நங்கூரமாய் நின்ற நந்தன்.. “மிகத் தரமான.. தைரியமான..” - சசிகுமாரை போனில் அழைத்து பாராட்டிய ரஜினிகாந்த்

படத்தை பார்த்த ரசிகர்கள் அனைவரும்… 'ஒடுக்கப்பட்ட மக்களுக்கான அதிகார பகிர்வு குறித்த யதார்த்த நிலையை நந்தன் திரைப்படம் பதிவு செய்திருப்பதாக பாராட்டினர். விமர்சகர்களும் 'நந்தன்' திரைப்படத்தை பாராட்டினர். ரசிகர்கள் - விமர்சகர்கள்- திரையுலகினர் - திரையுலக ஆர்வலர்கள் என அனைத்து தரப்பினரின் ஏகோபித்த பாராட்டைப் பெற்ற 'நந்தன்' திரைப்படம் , அண்மையில் டிஜிட்டல் தளத்தில் வெளியானது.

டிஜிட்டலில் பார்வையிட்ட ரஜினிகாந்த்

'நந்தன்' திரைப்படத்தை டிஜிட்டல் தளத்தில் பார்வையிட்ட பல முன்னணி பிரமுகர்களும் தங்களது பாராட்டை தெரிவித்து வருகின்றனர். இந்த நிலையில் நடிகர் ரஜினிகாந்த், இந்தப்படத்தை டிஜிட்டல் தளத்தில் பார்வையிட்டு தன்னுடைய பாராட்டை தெரிவித்திருக்கிறார்.‌

நடிகர் ரஜினிகாந்த் இந்தப் படத்தை பார்வையிட்டவுடன் நடிகர் சசிகுமார் - இயக்குநர் இரா . சரவணன் - விநியோகஸ்தர் ட்ரைடன்ட் ரவி ஆகியோரை தொலைபேசி மூலம் தொடர்பு கொண்டு, 'நந்தன் மிகத் தரமான.. தைரியமான... படம்' என மனம் திறந்து பாராட்டினார். இதனால் படக்குழுவினர் உற்சாகமடைந்திருக்கிறார்கள். 'நந்தன்' திரைப்படம் டிஜிட்டல் தளத்தில் மில்லியன் கணக்கிலான பார்வையாளர்களின் வரவேற்பை பெற்று வருவதாக கூறப்படுகிறது.

இப்படத்தில் ஸ்ருதி பெரியசாமி, பாலாஜி சக்திவேல் மற்றும் சமுத்திரக்கனி ஆகியோர் முக்கியமான கதாப்பாத்திரத்தில் நடித்துள்ளனர். இப்படத்திற்கு ஜிப்ரான் இசையமைத்துள்ளார். முன்னதாக, இப்படத்தை பார்த்த விடுதலை சிறுத்தைகள் கட்சித்தலைவரும், சிதம்பரம் தொகுதி எம். பி யான திருமாவளவனும் படத்தை பாராட்டியிருந்தார். தொடர்ந்து பாஜக தலைவரான அண்ணாமலையும் இப்படத்தினை பாராட்டினார்.

அண்ணாமலை பாராட்டு

இது குறித்து தனது X தள பதிவில், 'OTT தளத்தில் ‘நந்தன்’ திரைப்படத்தைப் பார்த்தேன். பட்டியலின மக்களை முன்னேற்றுகிறோம் என்ற பெயரில் தங்கள் சுயலாபத்திற்காகப் பட்டியலின மக்களைச் சுரண்டி ஆட்சி செய்யும் சர்வாதிகார அரசியல் வாதிகளைத் தோலுரித்துக் காட்டியிருக்கிறது இத்திரைப்படம்.

தனது தேர்ந்த நடிப்பின் மூலம் பட்டியலின ஊராட்சி மன்ற தலைவர்கள் படும் இன்னல்களை நம் கண்முன் கொண்டு வந்த நடிகர் சகோதரர் சசிக்குமார் அவர்களுக்கு எனது மனமார்ந்த வாழ்த்துக்கள்.

பட்டியலின மக்களுக்காக ஒதுக்கப்பட்ட ஊராட்சிகளில் நடக்கும் அவல அரசியலை உள்ளபடியே காட்சிப்படுத்தியிருக்கும் இயக்குநர் திரு. சரவணன் அவர்களுக்கும் எனது மனமார்ந்த வாழ்த்துக்கள். பல ஆழமான கருத்துக்கள் நிறைந்த ‘நந்தன்’ திரைப்படம் காலத்திற்கும் மக்கள் மனதில் இடம் பெற்றிருக்கும் என்பதில் சந்தேகமில்லை" எனக் குறிப்பிட்டு இருந்தார்.

இயக்குனர் நெகிழ்ச்சி

அண்ணாமலைக்கு நன்றி தெரிவித்த இயக்குனர் இரா. சரவணன் "உங்கள் குரலுக்கு எப்போதுமே சக்தி அதிகம் சார்… ‘நந்தன்’ படம் பார்த்து நீங்கள் பதிவிட்ட கருத்து, பட்டியலினப் பஞ்சாயத்து தலைவர்கள் மீதான அக்கறையைப் பெரிதாக்கி இருக்கிறது; ஒடுக்குமுறைகள் குறித்த விவாதங்களை தீவிரமாக்கி இருக்கிறது. ‘நந்தன்’ படத்தை பெரிய அளவில் பேசுபொருளாக்கி இருக்கிறது. பயணம், அரசியல், படிப்பு உள்ளிட்ட பணிகளுக்கு மத்தியில் ‘நந்தன்’ படம் பார்த்து கருத்துச் சொன்னதற்கும், சமூக நீதிக்கான குரலைப் பெரிதாக்கியதற்கும் மனமார்ந்த நன்றி சார். மேலும் படத்தின் கதாநாயகன் சசிக்குமார் அதிக பணிகளுக்கு இடையே எங்களது படத்திற்கு வாழ்த்து தெரிவித்தற்காக நன்றி கூறினார்.