Raawadi Song:சமந்தாவுக்கு டஃப் கொடுத்தாரா சாயிஷா?-ராவடி பாடல் எப்படி? - வீடியோ!

சில்லுனு ஒரு காதல், நெடுஞ்சாலை ஆகிய படங்களை இயக்கிய ஒபிலி என்.கிருஷ்ணா இயக்கத்தில் சிம்பு நடித்துள்ள பத்து தல திரைப்படம் வருகிற மார்ச் 30 ஆம் தேதி வெளியாக இருக்கிறது.

இந்த திரைப்படம் கன்னடத்தில் நரதன் இயக்கத்தில் சிவராஜ்குமார், ஸ்ரீமுரளி உள்ளிட்ட பலர் நடிப்பில் வெளியாகி ரசிகர்களிடம் வரவேற்பை பெற்ற மஃப்டி படத்தின் தமிழ் ரீமேக்காகும்.

ஸ்டூடியோ கிரீன் ஞானவேல் ராஜா தயாரித்திருக்கும் இந்த திரைப்படத்தில் வில்லனாக கௌதம் மேனனும் முக்கிய கதாபாத்திரங்களில் கௌதம் கார்த்திக், பிரியா பவானி சங்கர், கலையரசன் ஆகியோர் நடித்துள்ளனர்.

இந்த படத்திற்கு ஏ.ஆர்.ரகுமான் இசையமைத்து இருக்கிறார். இப்படத்தின் முதல் சிங்கள் பாடலான ‘நம்ம சத்தம்’ பாடலானது சிலம்பரசனின் பிறந்தநாள் அன்று வெளியானது. சிலம்பரசன் பாட வேண்டிய இந்த பாடலை ஏஆர் ரஹ்மான் பாடியிருந்தார்.

அதனைத் தொடர்ந்து இரண்டாவது சிங்கிள் பாடலான ‘நினைவிருக்கா’ பாடல் வெளியிடப்பட்டது. இந்த பாடலை பாடலாசிரியர் கபிலன் எழுத, அந்த பாடலை ஏ.ஆர்.ரகுமானின் மகன் ஏ.ஆர்.அமீன் மற்றும் சக்திஸ்ரீ கோபாலன் பாடினர். அதனைத்தொடர்ந்து படத்தின் இசை வெளியீட்டு விழா பிரமாண்டமாக நடந்தது.

படத்தின் ட்ரெய்லரும் வெளியாகி மக்கள் மத்தியில் வரவேற்பை பெற்றது. இதனிடையே இந்த திரைப்படத்தில் ‘ராவடி’ என்ற பாடலுக்கு நடிகை சாயிஷா நடனம் ஆடியிருப்பதாக அறிவிக்கப்பட்டது. அந்த பாடல் இன்று மாலை 5 மணியளவில் வெளியாகும் என தெரிவிக்கப்பட்டிருந்த நிலையில் காலதாமதம் காரணமாக பாடல் 6 மணியளவில் வெளியிடப்படும் என சொல்லப்பட்டது. இந்த நிலையில் ராவடி பாடல் தற்போது வெளியாகியிருக்கிறது. முன்னதாக புஷ்பா படத்தில் நடிகை சமந்தா ஊ சொல்றியா பாடல் ஒன்றிற்கு மட்டும் நடனம் ஆடினர். அந்த பாடல் மிகப்பெரிய வரவேற்பை பெற்றது. அந்த வரிசையில் தற்போது இந்த பாடலும் டான்ஸ் நம்பர் பாடலாக வெளியாகியிருக்கிறது.