அகில உலகத்தை ஆட்டிப்படைக்கும் புஷ்பா 2.. முதல் நாள் அதிகாரப்பூர்வ கலெக்‌ஷன்.. தமிழ்நாட்டு டப்பிங் படங்களில் ரெக்கார்டு

புஷ்பா படம் எத்தகையது?

இயக்குநர் சுகுமார் இயக்கத்தில் நடிகர் அல்லு அர்ஜூன் நடித்த 'புஷ்பா' முதல் பாகம் டிசம்பர் 17, 2021அன்று வெளியிடப்பட்டது. ஆந்திராவின் திருப்பதி வனப்பகுதியில் செம்மரக் கடத்தலில் ஈடுபடும், புஷ்பா என்கிற புஷ்பராஜின் எழுச்சியைப் பற்றி, இப்படம் காட்சியமைக்கப்பட்டது. 250 கோடி ரூபாய் முதலீடுசெய்து எடுக்கப்பட்ட இப்படம், பாக்ஸ் ஆபிஸில், 360 கோடி வசூல்செய்து சாதனைப் படைத்தது. மேலும் இப்படத்தில் நடித்ததற்காக அல்லு அர்ஜூனுக்கு தேசிய விருது வழங்கப்பட்டது. அதன்பிறகு அல்லு அர்ஜூன் கதையம்சம் உள்ள படத்தில் நடிப்பதற்காக வேறு எந்தப் படத்திலும் கமிட்டாகாமல், முழுக்க 'புஷ்பா 2' படத்தில் மட்டுமே கவனம் செலுத்தி வந்தார்.

மேலும், புஷ்பா: தி ரைஸ் (2021) பல இதயங்களை வென்றதற்கு ஒரு முக்கியக் காரணம், படத்தில் புஷ்பராஜூவாக அல்லு அர்ஜூனும் ஸ்ரீவள்ளியாக ராஷ்மிகா மந்தனாவும் அற்புதமாக நடித்திருந்தனர். அவர்களது கெமிஸ்ட்ரியும் சூப்பராக இருந்தது.

புஷ்பா 2 எத்தனை மொழிகளில் ரிலீஸ்:

இந்தப் படம் 2021ஆம் ஆண்டு வெளியான ’’புஷ்பா: தி ரைஸ்’’ படத்தின் இரண்டாம் பாகம் ஆகும். இந்நிலையில் புஷ்பா 2 தி ரூல் திரைப்படம் வரும் டிசம்பர் மாதம் 5ஆம் தேதி உலகம் முழுவதும் வெளியானது. அமெரிக்காவில் மட்டும் டிசம்பர் 4ஆம் தேதி வெளியானது.

புஷ்பா திரைப்படம், தமிழ், தெலுங்கு, இந்தி, கன்னடம், மலையாளம் ஆகிய மொழிகளில் மட்டுமல்லாது, ரஷ்ய, ஜப்பானிய மற்றும் சீன மொழிகளிலும் டப் செய்து வெளியிடப்பட்டது என்பது குறிப்பிடத்தக்கது.

புஷ்பா 2 படத்தின் கதை என்ன?

புஷ்ப ராஜ் (அல்லு அர்ஜுன்) சிவப்பு சந்தன சிண்டிகேட் சாம்ராஜ்யத்தின் மறுக்க முடியாத தலைவராக மாறுகிறார். தனக்கென ஒரு பெரிய சாம்ராஜ்யத்தை ஸ்தாபிக்கிறார். எஸ்.பி. பன்வர் சிங் ஷெகாவத் (ஃபஹத் பாசில்) ஒவ்வொரு முறையும் புஷ்பாவின் சிவப்பு சந்தன மரத்தை சட்டவிரோதமாக கொண்டு செல்வதை தடுக்க முயற்சிக்கிறார்.

ஸ்ரீவள்ளி (ராஷ்மிகா மந்தனா) புஷ்பா முதல்வருடன் ஒரு புகைப்படம் எடுப்பதைப் பார்க்க விரும்புகிறார், ஆனால் முதல்வர் புஷ்பா ராஜை ஒரு கடத்தல்காரர் என்று கூறி அவருடன் புகைப்படம் எடுக்க மறுக்கிறார் முதல்வர். முதல்வரை நீக்கிவிட்டு சித்தப்பாவை (ராவ் ரமேஷ்) அந்த பதவியில் அமர வைக்க புஷ்பா முடிவு செய்கிறார். அதே வேளயைில் வெளிநாடு செல்லும் சிவப்பு சந்தன கட்டைகளை, பன்வர் சிங் ஷெகாவத் பிடிக்க முயற்சிக்கிறார். அது நடந்தால், புஷ்பாவின் சாம்ராஜ்யத்திற்கு ஆபத்து. இந்த இரு பிரச்னைகளை எப்படி சமாளித்தார் புஷ்பராஜ்? அதன் பிறகு என்ன நடந்தது?

இந்த சவாலில் புஷ்பா வெற்றி பெற்றாரா? புஷ்பாவின் பேரத்தை தடுக்க பன்வர் சிங் ஷெகாவத் என்ன செய்தார்? புஷ்பா அவரை எப்படி வீழ்த்தினார்? புஷ்பாவின் கனவு எப்படி நனவாகியது? தனது மூத்த சகோதரரின் மகளை காப்பாற்ற மத்திய அமைச்சர் பிரதாப் ரெட்டியுடன் (ஜெகபதி பாபு) புஷ்பா ஏன் சண்டையிட்டார்? இதுதான் புஷ்பா 2 படத்தின் கதை.

புஷ்பா 2 படத்தின் முதல் நாள் வசூல் நிலவரம்:

புஷ்பா 2 திரைப்படம் உலகளவில் பாக்ஸ் ஆபிஸில் முதல்நாளில் மட்டும் 294 கோடி ரூபாய் வசூலை ஈட்டியதாக படக்குழுவினரால் அதிகாரப்பூர்வமாக அறிவிக்கப்பட்டது. குறிப்பாக இந்தி மொழிபேசும் மாநிலங்களில் மட்டும் 72 கோடியும், வட அமெரிக்காவில் 4.48 மில்லியன் டாலரை முதல் நாளில் புஷ்பா 2 கலெக்ட் செய்துள்ளது. அதேபோல், தமிழ்நாட்டில் ரூ.11 கோடி புஷ்பா 2 வசூலித்துள்ளது. இப்படி தமிழ்நாட்டில் எந்தவொரு டப்பிங் படமும் வசூலித்தது கிடையாது என தெரிவிக்கின்றனர்.

ஹிட்டடித்த புஷ்பா 2 தி ரூல் பாடல்கள்:

இந்நிலையில் புஷ்பா படத்தின் தயாரிப்பாளர்கள் ஏப்ரல் 8ஆம் தேதி அல்லு அர்ஜூனின் பிறந்தநாளில் ஒரு சிறப்பு டீஸரை வெளியிட்டனர். அதில் அல்லு அர்ஜூன் ’ஜதாரா’ என்னும் தெலுங்கு பழங்குடியினர் கெட்டப்பில் காணப்பட்டார். அதேபோல், ’புஷ்பா புஷ்பா புஷ்பராஜ்’ என்னும் முதல் சிங்கிள் பாடலும் வெளியானது. அதனைத்தொடர்ந்து புஷ்பா 2 படத்தின் இரண்டாம் சிங்கிள் பாடலும் வெளியானது. அப்பாடலை தமிழில் கவிஞர் விவேகா எழுதியுள்ளார். ’’சூடான தீ கங்கு மாதிரி.. இருப்பானே என் சாமி.. பார்க்கத்தான் பாறை.. உள்ளேயே வேற..’’என அனைத்து மக்களுக்கும் புரியும்படி எளிய தமிழில் கவிஞர் விவேகா எழுதியுள்ளார். இப்பாடல்கள் இரண்டும் சமூகவலைதளங்களில் ஹிட்டாகின.

அதைத்தொடர்ந்து சமீபத்தில் நடிகை ஸ்ரீலீலாவுடன், ’சப்புன்னு அறைவேன்டா’ என்னும் பாடலில் அல்லு அர்ஜூன் ஆடிய பாடல் வைரல் ஆகி வந்தது. இந்நிலையில் டிசம்பர் ஒன்றாம் தேதி மாலையில், வந்துச்சே பீலிங்ஸ்.. வந்துச்சே பீலிங்ஸ்.. வண்டிய வண்டியா வந்துச்சு பீலிங்ஸ் என்னும் பாடல் ரிலீஸ் ஆனது. இந்தப் பாடலையும் தேவிஸ்ரீபிரசாத்தின் ஆஸ்தான கவிஞரான விவேகா எழுதியிருக்கிறார். இப்பாடலும் ராஷ்மிகா மற்றும் அல்லு அர்ஜூனின் நடன அசைவுகளால் வெகு சீக்கிரமாக ட்ரெண்ட் ஆகியது.