Jai Bhim: தேசிய விருதுக்கு ஜெய்பீம் படம் ஏன் தேர்வாகவில்லை?-சமூக வலைத்தளங்களில் ரசிகர்கள் வேதனை

சிறந்த நடிகருக்கான விருதை புஷ்பா படத்தில் நடித்த அல்லு அர்ஜுன் வென்றார். சிறந்த நடிகைக்கான விருதை கங்குபாய் கதியாவாடி படத்தில் நடித்ததற்காக அலியா பட்டும், மிமி படத்தில் நடித்ததற்காக கீர்த்தி சனோன் இணைந்து பெறுகின்றனர் என அறிவிக்கப்பட்டுள்ளது.

அல்லு அர்ஜூன் நடித்த புஷ்பா படத்திற்காக தேவிஸ்ரீ பிரசாத் சிறந்த இசையமைப்பாளராக தேர்வு செய்யப்பட்டுள்ளார்.

சிறந்த தமிழ் படத்துக்கான தேசிய விருதை கடைசி விவசாயி வென்றது. இந்தப் படத்தை மணிகண்டன் இயக்கியிருந்தார். இவர் ஏற்கனவே காக்கா முட்டை என்ற படத்தை இயக்கியிருந்தார்.

ஜெய்பீம், சார்பட்டா பரம்பரை, கர்ணன் ஆகிய படங்களுக்கு விருது கிடைக்கும் என எதிர்பார்க்கப்பட்டது. குறிப்பாக பிற படங்களை காட்டிலும் விமர்சன ரீதியிலாகவும், வசூல் ரீதியிலாகவும் பெரும் வரவேற்பைப் பெற்ற ஜெய் பீம் படத்திற்கும், அந்தப் படத்தில் நடித்த லிஜோ மோலுக்கு விருது கிடைக்கும் என எதிர்பார்க்கப்பட்டது.

சென்ற முறை சூரரைப் போற்று படத்திற்காக விருதை வென்ற சூர்யா, இந்த முறை ஜெய் பீம் படத்திற்காக வாங்குவார் எனவும் கருதப்பட்டு வந்தது.

ஆனால், ஜெய்பீம் படத்திற்கு எந்தவொரு விருதும் கிடைக்கவில்லை. கடைசி விவசாயி படத்திற்கு மட்டும் ஸ்பெஷல் ஜூரி பிரிவில் சிறந்த தமிழ் படத்திற்கான விருதாக அறிவிக்கப்பட்டது.

உண்மைச் சம்பவத்தை அடிப்படையாக வைத்து எடுக்கப்பட்ட இந்தப் படத்தை தமிழக முதல்வர் கூட பார்த்துவிட்டு பெருமைபட பேசினார்.

இருளர் இன மக்களின் வாழ்வியலையும், துன்ப துயரங்களையும் இதைவிட தெளிவாக காட்சிப்படுத்த முடியாது என முதலமைச்சர் ஸ்டாலின் பாராட்டியிருந்தார்.

இந்நிலையில், அந்தப் படம் விருதுக்குழுவால் எந்தவொரு பிரிவிலும் விருதுக்கு ஏற்கப் படாதது ஏமாற்றத்தை அளித்துள்ளதாக ரசிகர்கள் சமூக வலைத்தளங்களில் புலம்பி வருகின்றனர்.

சில ரசிகர்கள் தேசிய விருதை இல்லை என்றால் என்ன, எங்கள் இதயத்தில் இந்தப் படம் எப்போதும் இருக்கும் என பதிவிட்டுள்ளார்.

காணாமல் போன கணவரை தேடும் கதாபாத்திரத்தில் ஜொலித்திருந்த லிஜோ மோலின் புகைப்படத்தை பதிவிட்டு இவர் தான் என்னை பொறுத்தவரை சிறந்த நடிகை என ஒரு ரசிகர் பதிவிட்டிருந்தார்.

எந்த பிரிவிலும் இந்தப் படம் தேர்வாகவில்லையா? பரவாயில்லை. இந்தப் படம் சமூகத்தில் ஏற்படுத்திய தாக்கம் அதையெல்லாம் விட பெரியது என ஒருவர் குறிப்பிட்டுள்ளார்.