கொண்டாடித் தீர்த்த ரசிகர்கள் ..எம்ஜிஆரின் ‘காவல்காரன்’ வெளியாகி 56 ஆண்டுகள் நிறைவு!

மறக்க முடியாத பாடல்கள், நகைச்சுவை காட்சிகள், திகைப்பூட்டும் க்ரைம் காட்சிகள், வாழ்க்கை தத்துவங்கள் என ஏதோ ஒன்றின் மூலம் பழைய திரைப்படங்கள் நம்மை பின்னோக்கி இழுத்துச் செல்கின்றன. அந்த வகையில், 1967 ஆம் ஆண்டு செப்டம்பர் 7-ல் வெளியான திரைப்படம் 'காவல்காரன்'.

சத்யா மூவீஸ் சார்பில் ஆர்.எம்.வீரப்பன் தயாரித்திருந்தார். ப.நீலகண்டன் இயக்கிய இத்திரைப்படத்தில் ஜெயலலிதா, நாகேஷ், நம்பியார், அசோகன், பண்டரிபாய், மனோகர், சிவகுமார் உள்ளிட்டோர் நடித்திருந்தனர். இத்திரைப்படம் எம்ஜிஆர் ரசிகர்கள் மத்தியில் நீங்கா இடம்பிடிக்க ஒரு முக்கிய காரணம் உண்டு.

ஆம், எம்ஜிஆர் சுடப்பட்ட பின்னர் நடித்து 8 மாதங்கள் கழித்து ‘காவல்காரன்’ ரிலீஸானது. துக்கமும் அழுகையுமாக வந்து மக்கள் படம் பார்த்தார்கள். எதிர்பார்த்த வெற்றியை விட மூன்று மடங்கு வெற்றியைத் தந்தார்கள். அதுதான் எம்ஜிஆர் மேஜிக்.

எம்ஜிஆர் போலீஸ் அதிகாரியாக தோன்றியிருந்தார். நம்பியார் வில்லன் கதாபாத்திரம், அவரின் மகள் ஜெயலலிதா. ஒரு பங்களாவில் நடக்கும் கொலை குறித்து துப்பறிய எம்ஜிஆர், நம்பியார் வீட்டு கார் டிரைவராக வருவார். அவர் போலீஸ் என்பது அம்மாவுக்கு கூட தெரியாது. கொலை செய்தது யார், நம்பியார், அசோகன், மனோகரின் வேலைகள் என்னென்ன என்பதையெல்லாம் எப்படிக் கண்டறிந்தார் என்கிறதுதான் கதை. அதை முழுக்க முழுக்க எம்ஜிஆர் ஃபார்முலா கதையாகத்தான் கையாண்டு அசத்தினார் இயக்குனர் ப.நீலகண்டன்.

'மெல்லப்போ மெல்லப்போ மெல்லிடையாளே மெல்லப்போ', 'நினைத்தேன் வந்தாய் நூறு வயது', 'அடங்கொப்புரானே தியமா நான் காவல்காரன்', 'காது கொடுத்து கேட்டேன் குவாகுவா சத்தம்' போன்ற எல்லாப் பாட்டுகளும் செம ஹிட்டு. இலங்கையில் இந்தப் படம் 170 நாட்களைக் கடந்து ஓடியது. மிகப்பெரிய வசூலை பெற்றுத்தந்தது.

திரையில் ஜொலித்த 'காவல்காரன்' திரைப்படம் வெளியாகி இன்றுடன் 56 ஆண்டுகள் நிறைவடைந்துள்ளது. அதாவது 1967ம் ஆண்டு செப்டம்பர் 7ம் தேதி இதே நாளில் இந்தப் படம் ரிலீஸாகியது. கிட்டத்தட்ட, 56 வருடங்களாகிவிட்டன. ஆனால்,நேற்று ரிலீஸானது போல் உள்ளது.