“இரண்டு ஆஸ்கர்களை வென்றேன்..இப்ப எவனும் கண்டுக்க மாட்றான்..டைரக்டர்கள் தப்பா வழி நடத்துறாங்க” - ஏ.ஆர்.ரஹ்மான்

அதில் அவர் பேசும் போது  "இனியும் என்னை நான் நிரூபிக்க வேண்டிய அவசியம் இல்லை என்று நினைக்கிறேன். இப்போது நான் என்னுடைய படைப்பு சார்ந்த உள்ளுணர்வுகளை திருப்தி படுத்தும் படைப்புகளை மட்டுமே தேர்வு செய்து பணியாற்றி வருகிறேன்.நான் பல வருடங்களுக்கு முன்னதாக ஆஸ்கர் விருதுகளை வென்றேன். இப்போது யார் அதனை பற்றி அக்கறை கொள்கிறார்கள். யாரும் அதனை கண்டு கொள்வதில்லை..

அடுத்த தலைமுறையை...

நான் எனக்கு நெருக்கமான திரைப்படங்களில் பணியாற்றி, அடுத்த தலைமுறையை உத்வேகப்படுத்தக் கூடிய இசையை கொடுக்க வேண்டும் என்று நினைக்கிறேன். எனக்கு தற்போது என்னை நிரூபித்தே ஆக வேண்டிய அவசரம் இல்லை. வயது ஆக ஆக எனக்கு சகிப்புத் தன்மை குறைகிறது.

இரண்டு விஷயங்கள்:

இரண்டு விஷயங்கள் என்னை எரிச்சலூட்டுகின்றன. அவை டைமருடன் கொண்ட செல்ஃபியும், என்னை தவறாக வழி நடத்திய இயக்குனர்களும்.. காரணம், அவர்கள் வித்தியாசமான வரிகளை பாடலில் நுழைக்கிறார்கள். அப்போது நான் இந்த பாடலை மேடையில் பாட முடியுமா என்ற கேள்வியை எனக்குள் கேட்பேன். பதில் இல்லை என்று வந்தால், அதனை நான் மறுப்பேன்." என்று பேசினார்.

முன்னதாக, அண்மையில் நடந்த தேசிய விருது விழாவில் சிறந்த தமிழ் படத்திற்கான விருதை பொன்னியின் செல்வன் இயக்குநர் மணிரத்னம் பெற்றுக்கொண்டார். அதே போல, சிறந்த ஒளிப்பதிவாளருக்கான விருதை அந்தப்படத்தின் ஒளிப்பதிவாளர் ரவிவர்மன் பெற்றுக்கொண்டார். சிறந்த பின்னணி இசைக்கான விருது பொன்னியின் செல்வன் பாகம் 1 - ல் இசையமைப்பாளராக பணியாற்றிய ஏ. ஆர். ரஹ்மானுக்கு வழங்கப்பட்டது. இது அவர் வாங்கும் 7 வது தேசிய விருது ஆகும்.

அண்மையில் வெளியான அயலான், லால் சலாம், ராயன், மலையாளத்தில் ஆடுஜீவிதம், இந்தியில் மைதான், அமர் சிங் சம்கீலா ஆகிய படங்களுக்கு ஏ.ஆர்.ரஹ்மான் இசையமைத்தார். அடுத்ததாக ரஹ்மானின் இசையில் ஏராளமான தமிழ், இந்தி மற்றும் தெலுங்கு படங்கள் வெளியாக உள்ளன. 

2010 ஆம் ஆண்டு வெளியான கொமரம் புலி படத்திற்குப் பிறகு, ராம் சரண் மற்றும் ஜான்வி கபூர் ஆகியோருடன் புச்சி பாபு சனாவின் படத்திற்கு இசையமைத்து தெலுங்கிற்கு கம் - பேக் கொடுக்கிறார். அதே போல தமிழில் தக் லைஃப், ஜெனி, காதலிக்க நேரமில்லை, மூன் வாக் மற்றும் ஆர்.ஜே.பாலாஜியுடன் சூர்யா நடிக்கும் அடுத்த படத்திற்கும் இசையமைக்கிறார்.

இந்தியில் சாவா, லாகூர் 1947, தேரே இஷ்க் மெயின், ராமாயணம் மற்றும் கமல் அவுர் மீனா ஆகிய படங்களில் பணியாற்றிவருகிறார். அத்துடன் விஜய் சேதுபதி, அதிதி ராவ் ஹைதாரியின் மௌனப் படமான காந்தி டாக்ஸ், சேகர் கபூரின் எபோனி மெக்வீன் ஆகியவற்றிற்கும் அவர் இசையமைத்து வருகிறார்.