாவளி வாழ்த்து

நடிகர் கமல் ஹாசன், அவரது எக்ஸ் தள பக்கத்தில் மக்களுக்கு தீபாவளி வாழ்த்து தெரிவித்துள்ளார். அந்தப் பதிவில் "இந்தியா முழுமையும் மகிழ்ந்து கொண்டாடும் ஒருநாள் தீபாவளி. இல்லமெங்கும் மகிழ்ச்சி உள்ளமெங்கும் மலர்ச்சி என இந்த ஒளிநாளில் அனைவர் மனதிலும் உற்சாகம் நிறைய வாழ்த்துகிறேன். " எனத் தெரிவித்துள்ளார்.

விஜய் தீபாவளி வாழ்த்து

புதிதாக கட்சி தொடங்கிய நடிகர் விஜய், "தீபங்களின் ஒளி வெள்ளத்தில் காரிருள் விலகி. நல்விடியல் பிறக்கட்டும். அனைவரது இல்லங்களிலும் உள்ளங்களிலும் அன்பு, அமைதி, செல்வம் நிலைத்து நீடித்திருக்கட்டும். தீப ஒளித் திருநாளைப் பாதுகாப்பாகக் கொண்டாடி மகிழ்வோம். அனைவருக்கும் இனிய தீப ஒளித் திருநாள் நல்வாழ்த்துகள்" என மக்களுக்கு வாழ்த்து தெரிவித்துள்ளார்.

நடிகர் கார்த்தி தீபாவளி வாழ்த்து

நடிகர் கார்த்தி, "மகிழ்ச்சி எங்கும் நிறையட்டும்! அன்பு நிறைந்த இனிய தீபாவளி நல்வாழ்த்துக்கள்!🤗" எனக் கூறியுள்ளார்.

சிவகார்த்திகேயன் தீபாவளி வாழ்த்து

நடிகர் சிவகார்த்திகேயன், "பெருங்காதலும், ஒப்பில்லா வீரமும், தியாகமும் நிறைந்த மேஜர் முகுந்த் வரதராஜன் அவர்களின் வாழ்க்கை பயணத்தை திரையில் வழங்குவதில் பெருமிதம் கொள்கிறேன். அனைவருக்கும் இனிய தீபாவளி நல்வாழ்த்துகள்." எனத் தெரிவித்துள்ளார்.

உதயநிதி தீபாவளி வாழ்த்து

நடிகரும், துணை முதலமைச்சருமான உதயநிதி ஸ்டாலின், " நம்பிக்கை உள்ளவர்களுக்கு, கொண்டாடுபவர்களுக்கு தீப ஒளித் திருநாள் நல்வாழ்த்துகளையும் தெரிவித்துக்கொள்கிறேன்" எனக் கூறியுள்ளார்.

எடப்பாடி பழனிசாமி தீபாவளி வாழ்த்து

அதிமுக பொதுச் செயலாளர் எடப்பாடி பழனிசாமி, "தித்திக்கும் தீபாவளித் திருநாளில், மக்கள் அனைவரது வாழ்விலும் துன்பங்கள் நீங்கி, இன்பங்கள் பெருகட்டும்; இன்று பெருகும் இன்பம் அனைவரிடமும் என்றென்றும் நிலைத்திருக்கட்டும். மக்கள் அனைவரும் எல்லா வளமும், நலமும் பெற்று இன்பமுடன் வாழ்ந்திட வேண்டும் என்று மனதார வாழ்த்துகிறேன்" எனக் கூறியுள்ளார்.

ஓ.பன்னீர் செல்வம் தீபாவளி வாழ்த்து

முன்னாள் முதலமைச்சர் ஓ.பன்னீர் செல்வம், " 'தீபங்களின் வரிசை' என்றழைக்கப்படும் தீபாவளித் திருநாளை உற்சாகத்துடனும், மகிழ்ச்சியுடனும் கொண்டாடும் எனது அருமை தமிழக மக்களுக்கு நெஞ்சம் நிறைந்த தீபாவளித் திருநாள் நல்வாழ்த்துகளை மட்டற்ற மகிழ்ச்சியுடன் தெரிவித்துக் கொள்கிறேன்." என வாழ்த்துகளைத் தெரிவித்துள்ளார்.

தமிழிசை சௌந்தர்ராஜன் தீபாவளி வாழ்த்து

புதுச்சேரியின் முன்னாள் துணை நிலை ஆளுநர், "இந்திய மக்கள் அனைவருக்கும் எனது மனமார்ந்த இனிய “தீபாவளி“ திருநாள் நல்வாழ்த்துகளைத் தெரிவித்துக்கொள்கிறேன்.

#தீபாவளி திருநாள் நாட்டு மக்களிடையே ஒற்றுமை உணர்வையும் சகோரத்துவத்தையும் பலப்படுத்துகிறது. சாதி மத பேதங்களைக் கடந்து கொண்டாடப்படும் இந்த தீபாவளித் திருநாள் அனைவரது வாழ்விலும் ஒளிமயமான எதிர்காலத்தையும் மகிழ்ச்சியையும் கொண்டுவர வாழ்த்துகிறேன்." எனக் கூறியுள்ளார்.