HBD Ramya Krishnan : நீலாம்பரி.. மேகி.. ராஜமாதா என ஹிட் கதாபாத்திரத்தில் நடித்த ரம்யா கிருஷ்ணன் பிறந்தநாள் இன்று!
40 ஆண்டுகளுக்கு மேலாக தமிழ், தெலுங்கு, மலையாளம், கன்னடம். இந்தி என ஐந்து மொழிப் படங்களில் நடித்து அசத்தி வரும் நடிகை ரம்யா கிருஷ்ணன் நாள் இன்று.
நடிகை ரம்யா கிருஷ்ணன் 1970 ஆம் ஆண்டு செப்டம்பர் 15ஆம் நாள் கிருஷ்ணன்-மாயா தம்பதிகளுக்கு மகளாக பிறந்தார். பழம்பெரும் நடிகரும் துக்ளக் பத்திரிகையின் ஆசிரியருமான சோ ராமசாமியின் சொந்த தங்கை மகள் தான் இந்த ரம்யா கிருஷ்ணன்.
1983-ல் வெளியான வெள்ளை மனசு திரைப்படத்தில் ஒய்.ஜி.மகேந்திரனுக்கு ஜோடியாக நடித்தார். அதுவே அவர் நடித்த முதல் படம். 1985இல் வெளியான ரஜினிகாந்தின் படிக்காதவன், 1987-ல் கமல்ஹாசனின் பேர் சொல்லும் பிள்ளை உள்ளிட்ட படங்களில் துணைக் கதாபாத்திரங்களில் நடித்துள்ளார். நடிகர் நாகேஷ் இயக்கிய பார்த்த ஞாபகம் இல்லையோ திரைப்படத்தில் இரட்டை வேட நாயகியாக நடித்தார்.
1991-ல் பாலசந்தர் தயாரிப்பில் எஸ்.பி.பாலசுப்ரமணியம் கதையின் நாயகனாக நடித்த சிகரம் படத்தில் துணிச்சலான கதாபாத்திரத்தில் நடித்தார். மணிவண்ணன் இயக்கிய முதல் வசந்தம் திரைப்படத்தில் கதாநாயகியாக நடித்துள்ளார்.