Prakash Raj: ‘2 வருஷம் கலைஞர் கூடவே இருந்து படிச்சேன்; அவர மாதிரி ஒருத்தர்.. மோடி ஆடியன்ஸ் அங்கதான்’ - பிரகாஷ்ராஜ்
Prakash Raj: இருவர் பட கேரக்டருக்காக 2 வருஷம் கலைஞர் கூடவே இருந்து படிச்சேன். அவர மாதிரி ஒருத்தர பார்க்க முடியாது.” - பிரகாஷ்ராஜ்
கலைஞர் கருணாநிதியின் நூற்றாண்டு விழாவையொட்டி, கருணாநிதியின் கண்காட்சியை திறந்து வைத்த நடிகர் பிரகாஷ்ராஜ் செய்தியாளர்களிடம் பேசினார்.
இருவர் படத்தில் கருணாநிதி கேரக்டரில்
அவர் பேசும் போது, “இருவர் படம் நடித்து 28 வருடங்கள் ஆகின்றது. 30 ஆண்டு காலம் முன்பாக தமிழகத்திற்கு வந்த போது, எனது மனதில் இருந்த கலைஞர் ஞாபகத்திற்கு வருகிறார். நான் இருவர் படத்தில், அவரது கதாபாத்திரத்தில் நடித்தேன். ஆனால் அவரை கதாபாத்திரத்தில் பிரதிபலிக்க எனக்கு இரண்டு வருடங்கள் ஆனது. நான் கர்நாடகாவில் இருந்து வந்தவன். ஆகையால் அவரது தமிழ் உச்சரிப்பை முதலில் கற்றுக்கொள்ள வேண்டியதாக இருந்தது. அதன் மூலமாக என்னால் அவரை தெரிந்து கொள்ள முடிந்தது. படிக்க முடிந்தது.
அண்மையில் கூட ஒரு பேட்டியில் ஜாதி அரசியல் குறித்து நீங்கள் பேசுவீர்கள் என்று சொன்னார்கள் என்று ஒருவர் கேட்டதற்கு, கலைஞர் இருந்திருந்தால், நான் அதைப்பற்றி பேச வேண்டிய தேவையே வந்திருக்காது என்று கூறினேன். அவர் இருந்த வரைக்கும் எவனாலும் இங்கு வாலட்ட முடியவில்லை. அந்த படத்தில் தண்டவாளத்தில் படுத்திருப்பது போன்ற காட்சி ஒன்று வரும். அதில் நான் படுத்திருக்கும் போது எனக்கு வேர்த்து விட்டது. ஆனால் ஒருவர் உண்மையிலேயே நிஜ வாழ்க்கையில் செய்திருக்கிறாரே என்று நினைக்கும் போது பிரமிப்பாக இருந்தது.